Jomboy tongi gazetasi

Javohir 2010-2021-yillarda tumanimizdagi 56-ixtisoslashtirilgan davlat umumta’lim maktabida ta’lim olgan. Maktabni a’lo baholarga bitirib, “Oltin medal” bilan taqdirlangan.

Iqtidorli o‘quvchimiz xorijiy tillarni o‘rganishga ham qiziqadi. Intilishlari sabab ingiliz tilidan 6 ballik IELTS sertifikatini qo‘lga kiritgan. Shu orqali muddatidan avval xorijning nufuzli oliy ta’lim muassasalari talabasi bo‘lish imkoniyatini qo‘lga kiritgan.

Ammo, u o‘z bilimini yana bir bor sinab ko‘rishga ahd qiladi. Davlat imyohonlarida eng yuqori ball to‘plab, Jahon iqtisodiyoti va diplomatiya universiteti talabasi bo‘ladi.

– Iqtisodchilar oilasida ulg‘ayganman, – deydi J.Imomov. – Bu kelajakda kasb tanlashimga turtki bo‘lgan. Bobom Akbar Imomov esa tibbiyot fanlari doktori, professor. Motivatsiyani asosan ulardan olaman. Maqsadlarimdan biri “London iqtisodiyot va siyosiy fanlar maktabi”da magistratura bosqichida tahsil olish va Oʻzbekistonga qaytib, olgan bilimlarimni Vatanimiz rivoji yoʻlida safarbar etish. Shuningdek, mamlakatimizning xorijdagi diplomatik vakolatxonalarida ishlashni ham orzu qilaman. Qolaversa, iqtisodiyot fanlari doktori ilmiy darajasiga erishish niyatlarim bor.

Javohir oʻz orzu va maqsadlari yoʻlida ildam qadam bosmoqda. Bugunga qadar Qozogʻiston va Germaniya davlatlarida boʻlib, diplomatik aloqalar, tashqi siyosat borasida bilimlarini oshirib keldi. Universitet talabalari orasida ham oʻzining munosib oʻrnini topa olgan Javohir “Tashqi ishlar vazirligi stipendiyasi”ga sazovor bo‘lgan, “Yil talabasi” respublika ko‘rik tanlovining 2022- va 2023-yilgi g‘olibi hamdir. Bundan tashqari, oliy ta’lim muassasalari talabalari o‘rtasida o‘tkazilgan “Eng faol yil talabasi” tanlovining Jahon iqtisodiyoti va diplomatiya universiteti bosqichida “Yilning eng faol ixtirochi-innovator talabasi” nominatsiyasida 1-o‘rinni egallagan.

O‘tgan 2024-yilda esa O‘zbekiston Respublikasi Prezidenti davlat stipendiyasiga sazovor bo‘ldi.
Javohir Imomov kabi iqtidor egalari nafaqat tumanimiz, balki respulika miz yoshlari uchun ham umid bag‘ishlamoqda.

Dilmurod MAHRAMOV,
“Jomboy tongi” muxbiri.

– Sirtqi ta‘limda o‘qiyman. O‘quv ta’tili berilgan davrda sog‘lig‘im yomonlashdi. O‘sha vaqtda kasallik nafaqasi (bolnichny) to‘lanadimi?

O‘lmas Asrorov, Zarafshon mahallasi.

– Vazirlar Mahkamasining tegishli qarori bilan tasdiqlangan “Ayrim turdagi nafaqalarni tayinlash va to‘lashni tartibga solish choratadbirlari to‘g‘risida”gi nizomning 19-bandida vaqtinchalik mehnatga layoqatsizlik nafaqasining to‘lanmasligi mumkin bo‘lgan holatlar sanab o‘tilgan.

Unga ko‘ra, ish haqi saqlanmagan yoki qisman saqlanadigan ta’til, bola parvarishlash ta’tili davrida, shuningdek, ish vaqtincha to‘xtatilgan hollarda, xodim ishdan chetlashtirilgan va ishlab chiqarishdan ajralmagan holda o‘quv yurtlarida tahsil olish uchun berilgan o‘quv ta’tili vaqtida kasallik nafaqasi to‘lanmaydi.

Yuqoridagi qoida sirtqi ta’limda o‘qiydigan xodimga nisbatan ham qo‘llaniladi. Chunki, o‘quv ta’tili ishlab chiqarishdan ajralmagan holda o‘qish uchun beriladigan qo‘shimcha ta’til hisoblanadi. Bu holatda xodimning kasallik davridagi ish haqi masalasi ish beruvchi bilan alohida kelishuv asosida hal qilinishi mumkin, biroq qonunchilik bunday majburiyatni ish beruvchiga yuklamaydi.

“Hududiy elektr tarmoqlari” AJ Samarqand hududiy filiali Jomboy tumani elektr ta’minoti bo‘limi jamoasi xalqimizni Yangi yil bayrami bilan tabriklaydi.

Aziz yurtdoshlar, xonadoningizdan tinchlik, yurtimizdan qutbaraka arimasin!

2025-yil oilaviy daromad va biznesingiz rivoji uchun muvaffaqiyatli yil bo‘lsin. Xonadoningizdan quvonch va shodlik arimasin!