Bintu Sodiq

«Айрилиқ кўз билан севганлардагина бўлади. Руҳан, қалбан севганлар учун эса ҳеч қачон айрилиқ йўқ».

Жалолиддин Румий

@BintuSodiq

Устознинг сендаги ҳақларидан

Ҳазрат Али розияллоҳу анҳу илм ўрганувчига қарата бундай деганлар: «Олимнинг сендаги ҳақларидан бири сен одамларга омматан салом бериб, муаллимга хос салом беришингдир. Унинг рўбарўсида ўтиришинг, унинг ҳузурида қўлинг билан ишора этмаслигинг, кўзингни қисмаслигинг, устозга керагидан зиёда савол бермаслигинг, жавоб беришида унга ёрдам бермаслигинг, агар хоҳламаса, унга қайта-қайта савол бермаслигинг, устоз туришга ҳаракат қилганда унинг кийимларидан ушламаслигинг, унинг сир-асрорларини фош этмаслигинг, устоз ҳузурида бирон-бир кишини ғийбат қилмаслигинг, уни бирон-бир масалада хато қилишини ҳеч қачон тиламаслигинг, устоз агар ногоҳ адашса, узрини қабул этишинг, устозга қарата: «Мен фалончи бундай деганини эшитдим» ёки «Фалончи сизнинг хилофингизга гапирди», деб айтмаслигинг, устоз ҳузурида бирон-бир олимни тавсифламаслигинг, узун суҳбатидан ҳеч қачон малолга келмаслигинг, устоз хизматидан ўзингни олиб қочмаслигинг лозим бўлади. Устознинг бирон ҳожати чиқиб қолса, уни адо этиш учун барча қавмлар чопишади. Устоз гўё бир хурмо дарахтига ўхшайдики, сен ундан бирон нарса тушишини пойлаб турасан». Имом Ҳасан розияллоҳу анҳу айтдилар: «Уламолар бўлишмаганида эди, инсонлар гўё ҳайвонларга ўхшаб қолишарди».

@BintuSodiq

Олимларнинг фироқи

Исҳоқ ибн Аҳмад айтади:
"Биз Муҳаммад ибн Исмоил Бухорийнинг ҳузурида эдик. Унга Абдуллоҳ ибн Абдурраҳмон Доримийнинг вафот этгани ҳақида хабар келди. Шунда у бошини эгди, кўзларини юмиб, чуқур нафас олди. Истиржоъ айтди, кўз ёши ёноқларини ювди ва қуйидаги шеърни ўқиди:

«Гар умринг узоқ бўлса, куярсан дунёни тарк этганда ҳар севганинг,
Сўнг ёлғиз қолурсан, шундагина билурсан ҳаётдаги энг катта мусибат не эканин".

Шарҳ:
Яъни, узоқ яшасанг, дўстларинг вафот этиб, ёлғиз қоласан. Лекин энг катта қайғу уларнинг ўлимидан кейин ёлғиз қолишдир.

Манба: Итҳаф ал-Камал, 217/15.

@BintuSodiq

Машҳур фақиҳ, усулий аллома шайх Муҳаммад Аднон ибн Ёсин Дарвиш 1970 йил 17 ноябрда Суриянинг Дамашқ шаҳрида таваллуд топган.

Илмий шаҳодатлари ва фаолиятлари:

• Азҳари шариф университетининг бакалавриати (шариат ва қонун факультети) ва магистратурасини (усулул фиқҳ) тамомлаган;

• усулул фиқҳ йўналиши бўйича фан доктори илмий унвонига эга;

• 2014 йилдан буён Туркиянинг Истамбул шаҳридаги Сабоҳуддин Заъим масжидида мударрис;

• 1989 йилдан буён Фатҳ ислом маъҳадида мударрис;

• Бир неча йил давомида Дамашқ шаҳри ва вилоятидаги шаръий ўрта мактабларда мударрис;

• 2006 йилдан буён Фатҳ ислом маъҳадининг юқори университет қисмида мударрис;

• Шом олий маъҳадида фиқҳ ва мазҳаблар фиқҳи бўйича мударрис;

• Дамашқ вилоятидаги Ҳуда маъҳадининг асосчиси ва мудири;

• Дамашқ шаҳри ва вилоятидаги бир неча масжидларда мударрис.

Илмий ишлари:

• «Абдулазиз Бухорийнинг усулул Баздавийга шарҳи «Кашфул асрор» асарининг илмий таҳқиқи» мавзусидаги магистрлик илмий ишини аъло баҳога ҳимоялаган;

• «Ибн Ҳожибнинг усулдаги фикрлари» докторлик илмий иши биринчи ўринга сазовор бўлган;

Салаф уламоларнинг илмий меросидан қуйидагиларни таҳқиқ қилган:

• Суютийнинг «Саҳиҳи Муслим»га ёзилган «Дебож» номли шарҳининг таҳқиқи;

• Имом Косонийнинг «Бадоиъус-саноиъ» китобининг таҳқиқи;

• «Ҳидоятул Фаттоҳ фи зикри адиллати нурул ийзоҳ» китобининг таҳқиқи;

• Мерос илмига оид «Сирожия» китоби шарҳининг таҳқиқи;

• Мунзирийнинг «Арбаъийн фи истисноъил маъруф» китобининг шарҳи ва таҳқиқи;

• Имом Марғинонийнинг «Ҳидоя» китобининг таҳқиқи;

• Имом Мусилийнинг «Ихтиёр» китобининг таҳқиқи;

• «Саҳиҳул Бухорий»нинг энг катта шарҳларидан бўлмиш «Нажоҳул қорий бишарҳил Бухорий» китобининг таҳқиқи.

islom.uz
@BintuSodiq

Етиб бора олмадим. Режам бўйича келаси ой зиёратларига бормоқчи эдим. Китобни кўрсатиб хурсанд қилмоқчи эдим. Дуоларини олмоқчи эдим. Дийдор қиёматга қолди.
Аҳли хайр, Шайхимиз ҳақларига дуо қилинглар. Ман ожизага ҳам сабр сўраб дуо қилинглар.

Одинахон Муҳаммад Содиқ

@BintuSodiq

Қиз боланинг балоғатга етиши ҳайз билан бўлади

Иккинчи фатво

Савол: Ўн икки ёшли қизим ҳали балоғатга етмаган ва ҳали ҳайз кўрмаган. Лекин баданининг баъзи ўринларида тук чиққан. Унга тўлиқ ҳижоб вожиб бўладими?

Жавоб: Аллоҳнинг тавфиқи билан айтаманки, балоғатга етиш тукларнинг чиқиши билан эмас, ҳайз билан бўлади. Лекин фитнадан узоқ бўлиши ва сатр-авратга ўрганиши учун ҳозирдан ўраниши лозим бўлади.
Валлоҳу аълам.

Салоҳ Муҳаммад Абул Ҳожнинг
«Марваридлар шодаси» (Аёлларга хос нозик масалаларга оид қоидалар) китобидан олинди

#Marvaridlar_Shodasi
@BintuSodiq