Muhammadyoqub Ismoil

*Falstart qonuni

Bu qonun Ismailov Muhammadyoqub tomonidan o'ylab topilgan ya'ni o'zim tomonimdan.

*Falstart - bu yengil atletikada, to'pponchadan o'q otilishidan oldin yugurib ketgan sportchining xatosi tufayli o'yindan chetlatilishidir.

Axir bu adolatdan emas-ku shundaymi?
Usain Bolt ismli sprinterni ko'pchiligimiz taniymiz. 2011-yili Jahon chempionatida hamma uni birinchi o'rinni egalashiga shubha qilmay turgan bir paytda, falstart amalga oshiradi va o'yinni kutilmaganda tark etib, 4 yil qilgan tayyorgarligi bir pul bo'ladi.

Hayotda ham shunday "Falstart"lar bo'lib turadi. "Axir meni hech qanday aybim yo'q", "men unday deyishni xohlamagandim", "unday bo'lishini bilmagandim"... "Nimaga meni hayotimda shunday adolatsizliklar va ko'ngilsizliklar sodir bo'lyabti?", degan savollar paydo bo'ladi.

Sportchilar ham bilmasdan falstart sodir qilishadi, axir bilganida 4 yillik mehnatlarini ko'kka sovurisharmidi?

Hayotiy falstartda ham siz xatoni bilmasdan sodir qilasiz, lekin sodir qilgan xatoyingiz uchun jazodan qutila olmaysiz. Biz bilmay qilgan xatolarimiz kechirilishini yoki jazodan omonda qolishni xohlaymiz, hayot esa hech qanday xatolarni kechirmaydi.

Agar siz jazoni o'tab turgan bo'lsangiz va o'zingizni "beayb", deb, xisoblasangiz, biling, bu shunchaki Falstart, qaytadan urinib ko'ring.

@muhammadyoqub_blog

O'zingizni usulingizni yarating

Ishda biror muammoga duch kelsak, darrov kitoblarga yoki treninglarga murojaat qilamiz.

Shu paytgacha turli treninglarda qatnashib, o'zimning holatimga aytarli bir yechim topa olmaganman.

Takliflarning barchasi umumiy bo'ladi va hech kim aynan sizning muammoyingizga mos yechimni taklif qilmaydi.

Shunday paytda muammo yana o'zingizga qolib ketadi. G'oya agar sizniki bo'lsa, bu hech narsaga yaramaydi, degani emas.

O'zingizga ishonning, sohangiz bo'yicha o'zingiz bir yechim yarata oling, agar faqat birovning go'yasini o'zlashtirish bilan cheklanayotgan bo'lsangiz, katta ehtimol bilan u sohada sizda mahorat yo'q.

Rassom bo'lsangiz, DaVinci yoki Picasso kabi rasm chizishingiz shartmas.

Futbolchi bo'lsangiz Messi yoki Ronalduga o'xshatib tepishingiz shartmas.

Bir sohada mutaxassis bo'lishni istasangiz, o'zingizni usulingiz bo'lsin va bu usul ko'p marotaba takrorlash orqali sayqallab boring.

@muhammadyoqub_blog

Har bir kitob o'qigan odam - muvaffaqiyatli bo'lmasligi mumkin, lekin har bir muvaffaqiyatli odam kitob o'qiydi.

Davomi...

Shu postlarni video shaklida chiqarishim to'g'risida menga takliflar bo'ladi, bu esa mening maqsadimga zid.

Maqsadim - mendagi yozuvchilik qobiliyatini shakllantirish.

Yozganlarimni ulashishdan maqsad - obunachilarda kitob o'qish madaniyatini shakllantirish.

Nima uchun kitob o'qish kerak?

Oldingi postda men kitob o'qishni nimaga qiyoslashim to'g'risida yozgandim. Hozir nima uchun kitob o'qish kerakligi to'g'risida yozmoqchiman.

Insonda ehtiyoj bo'lmasa, harakatga kelishiga men ishonmayman.

Maktabni bitkazdim, otamdan meros bo'lib qoladigan biznes yo'q, bir joyda ishlay desam, qo'limda hunarim yo'q, birgina chora - Universitetga kirish.

Majbur kitob o'qishni boshladim. Mendagi kitob o'qish ko'nikmasi ana shundan boshlandi.

