#Bayrogʻim
#Chelenj


OʻZBEKISTON  BAYROGʻI

Sensiz yurak yayramas,
Sen koʻnglimning ardogʻi.
Oʻzbegimga hamnafas,
Oʻzbekiston bayrogʻi.

Vujudingdan sizar qon,
Bobomdan meros chogʻi.
Hurlik deya tikding jon,
Oʻzbekiston bayrogʻi!

Moviy rang  -  mangu osmon,
Boqiy tiriklik bogʻi.
Halol umr, sharaf-shon  -
Oʻzbekiston bayrogʻi.

Tinchlik, poklik ramzi oq  -
Dil sof, shaffof boʻlmogʻi.
Orzuga chorlar har choq,
Oʻzbekiston bayrogʻi.

Yashil rang  -  hur tabiat,
Umid, iqbol yaprogʻi.
Navqironlikka jurʼat  -
Oʻzbekiston bayrogʻi.

Yulduzlar  -  mangu hayot,
Hilol  -  iymon bulogʻi.
Ilohiy kuch ham najot,
Oʻzbekiston bayrogʻi.

Dovrugʻ tarat, ming karra,
Tugʻyonim boʻl, eng sara  -
Koʻrinmasin adogʻi.
Yuksaklarda hilpira,
Yuraklarda hilpira  -
Zavol koʻrmagin sira,
Oʻzbekiston bayrogʻi!

✍️ Akramjon  AZIZOV
   
🏛Oʻzbekiston Yozuvchilar uyushmasi Fargʻona viloyati boʻlimi
Telegram | Facebook | Instagram‌‌