Jizzax viloyati hokimi BMB HOLDINGNING Sharof Rashidov tumanidagi korxonalari faoliyati bilan tanishdi

Jizzax viloyati hokimi vazifasini bajaruvchi Ulug‘bek Mustafoyev BMB HOLDING Kuzatuv Kengashi raisi Bekzod Mamatqulov hamrohligida Holdingning Sharof Rashidov tumanida joylashgan BMB-NRC Agrologistics, BMB Agro Plus va BMB IMPEX korxonalari faoliyati bilan tanishdi.

BMB HOLDING: qishloq xo‘jaligi va agrosanoat uyg‘unligi

Ma’lumki, BMB HOLDING Jizzax viloyatidagi yirik agrosanoat klasterlari orqali qishloq xo‘jaligini sanoatlashtirish, innovatsion texnologiyalarni joriy etish va xalqaro standartlarga mos mahsulotlar ishlab chiqarish borasida bir qator yirik loyihalarni amalga oshirib kelmoqda.

Viloyat hokimi mazkur loyihalarning amaliy jarayonlari bilan yaqindan tanishish maqsadida tashrif buyurdi.

Safar dasturi avvalida u BMB-NRC Agrologistics majmuasi faoliyatini ko‘zdan kechirdi.

Bu yerda agrologistika markazining imkoniyatlari, eksport salohiyati va xizmat turlari haqida batafsil ma’lumot berildi.

Shuningdek, “Yagona darcha” tamoyili asosida qishloq xo‘jaligi mahsulotlarini saralash, qayta ishlash, qadoqlash, saqlash, bojxona va fitosanitar hujjatlarini rasmiylashtirish, shuningdek, transport va logistika xizmatlari ko‘rsatish jarayonlari tanishtirildi.

Chuqur qayta ishlash – eksport salohiyatini oshirish yo‘li

Tashrifning navbatdagi manzili qishloq xo‘jaligi mahsulotlarini chuqur qayta ishlash va eksportga yo‘naltirishga ixtisoslashgan BMB Agro Plus va BMB IMPEX korxonalari bo‘ldi. Bu yerda meva-sabzavotlarni chuqur qayta ishlash jarayonlari, jumladan, murabbo, konserva, pure va pasta kabi qo‘shilgan qiymatga ega mahsulotlar ishlab chiqarish jarayonlari bilan tanishildi.

Mavjud imkoniyatlardan yanada samarali foydalanish maqsadida, joriy yilning oxiriga qadar sublimatsion usulda quritish, shok va akustika usulida muzlatish texnologiyalarini joriy etish rejalashtirilayotgani ma’lum qilindi.

Shuningdek, BMB HOLDING tomonidan BMB Za’faron va za’faronli mahsulotlar burchagi tashkil etilgani qayd etildi. So‘nggi yillarda za’faronchilik yo‘nalishida qo‘lga kiritilgan yutuqlar, xalqaro sertifikatlar va ularning ahamiyati haqida hokimga ma’lumot berildi.

Jizzax viloyati hokimi vazifpsini bajaruvchi Ulug‘bek Mustafoyev ushbu korxonalarning faoliyatini yuqori baholab, mahalliy mahsulotlarni xalqaro standartlarga muvofiq ishlab chiqarish uchun innovatsion yechimlar joriy etish hamda xalqaro sertifikatlash jarayonlarini yanada kuchaytirish zarurligini ta’kidladi.

Shuningdek, mazkur korxonalar nafaqat iqtisodiy ahamiyatga ega, balki yangi ish o‘rinlari yaratish orqali minglab mahalliy aholi vakillari bandligini ta’minlayotgani, bu esa ijtimoiy barqarorlik va aholi daromadlarining ortishiga xizmat qilayotgani ta’kidlandi.

📲 Jizzax.uz sayti sahifalariga aʼzo boʼling:👇

Telegram|jizzaxviloyatihokimi|Facebook|YouTube|Instagram|ok.ru|@jizzaxuz_bot|X|