Psixolog faoliyatini boshladim, endi o'zim tanlagan mutaxassislik bo'yicha yo'nalishim kerak bo'ldi. Men yana shu sohadagi kitoblarga murojaat qildim.

Oila qurishim kerak, mas'uliyatli vazifa, oila to'g'risida o'qishni boshladim. Oila qurdim, farzand ko'rishim kerak, farzand tarbiyasi haqidagi kitoblarni o'qishni boshladim.

Qaysidir kitobning menga erta yoki kech tavsiya qilishganida, menga u kitoblar qiziqarli va zarur bo'lmasdi.

Qaysidir bir kursga qatnashishga qurbim yetmaydi, yoki har safar shu sohaning mutaxassisidan maslahat olishning iloji yo'q. Kitoblar-chi?

"Menga qaysi kitobni tavsiya qila olasiz?", degan insonlarga, hozirgi turgan holatingiz to'g'risidagi kitoblar o'qishni maslahat beraman.

Hozir kimsiz va sizni kelajakda nimalar kutib turibti? Shu sohadagi kitoblarni o'qish siz uchun qiziqarli bo'ladi.

Insonning nimagadir ehtiyoji bo'lmasa, u qandaydir harakatga kelishiga men ishonmayman.

Agar sizda yaxshi mutaxassis bo'lishga ehtiyoj bo'lsa, majbur kitob o'qiysiz, yaxshi ota bo'lishga ehtiyojingiz bo'lsa, majbur kitob o'qiysiz, yaxshi tadbirkor, yaxshi talaba, yaxshi inson bo'lishga ehtiyojingiz bo'lsa, majbur kitob o'qiysiz.

@muhammadyoqub_blog

Kitob o'qish haqida

So'nggi paytlarda ijtimoiy tarmoqdalarda qator taniqli insonlar kitob o'qish haqida o'zlarining shaxsiy fikrlarini bildirishdi, men ham kitob o'qish haqida post yozib qoldirishni istadim.

Kitob o'qish - bu nima? Menimcha bu aqliy ozuqa. Ozuqa bo'lganda ham biz iste'mol qiladigan ozuqalar ichida non yoki go'shtga qiyoslasa bo'ladigani.

Odam aqliy ozuqani har xil shaklda olishi mumkin, masalan ustoz orqali, video ko'rish yoki sayohat qilish orqali, lekin ular ozuqaga qo'shimcha narsalar sifatida ishlatiladi.

Sizning ustozingiz ham yoki ijtimoiy tarmoqlarda aqliy salohiyatingizni oshirishga qaratilgan kontent egasi ham ilmni kitobdan oladi, hatto men ham.

Tepadagi yozayotgan narsalarimni men aynan qaysidir bir kitobdan olganim yo'q. Agarda men kitob o'qimaganimda bularni yoza olmasdim ham.

Kitobni o'qib eslab qola olmayotgan yoki hayotingizga tatbiq qila olmayotgan bo'lsangiz ham, taslim bo'lmang.

Bir hafta oldin nima ovqat yeganingiz esingizda qolmagan bo'lishi mumkin. Lekin u bugun sizning sog'lom bo'lib turganingiz uchun xizmat qilgan.

Kitobdan boshqa yerdan ham ilm olaman degan insonlar men uchun meva yoki bir shokolad yeb, qornini to'ydirgan insonga o'xshashadi.

Umuman ovqatlanmaydigan insonlarni nimaga qiyoslasa bo'larkin?

Odamlarning ko'pchiligi 25 yoshda o'ladi,
Lekin 75 yoshgacha ko'milmaydi.
(C) Benjamin Franklin

@muhammadyoqub_blog

Ha aytgancha, postlar bundan buyog'iga har payshanba va yakshanba kunlari chiqadi.

Qiynalib turgan bo'lsangiz, demak, nimanidir to'g'ri bajaryabsiz.

Pastagilar hammasi, Davronbek Turdiyev podcastidan iqtibos.

-"Miyani rivojlantirish uchun nima qilish kerak?"
-"Buning yo'li oddiy - miyani qiynash kerak".

"Insonlar menga ko'p savollar bilan murojaat qilishadi, "yordamingiz kerak!", "ingiliz tilini o'rganishda qiynalyabman, nima qilsam bo'ladi?", "ozishga qiynalyabman, nima qilsam bo'ladi?".

