Бухоро. Ёзувчилар уюшмаси

"Birinchi kitobim" loyihasida taqdimot o‘tkazildi

Bugun O‘zbekiston Yozuvchilar uyushmasida yosh ijodkorlarning “Birinchi kitobim” loyihasi doirasida chop etilgan kitoblar taqdimoti bo‘lib o‘tdi.
Unda ustoz adiblar, yosh ijodkorlar, adabiyot ixlosmandlari jam bo‘ldi. Tadbirni Yozuvchilar uyushmasi raisi Sirojiddin Sayyid ochib berdi va davlatimiz tomonidan yoshlarga qaratilayotgan eʼtibor va yaratilayotgan imkoniyatlarga to‘xtaldi. Shundan so‘ng, uyushma raisi o‘rinbosari Farida Afro‘z, Madaniyatshunoslik va nomoddiy madaniy meros ilmiy-tadqiqot institutiga direktori Botir Ergashev, “Yangi O‘zbekiston” gazetasi bosh muharriri o‘rinbosari Nosirjon Jo‘rayev, shoir va tarjimon Nikolay Ilin, yosh adabiyotshunos Begzod Ibragimov so‘zga chiqdi. Mualliflarning nasriy va nazmiy asarlari tahlil qilinib, yutuqlari eʼtirof etildi.
- Davlatimiz rahbari tashabbusi bilan tashkil etilgan Respublika yosh ijodkorlarining anʼanaviy Zomin seminari bir necha yillardan buyon isteʼdodli yoshlarni kashf qilishda, ularni qo‘llab-quvvatlashda muhim ahamiyat kasb etmoqda, - dedi rais o‘rinbosari Farida Afro‘z. - Aslida birinchi kitob nima? Bu - o‘zbek adabiyoti, ijodkorlari oldida tan olindi va millatga yana bir shoir, yozuvchi tug‘ildi, degani. Bugungi 19 nafar mualliflarning barchasi ijod bo‘stonida o‘z aytar so‘ziga ega. Albatta, kelajakda yuzinchi kitob taqdimotlarini ham o‘tkazishlari nasib qilishini tilayman.
Xabaringiz bor, loyiha doirasida yosh ijodkorlarning O‘zbekiston Yozuvchilar uyusahmasi "Adabiyot" nashriyoti tomonidan birinchi kitoblari chop etilib, adabiyot muxlislariga havola qilib kelinadi. Bu yil ham Zomin seminaridan saralab olingan 19 nafar mualliflarning 18 nomdagi birinchi kitoblari nashr qilindi. Xususan, Faxriyor Baxtiyorovning “Sen uchun”, Bibigul Adiyevaning “Xayol kemasi”, Sanjar Toshbekovning “Xirgoyi”, Suhrob Hamroyevning “Uyg‘oq fasl”, Muhammadali G‘afforovning “Ishq safari”, Shukrullo Sheraliyevning “Kuz taronalari”, Muattar Mamatkarimovaning “Sen kelguncha”, Durdona Bahodirovaning “Ijobat”, Mahliyo Karimovaning “Taskin”, Burhon Rahmatovning “Baxtning uch siri”, Charos Avazovaning “Siyohdon”, Mahbuba Abdurahimovaning “Shams-u hilol”, Farhod Eshon va Mavluda Samariddinovaning “Ko‘ldagi aks va gul”, Snejana Zeytulayevaning “Lis” (rus tilida), Kamoliddin Ro‘zimatovning “Keyingi bekat”, Muxlisa Toshpo‘latovaning “Qo‘g‘irchoq”, Islom Eshniyozovning “Izlegen ig‘balim” qoraqalpoq tilida, Shohro‘z Umarjonning “Hurkak shuʼla” kitoblaridir.
Taqdimotda kitoblar mualliflarga qalam haqqi bilan taqdim etildi. Shu bilan birga 9 nafar yosh ijodkorlar Yozuvchilar uyushmasi aʼzoligiga qabul qilindi.
- Bugungi hayojonimni chegarasi yo‘q. Shu onlarda men va men kabi ijodkor tengdoshlarim birinchi kitobimizni qo‘limizga oldik, - dedi Mahbuba Abdurahimova. - "Shams-u hilol" nomli ilk kitobim qissadan iborat bo‘lib, unda inson ruhiy olamining sir-sinoati, muhabbatning iztiroblari haqida hikoya qilinadi. Unda qahramonlarni jonli va ishonchli tasvirlashda yangicha yondashuvga tayandim. Barcha ustozlarimiz va tashkilotchilarga tashakkur, deyman.
Tadbirda mualliflar yosh ijodkorlarni qo‘llab-quvvatlash borasida Yozuvchilar uyushmasida amalga oshiralayotgan ishlar uchun minnatdorligini bildirdi. Sanʼatkorlarning kuy-qo‘shiqlari kechaga yanada zavq ulashdi.

Zulayho Ahmadjonova

* * *
Шоирликка ҳеч даъвоим йўқ,
Тақдиримдан тониб карахтман.
Топа олмай ўзлигим, ўрним,
Унолмаган мудроқ дарахтман.

Меҳрим сочдим борлиққа чексиз,
Кимга ерман, кимга фалакман.
Жаннатмиди инсонлар қалби?
Қолмоқ учун жони ҳалакман....

Ичи тўлиб, тўкилган дардлар,
Малҳами жон, тинглар қулоқман.
Таскин сўзлар қайнаб қалбимда,
Қаламидан тошган булоқман.

То тупроққа айлангунимча,
Ёниб, ўзин эритган шамман.
Бугун сўзман, бугун малҳамман,
Қақраётган қалбларга намман.

Ғирром дунё ўйинларига
Ғариб туғён, ҳайрону лолман.
Таҳажжудда тунлар саждага
Ботаётган тилсиз ҳилолман.

Шоирликка ҳеч даъвоим йўқ...

Саида СУЛАЙМОНОВА,
Осиё Халқаро университети магистранти

Уланиш учун: https://t.me/ijod_bustoni