Ogʻrimagan boshimni ogʻritib nima qilaman? Bugun qiziq bir holat boʻldi. Xodim boshqa bir hamkasbining ishida biroz kamchiligini aytib, fikrlarini asoslab berdi. Lekin buni oʻsha xodimga yoki boshliqqa aytishga esa harakat ham qilmadi. Shunda uni bu ishga majburlay boshladim.
- E u kuchli mutaxassis, hozir nimadir desam mendan xafa boʻladi.
Aynan mana shu yuzxotirlik, oʻzaro hurmat yuzasidan andisha qilish holati oʻzbek bizneslarida juda koʻp kuzatiladi. Kimnidir xatosini yoki aybini aytsam, meni yomon koʻrib qoladi, nima qilaman ogʻrimagan boshimni ogʻritib qabilida indamaslikni tanlashadi.
Bu holatda siz oʻz halovatingiz, oʻsha xodim bilan munosabatingizni oʻylagan holda ishga, yoki biznesga BILVOSITA kichik zarar berib qoʻyishingiz mumkin. Hech qachon kimgadir yomon koʻrinib qolmaslik uchun, tanqiddan chekinish, yoki oʻz fikrlarni bildirmaslik holatiga oʻtish kerak emas.
Adekvat inson, professional xodim oʻz ishi boʻyicha fikr-mulohaza, oʻrinli tanqidlarni toʻgʻri qabul qiladi.
Fikr aytilgach, boshida “Rad qilish” bosqichiga oʻtadi, undan keyin “Fikr qilish, tahlil” bosqichi va eng soʻnggida esa “Qabul qilish”ga yetib keladi.
Sizning hozirgi “mening fikrim kimga ham qiziq”, “oʻzimga dushman orttirib olmay” degan oʻylaringizdan jamoa koʻproq zarar koʻrishi aniq!
Men doimo umumiy guruhlarda har qanday umumiy holat boʻyicha fikrlarimni ochiqcha bildirganman, boshliq meni “aqlsiz, har ishga burnini suqadigan” deb oʻylashi, hamkasblarim “boshliqlar oldida oʻzini koʻrsatmoqchi” deb oʻylashlari mumkinligiga e’tibor bermasdim.
Jamoaviy muhit, fikr erkinligi mavjud boʻlishi muhim men uchun.
Oʻzimni ishimni qilib, oyligimni olib ketaversam boʻldi deb fikrlash - jamoaga, biznesga sezilar-sezilmas zarar keltiradi.
Shuning uchun fikringiz bormi, uni uyalmasdan bildirishga harakat qiling. Zero bir ishni qilayotgan odamga vaqt oʻtishi bilan ishdagi kamchiliklarni payqamasligi, chetdan oʻz ishiga baho bera olmasligi mumkin.
Albatta, oʻzingiz ham fikrlarga ochiq boʻling!
@marcatolog