Xo'sh, nima muammo? "Shu o'qishga qiynalayabman".

Ey, birodar bir narsani tushun, til o'rganish - oson emas, agar qiynalayotgan bo'lsang, demak, nimanidir to'g'ri qilyabsan.

Tasavvur qiling, siz bitta "shortik"da turibsiz, oldingizdan muzdek daryo oqayabti va daryoning ichida siz istayotgan narsalar bor, xohlasangiz suvga sakrang, agar bir xil stabillikda yashashni xohlasangiz, sakrab o'tirmang, lekin suv sovuq va hech qachon iliq bo'lib qolmaydi, sizda ikkita tanlov bor yo suvga sakrash yoki kiymlaringizni kiyib qirg'oqdan nariroq ketish, bu yerda turgandan ma'no yo'q.

Odamlarga har doim yangi yildan nimadir boshlash "osonroq", dushanbadan boshlash "osonroq", damingni ol hech qachon oson bo'lmaydi, oson kun yo'q!

Umringizni oxirigacha dangasalikdan qiynalasiz, umringizni oxirigacha erta turish qiyin bo'ladi, kitob o'qish qiyin bo'ladi, umringizni oxirigacha dieta qilish qiyin bo'ladi, qaysidir kun osonlashib qolmaydi!

Mana shu narsani tan olgan kuningizdan boshlab balkim hayotingizda bir nima o'zgarib qolar".

Iqtibos tugadi.

@muhammadyoqub_blog

Biror narsani o'zgartirish - tarixini bilishdan boshlanadi

Biror korxonaning hozirgi holatini yaxshilash uchun qo'lingizda uning bir nechta ko'rsatkichlari bo'lishi kerak.

Misol uchun sof foydani oshirmoqchi bo'lsangiz, korxonaning barcha daromad va xarajatlarining tarixi kerak bo'ladi.

Shu ko'rsatkichlar sizda bo'lgandan keyingina kelajak uchun qandaydir maqsad qilishingiz o'rinli bo'ladi.

Aks holda oldingizga qo'ygan maqsad sizga zarar ham olib kelishi mumkin. Xodimlariga xato qo'yilgan KPI orqali ularning maoshi 50 million so'm bo'lib ketgan korxonani uchratganman.

Endi insonlarga keladigan bo'lsak, "vaqtim bekorga ketadi", "o'z oldimga maqsad qo'yishni istayman", "qanday kitob o'qisam bo'ladi?" va h.k.

Uning uchun siz hozirgi ko'rsatkichlaringizni bilishingiz kerak.

Sizda o'zi bir kunda qancha bo'sh vaqt bor? Qanchasini bekorchi narsalarga sarflaysiz va shu vaqtni nimalar bilan to'ldirsangiz bo'ladi?

Tarixni yaxshi bilmasdan kelajakka maqsad qo'yish yaxshi samara bermaydi, hatto sizning ziyoningizga ham xizmat qilishi mumkin.

@muhammadyoqub_blog

Hayotingizdagi hech bir narsani past sanamang.

- Blog yurityabsanmi?
- Ha.
- Xaxa, kim ham o'qiydi seni postlaringni...

O'tirib suv ichganimni ko'rishsa.
- Hoy-hoy, nima qilyabsan?
- Bu sunnat.
- Yaxshi, qancha qilsang ham Rasululloh(sollallohu alayhi vasallam)dek bo'lolmaysan...

- Ehson qilmoqchi edim.
- Qancha?
- 20ming.
- Uyalmaysanmi?..

STOP!!!

BIROR NIMA QILING.

Nima qilayotganingizni bilmasangiz ham, shunchaki ishlashda davom eting. Oqilona g'oyalar o'z-o'zidan kelishni boshlaydi.

Ko'pchiligimiz biror ishga qo'l urish uchun katta oqimdaki motivatsiyani yoki qachondir bir sohada mutaxassis bo'lishni kutib yashaymiz.

Misol uchun siz gitaradan yangi kursga yozildingiz...

Ustozingizdan kurs qancha muddat davom qilishini so'raysiz, u sizga bir yilda qoyilmaqom chalishni o'rganishingizni aytdi.

Endi sizga savol:
Gitarani bir yildan keyin qo'lingizga olasizmi yoki kursni birinchi kunidan o'zingizga gitara sotib olib, shug'ullanishni boshlaysizmi?

