Данияр Жігітбек

Таңғы серуен

Бір істі тұрақты жасауға ниеттенген адам ең бірінші сол істің өзіне ұнайтын тұстарын ақ параққа жазып, көрінетін жерге іліп қоюы керек.

Ара-тұра оқып, жалғастыруға шабыт алып отырады. Әйтпесе, алғашқы жалын сөніп, тұрақсыз боп кетуі әбден мүмкін.

Бұл әдістің көмегі зор. Өзіңізге ұнап тұрған бір істі бастап, кейін тастап кеткеніңізді еске алыңызшы.

Негізгі себептердің бірі: ол істі не үшін жақсы көріп бастағаныңызды ұмытқаныңыз!

Сол үшін осындай бір еске салғыш керек.

Менің өмірімді күрт өзгерткен әдеттердің бірі: таңғы серуен.

Өзім үшін осы жерге таңғы серуенді не үшін жақсы көретінімді жазып қояйын. Оқып, тұрақты болуға шабыт алып отырамын:

1. Ұйқым реттелді. Күнде ерте тұруға ден қойсаң, еріксіз ерте жатасың.

2. Күні бойы энергично жүремін. Тіпті ол энергия кешке дейін жетеді.

3. Энергиям көп болған соң, балалармен алысып-жұлысып ойнап, оларға көңіл бөле аламын.

4. Энергиям көп болған соң, әйеліме жылы сөздер айтып, көңілін аулап, позитив қарым-қатынас құра аламын.

5. Тәттіге деген құмарлық күрт төмендеп кетті. Ұйқың реттелсе, физикалық энергияң жеткілікті болса, тәттіге тартпайды екен.

6. 10000 қадамды тоқтамай жасаған соң, сан, арқа бұлшық еттеріне салмақ түседі. Ал ол өз кезегінде тестостеронның көптеп бөлінуіне себеп болады. Еркектің мысыңның пайда болуы осы тестостероннан.

7. Күнімді жеңімпаз ретінде бастаймын. Таңғы 10000 қадамды жасау жеңімпаз образымды бекітеді. Сол күнгі шешімдердім жеңімпаз образында қабылдаймын, сол күнгі сөздерімді жеңімпаз образында айтамын.

8. Таңғы тыныштық, оның үстіне қозғалыста болу тұнығырақ ойлануға мүмкіндік береді. Тың идеялар туады. Әлі бір де бір таңғы серуеннен мәселеме шешім таппай қайтпадым.

9. Тұңғыш Президент саябағында күнде таңертең 1.5 сағат бойы таудың таза ауасын жұтқанда өкпем мен миым маған шексіз алғысын жаудырады.

10. Кездесу жасап, ақылдасуға таңғы серуен — таптырмас мүмкіндік. Талай адаммен таңғы серуенде кездесіп, талай мәселені шешіп тастадық. Кептеліс жоқ, жұмыс уақыты әлі басталмаған. Келмеуге тек ұйқы ғана сылтау болуы мүмкін, басқа ештеңе емес.

11. Таңғы уақытта береке бар және сол береке "талонын" күні бойы қолданасың.

12. 10000 қадам әдеті физиологиялық жасыңды 10 жылға ұзартады дейді зерттеу нәтижелері.

Kitapal дүкенінде оффлайн 33 дәріс өткен едім 6.11.2024 – 27.12.2024 арасы.

33 дәріс – 33 түрлі тақырып.

Оффлайнның вайбы бөлек қой, шіркін.

Сол дәрістерді диктафонға жазып алған едік.

Тыңдаймын деушілер болса, міне сілтеме:

https://t.me/kitapal_shyraq

Kitapal Club жобамыздың 1 жылдық кешін абыроймен атқардық.

Кештің атмосферасын сезіну үшін фото-репортаж көре отырыңыздар.

1-бөлім:

https://drive.google.com/drive/folders/1HFwPMxqky5dSEfXuDk-ZHpE1RnYSweIv?usp=sharing

2-бөлім:

https://drive.google.com/drive/folders/1Bb3nBj9OCDbw6VzGxOfIvLuUmNov5ijg?usp=sharing

Клубымызға әлі де қосыла аласыздар:
https://t.me/dzhigitbek/1393

Қараша айында Агата Кристидің "Ғайып болған миллион" шығармасын оқып, талдаймыз.

Джігіттер 2.0

Елдің дамуына қазір қоса алатын үлкен үлесім
болашақ көшбасшыларға ағалық ақылымды айтып, бағыттап, дамытып, менторлық ету
деп білемін.

Осы ойдың жетегінде "Джігіттер" жобасы пайда болған еді.

