#Bayrogʻim
#Chelenj

OʻZBEKISTON BAYROGʻI

Osmon uzra hilpirar,
Baland hurmat, ardogʻi.
Hur Vatanim ramzidir,
Oʻzbekiston bayrogʻi.

Oy, yulduzlar yarashar,
Goʻyo tinchlik mayogʻi.
Tobora dunyo oshar,
Oʻzbekiston bayrogʻi.

Moviy rangi tinch osmon,
Hech soʻnmas gulzor, bogʻi.
Hilpirayver, sen har on,
Oʻzbekiston bayrogʻi.

Ajdodlarim qoni bor,
Yerga tegmas oyogʻi.
Gʻalabaga doim yor,
Oʻzbekiston bayrogʻi.

Yashil rang tortmas xira,
Mangu hayot bir yogʻi.
Baxtimizga hilpira,
Oʻzbekiston bayrogʻi.

Doim el ardogʻida,
Eʼzozin yoʻq sanogʻi.
BMT peshtogʻida,
Oʻzbekiston bayrogʻi.

Gʻam yoʻq Asadullohda,
Maqtovin yoʻq adogʻi.
Bugun Kaʼbatullohda,
Oʻzbekiston bayrogʻi!

✍️ Asadulloh SOLIH,
Oʻzbekiston Yozuvchilar uyushmasi aʼzosi

🏛Oʻzbekiston Yozuvchilar uyushmasi Fargʻona viloyati boʻlimi
Telegram | Facebook | Instagram‌‌