Biz Rasululloh (sollallohu alayhi vasallam)ga o'xshay o'lmasligimizni juda yaxshi bilamiz, ammo u Zotga o'xshashga intilishimiz qani?

Siz uchun arzimagan xayr-ehson boshqalar uchun qadrli bo'lishini unutmang.

Hayotingiz bir kunlik tanlovlardan iborat. Siz ham kunlardan iboratsiz. Vaqtni shunchaki kutish bilan sarflamang!

@muhammadyoqub_blog

Nafs tarbiyasi

Ota-onalar farzandlariga ko'pincha biror narsani ortig'i bilan berib qo'yish orqali ularning "ko'zini to'q" qilib qo'yishni xohlashadi.

Masalan farzandining "ko'zi och" bo'lmasligi uchun uyida Snickerslarni to'ldirib qo'ysa, go'yo u o'zini tiyishni o'rganib qoladi.

Agar uyda Snickerslar ortirg'i bilan bo'ladigan bo'lsa, bolaga faqat Snickersning qizig'i yo'q. Endi esa farzandingnizning nafsi kattaroq narsalarni tusashni boshlaydi.

Tarbiya qilish bolada Snickers yeyish ishtiyoqini saqlanib qolish orqali amalga oshadi.

Birinchi turdaki bolaga "Snickers olib beraman, mana bu ishni qilsang", deb, ko'ring-chi, "o'zingiz qila qoling", deb, gapni qisqa qiladi.

Nafsni tarbiyasi - u istagan narsani berish orqali emas, u istagan narsani ozaytirish orqali yuzaga keladi.

Bu post shokolad to'g'risida emas va farzandingizning tarbiyasi uchungina ham emas, bu post siz uchun ham asqotadi, bolalar har xil bo'lishi mumkin, unga shokolad yoqish yoki yoqmasligi ham mumkin.

Umuman olganda "siz bolangizning (o'zingizning) barcha xohishlarini qondirish orqali o'zingizga va farzandingizga kerakli natijaga erisha olmaysiz", demoqchiman.

@muhammadyoqub_blog

Yana shu maqsad qo'yish haqida

Nima uchun maqsad qo'yish kerak?

O'tgan yili o'z oldimga har hafta bitta post chiqaraman, deb maqsad qilgandim. (ya'ni ~52ta)

O'tgan yilning o'zida 120dan ziyod post yozibman.

Boshida yozishga juda qiynalardim, har hafta yozishni boshlaganimdan keyin, o'zimga yoqa boshladi va haftasiga 2ta postdan chiqara boshladim.

Hech qanday maqsadsiz esa hatto post yozish menga yoqish-yoqmasligini ham bila olmagan bo'lardim.

Bu yozayotgan postlarim kimgadir foydasi tegayabtimi, yo'qmi bunisini bilmadim, lekin mendagi yozuvchilik qobiliyati ancha rivojlanib boryabti. (Asl maqsadim ham shu edi)

Maqsad qo'ying, uni amalga oshirishga harakat qiling, hech bo'lmaganda, shu narsa sizga to'g'ri kelish-kelmasligini bilib olasiz.

@muhammadyoqub_blog

Imtihon (Mini hikoya)

Kim Universitetga kirish uchun tayyorlangan bo'lsa, yaxshi biladi.

Universitetga topshirishimga bir yil qolganda hamma narsani cheklashimga to'g'ri kelgan, ko'chaga chiqishni, do'stlarim bilan vaqt o'tkazish, qarindoshlarga borish, to'ylar, ziyofatlar va har qanday yig'ilishlarni tark qilganman.

Agar qayergadir borgan taqdirimda ham o'yin-kulgi ko'nglimga sig'magan va uyga ketishga shoshilib turardim, sababi imtihonga tayyorlanishim kerak edi.

Oldiniga oyma-oy hisoblardim, 11 oyim qoldi, 8 oyim qoldi, imtihonga yaqin qolganda kunlar bilan hisoblashni boshladim, 60 kun qoldi, 30 kun, 3 kun va h.k.

Nima deb o'ylaysiz? Men har bir oy yakunlangandan keyin xursand bo'lib, uni bayram qilib kutib olganmanmi? Yo'q, albatta.

Har oy yakunida men kalendarga qarab, vaqtim oz qolganini ko'rib yuragim orqaga tortardi.

