O'zbekiston kasaba uyushmalari Federatsiyasining Farg'ona viloyat Kengashi | Rasmiy kanal

Jamoa ishonchini oqlash katta mas’uliyat

Uchko‘prik tuman tibbiyot birlashmasi boshlang‘ich kasaba uyushma tashkilotining 2023-2025 yillar uchun tuzilgan jamoa shartnomasining 2024 yilda bajarilishi va 2020-2025 yillar mobaynida amalga oshirilgan ishlar tahlil qilindi.

Kun tartibidagi masalalar bo‘yicha Ish beruvchi Shaxbozjon Rahmonov, Uchko‘prik tuman tibbiyot birlashmasi boshlang‘ich kasaba uyushma qo‘mitasi raisi Moxidil Isaqova va kasaba uyushma qo‘mitasi taftish komissiyasi raisi Zokirjon Mamajonovning hisobot ma’ruzalari tinglandi.

O‘qib eshittirilgan hisobotlar tinglangach, delegatlar jamoa shartnomasining 2024 yildagi ijrosini qoniqarli deb baholadilar.

Shu kuni Uchko‘prik tuman tibbiyot birlashmasi boshlang‘ich kasaba uyushma tashkilotining hisobot-saylov konferensiyasi ham bo‘lib o‘tdi.

Unda dastavval Uchko‘prik tuman tibbiyot birlashmasi boshlang‘ich kasaba uyushma qo‘mitasining 2020-2025 yillar davomidag faoliyati bo‘yicha axborot berildi.

Axborotda qayd etilishicha, 574 nafar xodimga moddiy yordam ko‘rsatilgani, 387 nafar xodim yo‘llanmalar asosida turli sihatgohlarda dam olib salomatligini mustahkamlagani, xodimlarning 127 nafar farzandlari yozgi sog‘lomlashtirish oromgohlarda maroqli dam olgani, “Moddiy rag‘batlantirish va rivojlantirish jamg‘armasi” hisobidan kasaba uyushma qo‘mitasining taqdimnomasiga asosan 584 nafar xodim moddiy rag‘batlantirilgani, kam ta’minlangan oila vakillarining 385 nafar farzandlariga maktab o‘quv qurollari olib berilgani, ming nafardan ortiq xodimlar respublikamiz bo‘ylab sayohatlarga olib borilgani, muntazam ravishda xodimlar o‘rtasida sport musobaqalari o‘tkazilib kelinayotgani, jamoa shartnomasi orqali har bir ishchi-xodimning ijtimoiy-iqtisodiy manfaatlari himoya etib kelinayotganligini aytib o‘tildi.

Barcha delegatlar kasaba uyushma qo‘mitasining 5 yillik faoliyatini qoniqarli deb baholadilar. Shuningdek, kasaba uyushma tashkiloti taftish komissiyasining hisobotini ham tasdiqladilar.
Hisobot-saylov konferensiyasida muqobillik asosida yashirin ovoz berish yo‘li bilan nomzodlar orasidan Uchko‘prik tuman tibbiyot birlashmasi boshlang‘ich kasaba uyushma qo‘mitasi raisligiga Moxidil Isaqova qayta saylandi.

Shuningdek, konferensiyada Uchko‘prik tuman tibbiyot birlashmasi kasaba uyushma qo‘mitasi tarkibi, kasaba uyushma tashkiloti taftish komissiyasi tarkibi, kasaba uyushma tashkiloti taftish komissiyasi raisi hamda Sog‘liqni saqlash xodimlari kasaba uyushmasi Farg‘ona viloyat Kengashi hisobot-saylov konferensiyasiga delegat saylandi.

Konferensiyada Sog‘liqni saqlash xodimlari kasaba uyushmasi respublika Kengashi Tashkiliy ishlar bo‘yicha bosh mutaxassisi Diloromxon Toshmatova, Sog‘liqni saqlash xodimlari kasaba uyushmasi Farg‘ona viloyat Kengashi raisi Shohidaxon Karimova, Uchko‘prik tuman tibbiyot birlashmasi bosh vrachi Shaxbozjon Rahmonov, va 35 nafar delegatlar ishtirok etdilar.

