Mehrob.uz

БИР ҲАФТАЛИК ЁМҒИР

Жума куни Расулуллоҳ соллаллоҳу алайҳи васаллам хутба қилиб турганларида бир одам келиб: «Ёмғир ёғмай қўйди. Роббингизга дуо қилиб ёмғир сўранг», деди. Пайғамбар алайҳиссалом дуо қилдилар.
Осмонга қараганимизда ҳеч қандай булут йўқ эди. Бир пасда булутлар келиб, бир-бирига қўшилиб, шиддатли ёмғир ёға бошлади. Мадинадаги ҳамма ариқда сув оқди. Ёмғир келаси жумагача ёғиб турди. Пайғамбар алайҳиссалом кейинги сафар хутба қилаётган чоғлари ўша одам (ё бошқаси): «Сувга ғарқ бўлай деяпмиз. Роббингизга дуо қилинг, ёмғирни тўхтатсин», деди.
Шунда Расулуллоҳ соллаллоҳу алайҳи васаллам: «Аллоҳим, атрофимизга ёғдиргин, устимизга эмас», деб икки-уч бор айтдилар. Булутлар Мадинадан ўнг ва чап тарафларга тарқалиб, ёмғир тўхтади. Аллоҳ таоло Ўз Пайғамбарининг мўъжизаси ва дуоси ижобатини одамларга кўрсатиб қўйди.

“Расулуллоҳ соллаллоҳу алайҳи васалламнинг ҳаётларидан 101 қисса” китобидан.
@mehrob_uz

Иброҳим ибн Уяйнадан: «Қайси инсоннинг пушаймонлиги кўп чўзилади? – дея сўралди. У айтди: – Яхшиликни билмайдиган кимсага яхшилик қилувчи кишининг пушаймонлиги бу дунёда энг узоқ чўзиладиган пушаймонликдир. Аммо Охиратда энг кўп пушаймон бўладиган инсон – сусткаш, илмига амал қилмайдиган олимдир».

Изоҳ. Инсон барча махлуқот каби меҳрга муҳтож жонзот. У умри давомида бу эҳтиёжни қондиришга сабаблар излайди. Тўғрироғи, шундай сабабларни ўзи қийналиб, риёзат чекиб барпо қилади, токи меҳрга ташна қалби истагига етсин. Аммо умрлар сарфлаб чекилган меҳнат, риёзатлар натижаси гоҳида вафо, гоҳида жафо бўлиб эгасига қайтади. Бировга қилинган яхшиликнинг бу дунёда ҳар доим ҳам қайтмаслигига тайёр бўлиш ихлоси мукаммал инсонларга хос табиат. Бандаликни бўйнига олган ҳар қандай киши «менинг ихлосим мукаммал» деган даъводан қочади.
Тасаввур қилинг: куннинг тиғида йўл юриб, йўл юрсангиз ҳам мўл юриб, манзил томон шошяпсиз, чанқоқдан тилингиз қуриб, лабингиз ёрилиб кетган, атрофда на соя-салқин жой, на ичишга сув бор. Шунда шу ўртада бир пайтлар ўзингиз қазган қудуқ борлиги эсингизга тушди. Қудуқни излаб топдингиз, суви тўлиб-тошган ётган қудуқ сиз унга яқинлашиб, энди сувига лабингиз тегай деганида суви пастлаб кетса, қудуқнинг тубидан сувни чиқариб олишга сизда на бир арқон, на бир челак бўлмаса, қандай ҳолга тушасиз, жуда аянч ҳолат?! Аянчлиги шу даражадаки, яхшиликни билмайдиган кимсага яхшилик қилувчи кишининг пушаймонлиги қадар аччиқ, ични тирнайдиган, асорати узоқ чўзиладиган аянчлик!
Аслида бу аччиқ ва узун пушаймонга яхшилик кўрган кишидан кўра ҳам яхшилик қилувчи кўпроқ сабабчидир.

“Унвонул баён”дан.
@mehrob_uz