Uxlash, soch oldirish hatto cho'milishga ham vaqtimni qizg'anardim.

Bu imtihonga tayyorlanib yurganlarning xulq-atvori edi.

Imtihonga tayyorlanmay yurganlar uchun esa har kuni bayram, ular ko'ngillari tusagan ishni qiladilar, imtihonga topshirib ko'rishadi, kirsa - baxti, kirmasa baribir hech nima yo'qotmaydi, go'yo.

Bu - "imtihonga tayyorlanish" sizga yana nimanidir eslatib yubormadimi?

40 yoshga kirdik, xursand bo'lib, butun xalqni chaqirib nishonlaymiz. Yangi yil kirib keldi, hamma xursand, "o'limga yana bir yilga yaqinlashdingiz, tabriklayman", deb, ko'ring. (Tavsiya bermayman)

Alloh taolo Qur’oni Karimda "Vaqt bilan qasam, insonlar ziyondadirlar"(Asr, 1,2-oyat), deb, tursa, vaqt o'tyabti-ki, sizlar ziyondasizlar, desa, biz esa battar bir-birimizni ziyondaligimiz bilan tabriklaymiz. Qoyil-a!

Imtihonni hali hech kim bekor qilgani yo'q, o'z joyida turibti. Shunchaki unga kimdir tayyorgarlik ko'rayabti, kimningdir esa har kuni bayram.

Men sizning "Yangi yilni nishonlasa bo'ladimi yoki yo'qmi?", degan, tuganmas savolingizga javob bera olmayman, tepadagi misolda aql egalari uchun oyat va alomatlar bor.

Kelayotgan yil har birimiz uchun xayr va barakali yil bo'lsin. Hammaga rahmat.

@muhammadyoqub_blog

Oq-qora rang

Ko'pincha biz o'zlarimizni faqat ikkita javobdan birini tanlashga majburlaymiz.

Ya'ni kimdir bilan yaxshi munosabatda bo'lish yoki unga umuman ishonmaslik.

Farzandining barcha narsasini o'z zimmamizga olish yoki hammasini o'ziga tashlab qo'yish.

Hayotimiz faqat mumkin va mumkin bo'lmagan narsalardan iborat emas.

"Meni o'z holimga qo'ying", desa, "bo'ldi, sen bilan gaplashmayman", deyishadi. Bu degani - "meni o'z muammolarimni o'zim hal qilishni istayman", degani.

Farzandiga shifokor bo'lishni taklif qilashadi, agarda shifokor bo'lishni xohlamasa, nima "aravakash bo'lmoqchimisan", deyishadi.

Balkim odamlarga ochiq savol berishni o'rganarmiz?
Misol uchun "kim bo'lmoqchisan?".

O'zingizni va atrofingizdagilarni "тупикка" tiqishni bas qiling!

@muhammadyoqub_blog

Oila qurish

Ko'p yosh qizlardan eshitganman, yoshlari 18 atrofi yoki undan yuqori, "men hali turmushga chiqmayman", yoki "turmushga chiqib nima qilaman?", yoki "men hech qachon erga tegmayman".

Hayronman, xo'p, oila qurish har kimning o'z xohishi.

Lekin so'nggi vaqtlarda turmushga chiqishga qarshi targ'iblar bo'lib qolmadimikan?

"Turmushga chiqishdan oldin mazza qilib qol", yoki "hecham shoshilma, hali ulgurasan".

Ayol kishining umrida topgan eng yaxshi narsasi - bu yaxshi turmush o'rtog'idir.

Turmushga chiqishni xohlash va Allohdan eng yaxshi yigitni kerak bo'lsa sifatlari bilan so'rash va bundan uyalmaslik va shunga qarab harakat qilish kerak.

Oila qurishga tayyorgarlik toydan bir oy oldin sodir bo'ladigan narsa emas. Menimcha qiz bolani tug'ilganidan boshlab, oila qurishga tayyorlab borgan afzal.

Oldimga turmushga chiqa olmay qolgan qizlar va eri bilan ajrashganlar kelib yig'lab o'tirishgan, "o'sha paytda borsam bo'lar ekan", "ajrashmasam bo'lar ekan", deb.

Baxtli oila qura olganlar baxtli hayot ham qura oladi.