Shuningdek, konferensiya ishtirokchilariga bu yil kasaba uyushmalar harakatiga 120 yil to‘lishi, uning tarixi, bugungi kundagi o‘rni haqida ma’lumotlar berildi.

O‘zbekiston kasaba uyushmalari Federatsiyasining Farg‘ona viloyati Kengashi

Facebook | Telegram | Sayt

BESH YILLIK FAOLIYAT SARHISOB QILINDI

Kasaba uyushmalari xizmati tashkil etilgan barcha mehnat jamoalarida bo‘lgani kabi Farg‘ona viloyati Favqulodda vaziyatlar boshqarmasi boshlang‘ich kasaba uyushma tashkilotining hisobot-saylov yig‘ilishi bo‘lib o‘tdi.

Unda kasaba uyushma qo‘mitasining 2020 yil martidan 2025 yil martigacha bo‘lgan davrda ishchi-xodimlarning huquq va manfaatlarini himoya qilish, ularni moddiy va ma’naviy jihatdan qo‘llab-quvvatlash, ishchi-xodimlarni va ularning farzandlarini sog‘lomlashtirish, qo‘yingki, barcha jabhadagi olib borgan ishi sarhisob qilindi.

Qayd etish joizki, bugungi kunda mazkur tizimda 800 nafar ishchi-xodim samarali faoliyat yuritib kelmoqda. Hisobot davrida 150 nafar xodimlarga kasaba uyushmasi hisobidan moddiy yordamlar berilgan, 137 nafar xodimlar kasaba uyushmasi tomonidan imtiyozli ravishda o‘z salomatliklarini tiklashlari uchun sanatoriylarga yuborilgan. Ishchi-xodimlarning 171 nafar farzandlari kasaba uyushmalari tizimidagi yozgi oromgohlarda maroqli dam olishgan. 300 nafardan ziyod xodimlar Respublikamizning diqqatga sazovor va tarixiy maskanlariga sayoxatga yuborilgan.

Bundan tashqari, xodimlar o‘rtasida milliy g‘oya targ‘iboti va ma’naviy-ma’rifiy ishlar samaradorligini oshirish bo‘yicha “Ma’naviyat soatlari”, “Sport – salomatlik garovi”, “Sog‘lom oila” shiorlari ostida sport musobaqalari hamda sportning stol tennisi, voleybol, shaxmat-shashka, badminton turlari bo‘yicha musobaqalar, shuningdek, milliy bayramlar va muhim sanalar munosabati bilan turli tadbirlar belgilangan reja asosida o‘tkazib kelingan.

Hisobot-saylov yig‘ilishida muzokaraga chiqqanlar Kasaba uyushma qo‘mitasining o‘tkan yillarda olib borgan faoliyatini qoniqarli deb topdilar. Shuningdek, kasaba uyushmasi qo‘mitasi raisligiga nomzodlar ko‘rsatildi. Ochiq ovoz berish yo‘li orqali kasaba uyushma qo‘mitasi raisligiga Komiljon Fozilov qayta saylandi. Shuningdek, kasaba uyushma qo‘mitasi a’zolari hamda O‘zbekiston davlat muassasalari va jamoat xizmati xodimlari kasaba uyushmasi Farg‘ona viloyati Kengashi konferensiyasiga delegat saylandi.

Shu kuni 2023-2025 yillar uchun tuzilgan Jamoa shartnomasining 2024 yilda bajarilishi yakunlari hamda 2025 yil uchun qo‘shimcha va o‘zgartirishlar kiritish bo‘yicha mehnat jamoasining umumiy yig‘ilishi ham bo‘lib o‘tdi.

O‘tkazilgan yig‘ilishlarda O‘zbekiston davlat muassasalari va jamoat xizmati xodimlari kasaba uyushmasi Farg‘ona viloyati Kengashi raisi R.Rahimov ishtirok etdi.

Tadbirlar yakunida bu yil kasaba uyushmalarining 120 yilligi keng nishonlanishi munosabati bilan yig‘ilganlarga ma’lumot berildi hamda bir guruh faollarga esdalik sovg‘alari topshirildi.

O‘zbekiston kasaba uyushmalari Federatsiyasining Farg‘ona viloyati Kengashi

Facebook | Telegram | Sayt