Іріктеу аяқталды. 22 жігіт оңай емес сыннан сәтті өтті.

10 км-ді 60 минуттан аз уақытта жүгіріп өте алған,
кемінде 10 рет өз денесін көтеріп, турникке тартыла алған,
@kitapalclub - қа тіркеліп, кітап талқыға қатысуға коммуникациясы жеткен,
"Қаржы қағидаларын" менен алып, сатуға 20000 тг ақшасын қиған

22 жігіт бұл жобада болғысы келетінін ісімен дәлелдеді.

Алда бізді 7 айлық жұмыс күтіп тұр. Джігіттердің жан-жақты дамығанын қалаймын.

Бұл — тегін жоба. Джігіттер ықылас валютасын аямай төлесе, мен де білім-тәжірибемді аямай төгемін.

Әр қазағым жалғызым
қаржылық білімін арттырып,
қарыздан құтылып,
ақшаны дұрыс жаратуды үйреніп,
бай және еркін болғанын қатты қалаймын.

Сол үшін тегін аудио дәрістер өтіп жүрмін.

"Қаржы қағидалары" деген кітабымды негізге алып, білімімді бөлісіп жатырмын.

Кітап сатып алуға мүмкіндігің болмаса,
оқуға ерінсең,

онда жай Play батырмасын басып,

осы аудио дәрістерді шетінен тыңдай берші.

Сөзсіз пайдасын көресің.

Еш алғыс пен ақы күтпеймін. Сенің өмірің жақсарса, болды.

Міне сілтеме. қосыл: t.me/qr_zhi

Құрметпен,
Данияр Жігітбек

Достар!

"Қаржы қағидалары" тәпсірі" деген канал аштым.

Бұл каналда мен, Данияр Жігітбек, өзімнің "Қаржы қағидалары" кітабымда қозғалған тақырыптарды аудио түрінде тәпсірлеп, түсіндіремін.

Кітапты оқу бір бөлек, оны ауызекі тілде түсіндіру бір бөлек.

Каналдағы барлық аудио жазбалар тегін. Сақтап, тарата беріңіздер.

Сілтеме: https://t.me/qr_zhi

Айт құтты болсын, ағайын!

Рамазанда 30 күн ас-ауқаттан тыйылдық. Бүгін бейне бір еркіндікке жеткендей қуанып, арқаны кеңге жайып отырмыз. Айт күнгі қуаныштың дәмін тек 30 күн ораза ұстағандар жақсы сезінсе керек.

"Бұл өмір кәпір үшін — жәннат, мұсылман үшін — зындан" дегенді естіп едім. Бұл өмірде мұсылман болсаң, қалағаныңды істей бере алмайсың. Белгілі бір тыйымдар бар.

Тамақтың адалын таңдап жейсің. Киімнің ұяттысын таңдап киесің. Сөздің түзуін таңдап айтасың. Себебі сен — Алланың таңдап алған құлысың!

30 күн ораза сияқты тыйымдарға толы бұл өмір де өте шығар. Содан кейін сені еркіндік күні — Жұмаққа кіретін күнің күтіп тұр. Сол күнгі қуаныштың қандай болатынын білмеймін. Бірақ бүгінгі айт күнгі сезімдер сол күні кешетін күйімізден хабар беріп тұрғандай.

Біз Рамазандағы тыйымдардан азап шегіп, қазір енді содан құтылғанымызға қуанып тұрған жоқпыз. Жоқ! Әсте олай емес. Керісінше ол бізге ләззат сыйлайтын тыйымдар еді. Әйтпесе, қасиетті аймен қимай қоштаспас едік.

Дәл сол сияқты мұсылман адам үшін бұл өмірдегі тыйымдар — азап шектіретін емес, ләззат сыйлайтын тыйымдар. Олай болса, өмір бойы тыйылып, содан ләззат алып, одан кейін сол тыйымдардан құтылып, Жәннатқа кіріп, содан да ләззат алатын мұсылманның күйі қандай ғажап!

@dzhigitbek

Өзгенің ісін жеңілдету

"Өзгеге көмектесу" емес, "өзгенің ісін жеңілдету" деген сөзді қолданғым кеп тұр. Екі сөздің энергиясы екі түрлі. Мені "өзгенің ісін жеңілдету" деген сөз көбірек шабыттандырады.

Жан-жағыма қарап, "кімнің ісін жеңілдете алам?" деп ойлана бастадым. Бір танысым кітабын сата алмай, жарнамасын қалай жасарын білмей басы қатып отыр. Бір әжей банкоматтың тілін түсінбей, қиналып тұр.

