Kopirayter Ezo

Soʻzimni tashakkurdan boshlashim shart

Chunki bayramning ilk hadyasini Asl Baraka brendidan qabul qildim.

Oʻzi ularni Inara Asanova ishga oʻtganidan beri kuzataman. Doʻkonga kirsam ham, azbaroyi qoʻllab-quvvatlash uchun, soʻng boshqalaridagi yoqimsiz hid boʻlmaganidan turdoshlari ichidan aynan ularning mahsulotini tanlayman.

Kecha esa ulardan oʻzgacha qutlov keldi.

Eng avval diqqatim qadoqqa tushdi: oʻzbek ayollari!

Yoqimli yondashuv 🫰🏻

Qoʻl uchida qaralmagan harakat.

Menga yoqdi. Bolalarim esa talashib qolishdi 😄

Rahmat, Asl Baraka.

— Yaxshiyam ering 1 dona gul beribdi, shuni maqtanaverasanmi endi?!

— Sizgachi? Sizda 2 tami? Sizga nechta berdi? 2 tami sizda?

PS. Shu trend miyasini qatigʻini chiqarganlar bormi yana? 🤣

Bugun kimlardir xursand boʻladi 🌷

🤦‍♀ Kurs boshlangach afsuslandim

Kursga yozildim, darslar boshlandi. Ilk darslardayoq pushaymonlik hissiga koʻmildim. “Eh” dedim. Sababini oxirida aytaman. Siz ham afsuslanmaslik uchun oxirigacha oʻqisangiz arziydi.🙂

Ustozning kanaliga qanday qoʻshilib qolganimni eslolmayman. Reklama orqalimi yoki ularning shogirdlaridan birining kanalida koʻrib qolibmi — xotiramda yoʻq. Lekin kim sabab boʻlgan boʻlsa ham baraka topsin.

Ikki yil, balki undan koʻproq vaqt @kopirayterkundaligi ni kuzatdim. Beminnat berilayotgan bilimlardan ham koʻproq postlardagi samimiylik ufurib turgan soʻzlar va izohlarda mafiyamizdagi (nihoyat, men ham u yerda borman😌) ustozning oʻquvchilari qoldiradigan izohlarni oʻqib chiqish yoqar edi.

Biz oʻqigan potokga qabul ochilganida koʻp oʻylamadim. Hali muqim ish joyim, stabil maoshim yoʻq edi. Kurs toʻlovi oʻylantirmadi desam yolgʻon boʻladi. Lekin ich-ichimdan nimadir tavakkal qilishga kuch berdi. Aynan jonli darsda qatnashish istagi ham meni tinch qoʻymadi. Ustozning adminiga yozib batafsil maʼlumot soʻradim. 7-yanvarda yozgan ekanman. Soʻng mablagʻ masalasini oʻylab boshqa yozmadim. 14-yanvar kuni muntazam ishga joylashdim. Kurs boshlanishiga bir kun qolganida kursga yozildim.

Birpasda bir oydan ortiq vaqt oʻtib ketibdi. Inson oʻzida oʻzgarishlar hosil qilishi uchun 21 kundan 40 kungacha vaqt ketadi deyishadi. Lekin biz kursdoshlarimiz bilan har darsda oʻzgarib bordik desam adashmayman. Chunki darsda faqat bilim emas, ustozning hayotiy tajribasi haqida ham eshitardik, qoʻshimcha maʼlumotlarga ega boʻlardik. Kamiga vazifalarimizni ustoz qayta-qayta tekshirib berardi, biz bir necha marta qayta topshirardik. Bu bizni oʻz ustida koʻproq ishlaydigan va buning ahamiyatini yanada chuqur anglagan odamga aylantirdi.

Kursda berilgan nazariy va amaliy bilimlar haqida yozsam doston boʻlib ketadi. Oʻzi avvaldan uzun matnlarga usta edim. Xayriyat, ustoz matnlarimga qayta-qayta fidbek berib meni oz va soz yozishga oʻrgatdi (Endi bu matnni aybga buyurmaysiz-da. Kurs taassurotlarini qisqa ifodalay olmayman🤭). Qoʻldan kelgancha muxtasar yozadigan boʻlsam:

— men yangi nazariy va amaliy bilimlardan tashqari oʻzimda foydali odatlarni shakllantirdim, kursdoshlarim va ustoz sababli ayrim xato-kamchiliklarimni tuzatdim;
— namunaga berilgan va kursdoshlarim yozgan matnlardan ham ancha xulosalarga ega boʻldim, yangi gʻoyalar tugʻildi;
— ustozning men havas qiladigan davrasi — mafiyaga aʼzo boʻldim. U yerda nafaqat sohamiz, balki hayotiy masalalarda ham beminnat qoʻllab-quvvatlaydigan samimiy insonlarni topdim;
— darslar davomida ustozning energiyasini his qildim, yanada rivojlanish uchun oʻzimda ragʻbat sezdim, yangi maqsadlar qoʻydim;
— men doim qiyin sanagan va orqaga surib yurgan ishni qildim: blogim uchun video tayyorladim va bu orqali qoʻrquvimni yenga oldim.

Bular hammasi emas, faqat asosiylari. Endi nega afsuslanganimga kelsak. Men kursning avvalgi potoklarida tavakkal qila olmaganim va oʻzimni rivojlantirishga, zamon talabi boʻlgan ilmni ertaroq egallashga harakat qilmaganim uchun afsuslandim. Koʻnglim chopib, aqlim toʻgʻri deya tasdiqlab tursa ham har xil qoʻrquvlarga yengilib choʻzib kelganim uchun pushaymon qildim.

Umid qilamanki, eng xayrli va kerakli paytda kursda oʻqidim. Berilgan bilimlarni oqlash va zoʻr natijalar bilan ustozimizning oldida yuzimiz yorugʻ boʻlishi, ularni oʻzimizdan mamnun va rozi qilish nasib etsin.

Kursdan toʻla-toʻkis rozilik va minnatdorlik ila Gulnur.🤗