@muhammadyoqub_blog

То, что нас не убивает, делает нас сильнее.

Ya'ni qayerda biz oxirgi kuchimizgacha harakat qilib kurashgan va omon qolgan bo'lsak, ana shu yerda biz kuchli bo'lamiz.

Har xil ish grafigi bo'yicha ishlab ko'rgan inson sifatida bir nimani aytishim mumkin.

Erkin grafikda ishlagan paytlarim menga yana nimadir yetishmas edi, ishda o'zimni toliqqandek his qilardim.

Hozir esa grafik zich yil yakuni shaxsiy ishlarim bilan uxlashga soat 12 va undan keyin ham yotishim mumkin.

Men bir narsani ishonch bilan ayta olaman siz charchaganingiz qadar kuchga kirasiz. Tunda toliqqaningiz qadar tongda shuncha quvvatga ega bo'lasiz.

((Rahbarlarga yoqadigan gap bo'ldi.

P.s: Bu post dam olmaslik to'g'risida emas, "tetiklikni oshirish uchun" dam olishlar sonini ko'paytirishmas, aksincha harakatni ko'paytirish kerakligi to'g'risida.

@muhammadyoqub_blog

26 yosh bilan meni tabriklab o'tirmang

Sababi shu vaqt mobaynida aytarli biror bir natijaga erishganimcha yo'q.

Shunday bo'lsa ham o'rgangan narsalarim bor.

O'rgangan narsalarimni 3 qisimga ajratadigan bo'lsak: men oxirat uchun, dunyo uchun va o'z kasbim uchun nima o'rgandim.

Oxirat uchun o'rgangan narsam. Din - bu xulqimiz ekan.

Bir ulamo umrining oxirida aytgan ekan, "men 15 yil ilm oldim, 40 yil xulqimni tuzatdim", deb.

"Qiyomatda mo'minning tarozisini eng og'ir bosadigan narsa - bu husni xulqdir". Imom Termiziy rivoyati

"Albatta, mo'min kishi o'zining go'zal xulqi bilan kunduzi ro'zador, kechasi (ibodatda) bedor kishilar darajasiga yetadi". Imom Abu Dovud rivoyati

Demak, farz ibodatlaridan keyingi o'rinda turadigan narsa - bu go'zal xulq ekan va men xulqimni tuzatish kerakligini o'rgandim.


Bu dunyo uchun nima o'rgandim? Ilm olish kerakligini, savol berish orqali to'g'ri javoblarni topishni o'rgandim.

Inson bilim olgani sari bilmaydigan narsalari ko'pligini bilib boradi, agar ilm olmasa, "u hamma narsani biladi".

"Bilmayman", deb, ayta olishim uchun ham ilm olishim kerakligini o'rgandim.


Kasbim uchun nima o'rgandim?
Bir ustozga shogird tushish kerakligini.

Vaqtni 10 yil orqaga qaytarib bo'lganida, to'g'ri bir ustozning oldiga shogird bo'lib borgan bo'lardim.

Agar ustozingiz taqvodor va ilmli bo'lsa, dunyo va oxiratingizni obod qiladi.

Xullas, oxiratingnizni obod qilay desangiz, xulqingizni tuzating, dunyoni obod qilay desangiz, ilm oling, kasbingizdan baraka topaman desangiz, ustoz tuting.

@muhammadyoqub_blog

Davomi...

Erkalatish bilan mehribonlik va qattiqo'llik bilan talabchanlik o'rtasidagi farqlarni ajratib oling.

Farzandingiz sizdagi mehrni va qilinmay qolgan ishi uchun unga bo'ladigan bosimingizni his qilib tursin.

Biror bir biznes boshqarsangiz xodimlaringiz bilan yaxshi munosabat o'rnata olganingiz bir masala bo'lsa, talabchanlikni saqlab qolishingiz esa keyingi masala.

Agar siz biror narsa talab qila olish huquqini boy bergan bo'lsangiz, biling hamma narsani boy beribsiz.

Har doim talab qo'ya olish huquqini o'zingizda saqlab qoling, farzandlaringiz bo'ladimi, xodimingizmi hattoki o'zingizgami talab qo'ya oling.

Bilaman, bu yoqimsiz holat, lekin talab qila olmaslikning oqibatlari bundan-da yoqimsiz bo'lishi mumkin.

@muhammadyoqub_blog