Олардың ісін жеңілдетуге шамам мен білімім жетіп тұр ғой. Танысыма хабарласып, 1-2 копирайтинг тәсілді көрсетіп, саудасын көтере аламын. Әжейдің ақшасын шығарып бере аламын.

Мен оларды елемей, өз жөніммен кете берсем де болар еді. Бірақ олай істесем, әлемде кемінде 2 адам қиналып тұрар еді.

Біз өзгенің ісін жеңілдетуді емес, қиындатуды көбірек ойлайтын сияқтымыз. Біреуге жол бермей, біреуді күттіріп, біреуге қағаз толтыртып, біреуге артық іс істетіп, біреуге қырсығып уақытында жауап бермей жатырмыз. Егер жалпы ел болып өзгенің ісін жеңілдетуді ұстаным етіп алсақ, жемқорлықты да жеңер едік-ау осы.

Біреудің көмек сұрағанын күтпей, өзің бірінші барып, ісін жеңілдетсең, кайф! Фишка сұратпай көмектесуде. Жан-жағыңа қарашы. Қиналып, басы қатып жүрген, мейлі ол кішкентай іс болсын, жандарды іздеші. Тез табасың. Сен үшін оп-оңай, бірақ ол үшін қиын істің күрмеуін шешіп бер. Сөйтіп әлемдегі қиналып жатқан адамдардың санын аз-аздан үздіксіз азайта берейікші.

@dzhigitbek

Күннің батуы, айдың тууымен келіп жеткен Рамазан айы құтты болсын, құрметті мұсылмандар!

Праздник к нам приходит. Үлкен сарайды елестетші. Іші толған алтын кесектері. Бір кесекті сатсаң, құны: $50. Жерде шашылып жатыр. Бассаң, тізеңе дейін батып кетесің. Сарайдың есігі ашылып, "30 күнің бар, үлгергеніңше теріп ал" деді. Сондай күйде тұрмын.

Биыл тек ішіп-жеуден ғана тыйылып қоймай, көз, құлақ, тіл, қол, аяқ та ораза ұстайтын екінші деңгейге ниет етіп қояйық, уа, мұхтарам жамағат!

@dzhigitbek

Жақында Стамбулда болдым. Досым Олжас Ханафин қарсы алып, қонақ етіп күтті.

"Білім де — ризық", "Сен ризығыңды немесе ризығың сені қайдан табатынын білмейсің, Жер бетін кез" деп жатады ғой.

Олжас бауырым бір білімін бөлісті. Осы сапардың ең үлкен олжасы сол деп білемін.

Ол Стамбулда оқып жатқан Әділет деген қари бауырымыздың Құран жаттау тәсілі жайлы айтып берді. Өз сөзіммен жеткізсем, былай:

Күнде кемінде 1 сағат Құран оқы. Дауыстап. Басында қиын болса, 15 минуттан бастасаң болады.

Сөйтіп оқу жылдамдығың арта береді. 1 сағатта 3 пара (1 парада 20 бет бар) оқитын деңгейге жетесің. 3 пара: 60 бет.

Сонда әр 10 күн сайын Құранды хатым етіп отырасың. Құран 30 парадан тұрады. Яғни, бір жылда 36 хатым деген сөз: 365/10 = 36.5.

Сөйтіп 3 жыл жай хатым ете бер. Шамамен 108 хатым болады. Содан кейін 3 ай арнайы уақыт бөліп, мүмкін болса, бір медреседе жатып, Құран жатта. Ұмытпайтындай жаттап аласың да, қари боласың Алла қаласа.

Көбі Құранды бірден жаттай бастайды. Оны қайталау да оңай емес. Сөйтіп Құран жаттауды да, жай оқуды да тастап кетеді. Ал мына әдіс Құран оқуды тәрк етпей әрі оны ұмытпайтындай жаттауға көмектеседі.

Нейробиология, мидың жұмысы жайлы аз-маз білімім бар. Бұл әдістің неге жұмыс істейтінін біліп тұрмын. 108 рет оқылғаннан кейін Құран түпсанаңа отырады. Сіңеді. Кейін жаттасаң, бәрі оп-оңай орын-орнына тұра қалады. Алматыны 108 рет аралап, кейін көше аттарын жаттап алғандай ғой. Бірден жаттасаң, миыңа кірмейтін еді.

3 жыл бойы "Құран оқушы" деген дәрежеде болу да үлкен жетістік қой негізі. Құранда шамамен 320 000 әріп бар. "Оқылған әр әріпке 10 сауаптан беріледі" деген хадисті де білеміз.

