Menda bir taklif bor. Sizga yoqmasligi mumkin. Lekin bir qilib ko‘raylik: O‘zbekiston Respublikasi Ichki ishlar vazirligi uchun yangi bino qursak. Budjet hisobidan. Ha, men va siz to‘lagan soliqlar hisobidan. Yap-yangi. Biror to‘qqiz qavatli qilib. Vazirlikning barcha tuzilmalarini bir joyda jamlab. Vazirlik apparati ham, Tergov departamenti ham, Yo‘l harakati xavfsizligi xizmati ham, hammasi bir joyda o‘tiradigan qilib (ularning bo‘shagan binolari o‘rniga keyin premium turar joylar ham qursa bo’ladi — qalay?). Kerak bo‘lsa 20 qavatli qilib qurishsin. Men roziman. Behazil. Ha, 20 qavat bo‘lgani yaxshi. Har qalay, hozirgi trend shu. Aholi ham o‘syapti, hali bu vazirlik ham shishadi - binoda qo‘shimcha zaxira joylar bo‘lsa, koni foyda.
Yangi binoda “tartib posbonlari”mizga hamma sharoitlarni hozirlab beraylik. Eng so‘nggi texnologiyalar bilan ta’minlaylik. Ayniqsa vazirlik rahbari va vazirlikning eng katta bo‘linmalarining boshliqlari xonalari lyuks darajada bo‘lsin. Masalan, har birining bir emas, bir nechtadan yotoqxonasi bo‘lsin. Men roziman. Hojatxonalari ham to‘rttalab bo‘lishi, har biriga kamida ikkitadan tillarang unitazlar o‘rnatilishiga ham qarshi emasman. Har birida zo‘r oshxonalari ham bo‘lsin - osh chempionatida chempion bo‘lgan oshpazi bilan. Xullas, yil 365 kun uyga ham bormay, mazza qilib ishlaydigan sharoit hozirlansin.
Faqat, Ichki ishlar vazirligining yangi binosining qavatlari yer ustida emas, yer ostida “o‘ssin”. Bino -1-qavatdan boshlanib (xuddi metro kabi), -20-qavatgacha “bo‘y cho‘zsin”. “Eng baland” (eng tub) - minus yigirmanchi qavat, albatta, rahbariyatga ajratilishi kerak. Minus o‘n to‘qqizinchi qavatni esa Yo‘l harakati xavfsizligi xizmatiga berishni taklif qilaman.
Darvoqe, zo‘r texnologiyalar bilan ta’minlash kerak dedim-ku — bino 20 qavat bo‘lganidan keyin, unga eng zamonaviy, dunyoning eng oldi lift va eskalatorlarini ham o‘rnatish kerak. Kamida Kone'niki bo‘lsin. Ammo ular ishlamasligi kerak. Hech biri. Ha, birorta lift va eskalator ishlamasligi kerak. Faqat bu yerdagi rahbarchalardan ham kattaroq rahbarlar “komissiya bo‘lib” tekshiruvga kelsa yoki chet ellik nozik mehmonlar tashrif buyurganida, ko‘rgazma sifatidagina ishlatish mumkin. Boshqa vaqt — yo‘q. Axir bu yerda tartib posbonlari ishlaydi, ular baquvvat bo‘lishi kerak — 20 qavat zina nima degan gap ularga! Harna, qorinlari chiqib ketmaydi.
Keyin bunday yerosti ichki ishlar organlari saroylarini viloyatlarda ham qurish kerak. Agar tajriba muvaffaqiyatli chiqsa, uyog‘iga hokimliklarning binolarini,.. xullas, davom etish mumkin.
Shu taklifga nima deysiz? Bu taklif Jizzax viloyati Yo‘l harakati xavfsizligi xizmatining Jizzax shahridagi tartibga solingan piyodalar o‘tish joyi “avtomobillarning ravon harakatlanishini ta’minlash uchun” yopilib, yo‘l o‘rtasiga temir to‘siqlari qo‘yilgani, “lekin ayrim qo‘shtirnoq ichidagi piyodalar” shu yaqindagi yerosti o‘tish joylaridan foydalanmay, yo‘l o‘rtasidagi to‘siqlarning ustidan yo ostidan o‘tib, harakatga xalal berayotgani haqidagi
lavhasini ko‘rib tug‘ilib qoldi.
Piyodalar - ya’ni, odamlar - nega yerosti o‘tish joylaridan foydalanmaydi, nega foydalanmasligi ham kerak, nega bunday o‘tish joylari befoyda va keraksizligini tushunib yetishi uchun Jizzax viloyati Yo‘l harakati xavfsizligi xizmati, uning ustidan turuvchi viloyat Ichki ishlar boshqarmasi, uning ustidan turuvchi respublika Ichki ishlar vazirligi ham, ehtimol, yer tagida ishlab ko‘rishi kerakdir? Yo foydasi yo‘q deysizmi? Ularga bunday istehzoli choralar ta’sir qilmaydi, deb o‘ylaysizmi? Ular baribir hozirgidek “qo‘shtirnoq ichidagi xavfsizlik xodimlari” bo‘lib qolaveradi, deb hisoblaysizmi?
Nahotki chora bo‘lmasa?
Yo‘l harakati xavfsizligi xizmati yo‘ldagi eng ustuvor taraf — piyodani “qo‘shtirnoq ichidagi piyoda” deb ta’riflab tursa — bu nima degan gap?! Avtoterrorchi ongli bunday “xavfsizlik xizmatlari va xizmatchilari” bilan O‘zbekiston yo‘llarini ikki dunyoda ham xavfsiz qilib bo‘lmaydi.
PS. Panjara tagidan o‘tgan o‘sha vatandosh —
qahramon! Avtoterrorchi ongli mas’ullarni aniqlab bergan qahramon.
