RASMIY XABAR

Xabaringiz bor, “Ma’naviy ekspertiza” manfaatdor vazirlik, idora va tashkilotlarning qo‘shma qarori doirasida amalga oshirilishi haqida ma’lum qilingan edi. Endilikda “Ma’naviy ekspertiza” Respublika Ma’naviyat va ma’rifat markazining asosiy vazifalari doirasida, qo‘shma qaror bilan tartibga solinadigan faoliyat turi emas, keng jamoatchilik bilan hamkorlikdagi loyiha sifatida tizimli ravishda olib boriladi. Loyiha ziyolilar, olimlar, huquqshunoslar, ijtimoiy tarmoq foydalanuvchilari, ommaviy axborot vositalari, faol fuqarolarimizning fikr-mulohazalari, e’tiroz va takliflari asosida yanada takomillashtiriladi.

O‘z navbatida, Ekspertlar guruhi qayta shakllantiriladi va har bir ekspertiza xulosasi keng jamoatchilik e’tiboriga taqdim etib boriladi. Shu bilan birga, loyiha doirasida barcha yurtdoshlarimizning bugungi ma’naviy-ma’rifiy muhit haqidagi fikr-mulohazalari o‘rganib boriladi hamda sosiologik so‘rovlar shaklida tadqiq etiladi.

Aziz ziyolilar, qadrli ota-onalar, jamoatchilik faollari, bugungi global o‘zgarishlar va axborot tezkorligida yosh avlodni umumbashariy g‘oyalar bilan bir qatorda, milliy g‘urur va qadriyatlarga hurmat ruhida tarbiyalash har birimizdan katta mas’uliyat talab qiladi. Zero, ma’naviyat iqtisodiyot kabi mamlakat rivojining asosiy poydevori hisoblanadi. Shunday ekan, barcha hamyurtlarimizdan uyg‘oq vijdon, o‘tkir fikr, teran mulohaza, qat’iy tahlil asosida mazkur loyiha faoliyatiga ko‘maklashishlarini so‘rab qolamiz!

Rasmiy sahifalarimiz👇
Telegram | Facebook | YouTube | Instagram