Қарапайым математикаға салып, есептеп көрейік. 108 рет Құранды бастан-аяқ оқып шықсақ,

108 хатым * 320 000 әріп * 10 сауап = 345 600 000 сауап!

3 жылда қари боп кетпесек те, мынадай сауапқа кенеліп жатсақ, керемет емес пе?!

@dzhigitbek

Адам өзінің біреуге қажет екенін білгенде, өзін бақытты сезінеді.

Дәл сол сияқты ешкімге қажет емес екенін білгенде, өзін бақытсыз сезінеді.

Қанша жерден мықты болсаң да, сені қажет ететін адамдар болмаса, сенің мықтылығың түкке тұрмайды.

Ал сені біреу қажет етуі үшін сен оларға үнемі бір нәрсе беруің керек: уақыт, энергия, білім, қызмет, т.б. Былайша айтқанда, беруші болуың керек қой.

Адамның қарттықтан қорқуының бір себебі: ешкімге керек болмай қалам деп ойлайды.

Әлемді аралап, өзімнің тек қазаққа ғана керек екенімді түсіндім. Сол үшін қазаққа қызмет етіп, барымды беріп өтем деп шешім қабылдадым.

04.03.2023
Сальта
Аргентина

#күнделік

Дінсіз адамның тәуекелін, болашаққа деген сенімділігін, ештеңеден қорықпайтынын көргенде, өзімнің діндар бола тұра, ірі-ірі мақсаттар қоюға, жоспар құруға ("ой, болмай қалса ше?" деп) тартынып, тәуекелге бармай жүргеніме ұялдым. Алладан ұялдым.

Асылы, менің сенімділігім – Аллаға деген, яғни, Алла мені кез келген жағдайда қолдайды деген сенімділігім болуы керек еді ғой. Бүкіл әлемнің раббысы сенің жағыңда тұрғанда, сенің қорқуың, тәуекел етпеуің, ірі-ірі мақсаттар қоймауың, жоспар құрмауың қылмыс қой. Әсіресе, дінсіз адамның өзі осыны істеп жүргенде.

02.03.2023
Буэнос-Айрес
Аргентина

#рухани_әңгіме
#күнделік

Жамандықпен күресу бар. Жақсылықты жаю бар.

Мен жақсылықты жаю жолын таңдадым.

Атеиске кезігіп қалсам, онымен қызыл кеңірдек боп, бірдеңе дәлелдеп, сөз таластырмаймын. Күреспеймін. Оның орнына Құдайға деген махаббатымды ең заманауи формада, ең әдемі үлгіде көрсету үшін барымды саламын. Жақсылықты жаямын.

"Лгбт пропагандасы күшейіп кетті, ойбай" деп жаһанға жар салмаймын. Күреспеймін. Оның орнына отбасы құндылығы, ер мен әйел арасындағы махаббатты, мысалы, жарымды қалай қатты сүйетінімді көбірек жыр қыламын. Оны көріп, қыз қыз боп туғанына қуанып, жігіт жігіт боп туғанын мақтан тұтатындай жігіт болу үшін барымды саламын. Жақсылықты жаямын.

Youtube, tiktok, insta-да жеңілтек контент көбейіп кетті деп ешкімді сөкпеймін. Күреспеймін. Оның орнына сол жерде мағыналы, нәрлі, мәнді, пайдалы контентті көбейту үшін барымды саламын. Жақсылықты жаямын.

Жамандықпен күреспе, жақсылықты жай. Ең ұтымды жол сол.

Сен жайған жақсылықтың құшағында кез келген жамандық тұншығып қалсыншы. Сен жайған жақсылықтың жылуынан кез келген жамандық еріп кетсінші. Сен жайған жақсылықтың жарығынан Күн шыққанда, Ай көрінбей қалғандай кез келген жамандық көрінбей қалсыншы.

@dzhigitbek

Рауан Чингужанов аға "Исламның алтын дәуірі жақындады. Сен сол дәуір келгенде, қандай рөл атқарып жүресің, көшбасшы боласың ба, әлде артта жүресің бе, сол маңызды" деп жиі айтады.

Былайша айтқанда, Алла Ислам дінін қуаттап қоятыны ақиқат. Бірақ кім арқылы қуаттайды? Сен әлсіз болсаң, сенің орныңа басқа адамды таңдап, сонымен қуаттап қойса ше? Исламның алтын дәуірі келгенде, сен көшбасшы бола алмай қалсаң, қалай?

