O'zbekiston Respublikasi Davlat bojxona qo'mitasining rasmiy axborot kanali

Божхона қўмитасида АҚШ Энергетика Вазирлигининг Ядровий контрабандани аниқлаш ва олдини олиш бошқармаси (ЯКАОБ) вакиллари билан ишчи учрашув бўлиб ўтди.

АҚШ нинг ЯКАОБ дастурлари раҳбари ўринбосари М.Сик бошчилигидаги делегация билан учрашувда Давлатимиз Раҳбари томонидан Ўзбекистон-АҚШ ўртасидаги кўп қиррали ҳамкорликни янада кенгайтиришга алоҳида эътибор қаратилаётгани таъкидланди. Мазкур ҳамкорлик божхона соҳасида ҳам янги босқичга кўтарилмоқда.

Учрашувда чегара божхона постларига радиацион портал мониторлар ўрнатиш ва уларнинг созлигини таъминлаш бўйича ҳамкорлик истиқболлари муҳокама қилинди.

Ҳозирда Андижондаги “Дўстлик” ҳамда Фарғонадаги “Ўзбекистон” чегара божхона постларига ва Божхона институтига радиацион портал мониторларини ўрнатиш ишлари амалга оширилмоқда ва келгуси ойда жараён тўлиқ якуналади.

Шу боисдан меҳмонлар 8-12 апрель кунлари “Тошкент халқаро аэропорти”, “Ғишткўприк”, “Навоий” ва “Фарғона” чегара божхона постларида бўлишади ҳамда радиацион портал мониторларни ўрнатиш жараёнларига баҳо беришади.

Жорий йилнинг 7 апрель куни Божхона институтининг Қайта тайёрлаш ва малака ошириш факультетида халқаро экспертлар иштирокида миллий ўқув курси ташкил этилди.

“Чегараларда шубҳали хорижий террорчи жангчилар ва бошқа жиноятчиларни аниқлаш билан боғлиқ трансчегаравий муаммоларни бартараф этиш” мавзусидаги ушбу ўқув курси Европада хавфсизлик ва ҳамкорлик ташкилоти билан ҳамкорликда ўтказилмоқда. Унда Ўзбекистон божхона хизмати ва чегара қўшинлари ходимларининг билим ҳамда соҳавий тажрибаларини бойитишга асосий эътибор қаратилган.

Машғулотларни Бельгия ва Шимолий Македониядан келган халқаро экспертлар ҳамда бошқа тажрибали мутахассислар олиб бориб, ходимларга ушбу йўналишдаги хориж тажрибаси таништирилмоқда.

Дастур доирасида шубҳали шахсларни аниқлаш, ҳужжатлар хавфсизлиги, хавф кўрсаткичларини баҳолаш, инқирозни бошқариш, одам савдоси ҳамда ўқотар ва енгил қуролларнинг ноқонуний савдосига қарши курашиш каби долзарб мавзуларда ҳам ходимларларга тушунчалар берилмоқда.

Ўқув курси 10 апрелга қадар давом этади.

Миллий либос – миллат кўзгуси!

Ўзбек халқининг миллий қадриятлари ва маънавий меросини асраб-авайлаш, қизларимиз қалбига миллий либослар ифтихорини сингдириш, миллий қадриятларимиз, миллий либосларнинг гўзаллиги ва жозибасини ёшлар ўртасида кенг тарғиб этиш муҳим ўрин тутади.

Шу мақсадда, Гулистон шаҳридаги Тадбиркорлар ва ҳунармандлар марказида “Миллий либос-миллат кўзгуси!” фестивали доирасида “Миллий либослар” намойиши ва бир қатор тадбирлар бўлиб ўтди.

Тадбирда Ўзбекистон Республикаси Бош вазири ўринбосари, Оила ва хотин-қизлар қўмитаси раиси Зулайхо Махкамова иштирок этди.

Миллий қадриятларни асраб-авайлаш, ўзбек халқининг бой маданий меросини кенг тарғиб қилиш, вилоят аҳолисининг миллий либосларга эътиборини қаратиш орқали эстетик дунёқарашини ошириш ва туризмни ривожлантиришда қўшган ҳиссаси учун Сирдарё вилояти божхона бошқармаси “Миллий либослар тарғиботида энг фаол ташкилот” номинацияси ғолиби бўлиб, Оила ва хотин-қизлар қўмитасининг “Ташаккурномаси” билан тақдирланди.

Ҳудудлардан хабарлар

Қорақалпоғистон Республикасининг Мўйноқ туманида камбағалликни қисқартириш ва туманни ижтимоий-иқтисодий ривожлантириш борасидаги ишларда божхоначилар ҳам фаол иштирок этмоқда.

Навоий вилоятининг Навбаҳор туманида “Яшил макон” умуммиллий лойиҳаси доирасида божхоначилар ташаббуси билан 10 минг туп тут кўчатлари экилди.

Қашқадарё вилоятининг Шаҳрисабз туманида енгил атлетика спорт турлари бўйича вилоят чемпионати ўтказилди.

Бухоро вилоятидаги текстил корхонаси томонидан жорий йилда қиймати 1,5 млн. АҚШ долларига тенг товарлар Европа давлатларига экспорт қилинди.

Хоразм вилоятида божхона ходимлари томонидан тадбиркорлар билан сайёр учрашувлар мунтазам давом этмоқда.

Сирдарё ва Андижон вилоятларида қуёш панелларини ўрнатиш бўйича олиб борилаётган тарғибот ишлари ижобий самара бермоқда.