O‘zbekiston Yozuvchilar uyushmasi Farg‘ona viloyati bo‘limi (rasmiy)

#Nazm

USTOZ, SHOGIRD VA DAFTAR HAQIDA
BALLADA

Bir oʻquvchim boʻlardi
Aqlli, hushyor edi.
Darsda hamma savolga –
Javobi tayyor edi.

Yaxshilarga doʻst-oʻrtoq,
Yomondan bezor edi,
Odobli, rostgoʻy, sipo,
Sofdil, beozor edi.

Yillar oʻtib uchratdim
Hayot chorrahasida,
Koʻrdim oʻsha shogirdim
Yaxshilar orasida.

Quvondim: ulgʻayibdi,
Puxta ekan hisobi.
Katta odam qilibdi
Uni hayot kitobi.

Yoʻqlab keldi uyimga
Bir kuni imkon topib,
Qaynoq mehrga oʻrab,
Toʻrtta issiq non olib.

Boshim yetdi osmonga
Bu hurmat-ehtiromdan,
Boshqa ne kerak manga
Bir yoʻqlov, bir salomdan.

Oʻtmishni xoʻp esladik,
Goh kulib, goh tin olib,
Boʻlgan edik sinovlar,
Tanlovlarda koʻp gʻolib.

Bahosi besh boʻlardi,
Navoiydan bilsa yod.
Sahnaga chiqardilar
Boʻlib Hisrav yo Farhod.

Ogʻzaki besh, savodi-
Sal oʻrtacha boʻlganlar,
Baholanmay inshosi,
Xoʻp ovora yurganlar.

Xullas, oʻtgan kunlarni
Aytsak, ado boʻlmaydi.
Oʻquvchim der: taʼlimga-
Sizday fido boʻlmaydi.

Mendan duo oldi-yu
Ishi yodiga tushdi.
Bir pasda “sotka”siga-
Qancha chaqiruv tushdi.

Ketar chogʻi qoʻliga
Bir daftarni tutqazdim.
Oʻqib koʻring-chi, dedim,
Men sizga saboq yozdim.

Xoʻp boʻladi, ustoz, deb
Olib ketdi daftarni,
Magʻzin chaqib kelay deb
Daftardagi gaplarni.

Shanba kuni imtihon
Soati belgilandi.
Oʻsha kuni oʻquvchim –
Telefonda ulandi:

“Ustozim, uzr deyman,
Zarur ish chiqib qoldi,
Huzuringizga borish
Chorshanba kunga qoldi.”

Mayli, dedim, kutaman,
Daftarim qaytsa boʻldi,
Shogirdim dedi: “Gap yoʻq,
Boraman, boʻldi, boʻldi.”

Yopib qoʻydim issiq non
Chorshanba kun azonda.
Yozib ixcham dasturxon
Shoʻrva soldim qozonga.

Oʻn bir-oʻn ikki boʻldi,
Oʻtiribman yoʻl qarab.
Non sovudi, taom ham
Tortildi suvi qaynab.

Shu alpozda shanbalar,
Chorshanbalar koʻp oʻtdi.
Eshik “tiq” etsa, ana,
Daftar keldi, deb kutdim.

Bilasizmi, yaxshilar,
Men oʻzimdan xafaman.
Yoʻqolgan kunlarimni
Endi qaydan topaman?

Koʻzim nuri toʻkilgan
Daftarim qayda qoldi,
Vaʼdaga –vafo degan
Gaplarim qayda qoldi.

Hayot, mening begʻubor
Oʻquvchimni topib ber.
Lafzi halol boʻl, degan
Oʻtinchimni topib ber.

Sen uni qaysi oʻrmon,
Qay daryoga ogʻdirding,
Qalbiga qachon loyqa
Yomgʻirlaring yogʻdirding.

Boshiga dunyo gʻamin
Toʻldirib qoʻydingmi yo,
Rostlik degan tuygʻusin
Oʻldirib qoʻydingmi yo.

Har dilga chiroq yoqib
Qoʻyganman deb oʻylardim.
Odamiylikdan saboq
Berganman deb oʻylardim.

Umrimning ellik yili
Oqib ketganday boʻldi.
Yuragimni bir armon
Chaqib ketganday boʻldi.

Ey oq yuzli daftarim,
Qadring bilib qaytib kel.
Lafzi halollik degan
Qoʻshiqlarni aytib kel.

Kelsang, boshqa hech kimga
Bermay asrayman, ishon.
Birgina beparvolik
Jonimga boʻldi nishon.

Ishonch degan qoʻrgʻonni
Asrab yashaymiz endi.
Rost gapirgan odamni
Alqab yashaymiz endi.

Umrimiz oʻgʻirlagan
Soatni sindiramiz,
Sal chayqalgan koʻngilni
Birlashib tindiramiz.

Koʻpayib qoldi senga
Aytadigan dardlarim.
Shamoldan xat yubordim,
Tezroq qaytgin, daftarim...

✍ Zuhra ALIYEVA

🏛Oʻzbekiston Yozuvchilar uyushmasi Fargʻona viloyati boʻlimi
Telegram | Facebook | Instagram‌‌