Кезінде Пайғамбарымыз (Оған Алланың сәлемі мен игілігі болсын) "Константинополь (қазіргі Стамбул) сөзсіз алынады. Оны алатын қолбасшы неткен керемет қолбасшы еді! Оны алатын әскер неткен керемет әскер еді!" деп айтқан. Осы мәртебеге ие болу үшін қаншама қолбасшы Константинопольге шабуыл жасады. Бірақ тек 21 жасар Мехмет сұлтанға ғана бұл бақыт нәсіп болған.

Мен небір ықпалды адамдардың Ислам дінін қабылдап жатқанын естігенде, екі түрлі күйде боламын. Біріншісі, әрине, дінім үшін қуанамын. Екіншісі, "Алла дінін қуаттау үшін осыншама ықпалды адамдардың арасынан мені таңдаса екен, ол мәртебеге ие болуым үшін, өз заманымның "Мехметі" болуым үшін не істеуім керек?" деген ой, толғаныс.

Осындайда Алла жолында жарысу деген нәрсені басқаша түсіне бастайды екенсің.

#күнделік

13-14 жас кезім. Түрлі жарыстарға қатысып, жеңіп, мектеп деңгейінде атақты бола бастадым. Еститінім тек мақтау сөздер. Мұғалімдердің сүйікті оқушысына айналдым.

Бір апайымыз кластың көзінше "Сендер Даниярдың тырнағына да татымайсыңдар" дегені есте қалыпты. Әрине, дұрыс емес сөздер. Қазір еске алып, қысылып отырмын. Бірақ ол кезде бұл сөздер нәпсіме майдай жағатын. "Жұлдыз ауруына" шалдыққанымды кейін түсіндім.

"Жұлдыз ауруы" желшешек (ветрянка) сияқты. Ерте ме, кеш пе, бір ауырып аласың. Бірақ барынша ерте ауырып алғаның абзал. Әйтпесе, есейгенде ауырсаң, қатты қиналасың.

"Жұлдыз ауруы" — өзіңді өзгеден жоғары санау, мақтау-мадаққа семіру. Оның қандай болатынын мен білемін. Дәмін татып көргем.

Бір күні үйге кластасым келді. Менің оңбағандығым сондай, басқа бөлмеге кіріп алып, кітабымды оқып отырдым. Қонақты қарсы алу, көңіл бөлу деген жоқ. Сондағы ойым: "ол менің оған уақыт бөлуіме лайық емес".

Мені бұл аурудан айықтырған, орныма қойған анам болды. Анамның қатал тәрбиесі болмағанда қуып кетер ме едім, кім білсін. Жерден алып, жерге салып, ұрсып, үрленіп жүрген менің желімді шығарып тастады. Содан кейін өзімді жердің кіндігі санауды қойдым. Өзгеге құрметпен қарауды, кішіпейіл болуды үйреткен сол кісі.

Содан бері мен әлі өзімді кішіпейіл болуға мәжбүрлеп, өз-өзіммен күресіп жүрмін. "Жұлдыз ауруының" белгілері қылаң бере бастаса, бірден басып тастауға тырысамын.

#күнделік

Өмірімде тағы нені жақсартсам болады?

Байқағаным, бізге сәл кідіріп, ойлану жетіспейді екен. Апыл-ғұпыл істеріңе басыңмен кіріп кетесің. Яғни, аудио дәріс тыңдамай, кітап оқымай, тіпті пайдалы болса да, ешкіммен сөйлеспей — жалпы ештеңе істемей, жай кідіріп, ойлану керек бізге.

Ойлану дегенде, өзіңе есеп беріп, күнәларыңды еске алып, тәубе етіп, эмпатияңды оятып, жанашырлық танытып, сезімдерді кешіп, өзіңе сырттай қарап, анализ жасап, өткеннің парағын жауып, болашаққа көз салып, жоспар құру ғой.

Бізді ойландырмайтын дүниелер қазір шаш-етектен. Инстаграм, тик-токқа кіріп кетсең, қайдағы ойланған. Тіпті сезімдеріміз де жансызданып бара жатыр. "А, байғұс, өліп қапты ғой", "қиналып жатыр екен", "соғыс боп жатыр" дейміз де, ертесіне ұмытып кетеміз. Негізі ойлансаң, жылататын нәрселер бұл. Жылау үшін де осы кайдзен сағат керек боп тұр.

Ешкім мазаламай, ойланатын бір сағатың болса, балаңа, әйеліңе дұрыс көңіл бөле алмай жатқаныңды, ата-анаңның денсаулығын, бір адамды ренжіткеніңді еске ала бастайсың. Егер ондай сағатың болмаса, сезімдерің өлі, ойларың ұйқылы күйде жүре береді екенсің.

#күнделік