БУ КУНЛАР ҚАБРНИНГ СУКУНАТИДАЙ –Ўзинг учун ўзинг дамлаб келиб чой,
Ўзинг учун таскин топиб келасан,
Қалдирғоч тумшуқда ташигандай лой.
Отанг олисларда,
Онанг ҳам олис
Қишлоқдаги уйда нафақа кутар.
Бу кунлар хўрланган, бу кунлар ёлғиз,
Бу кунлар ёмғирда қолган кабутар.
Тўшак йиғилмаган, уй бесаранжом,
Қўрқув ўчирмасдан ётар чироқни.
Бу кунлар даҳшатга тўла, жўражон,
Бу куннинг жимлиги кесар қулоқни.
Кўп дилгир бўларкан дард чеккан одам,
Кўз олдидан ўтар яхши-ёмонлар.
Аёллар меҳрини исроф қилгани,
Дўстларидан қарғиш олган замонлар,
Тунги клубларда ўйнаб-кулгани,
Сафарга чиққани жануб томонга.
Қувончга тўлгани, бахтга тўлгани,
Ҳасрати тўлгани тамакидонга.
…Ва пахтазорларда қизлар-ла кечган –
Тилла қўнғиз тутиб берган дамларим.
Айтаолмаганим шеърларга кўчган,
О, менинг хаёли ширин ғамларим.
Кўзимни илк бора ўтмиш намлади,
Қайлардасан энди, сирли қаламқош?
Бу кунларнинг бунча совуқ ранглари,
Бу кунларнинг бунча кўзи тўла ёш.
Бу кунларнинг танам бўйлаб ёйилган
Оғриқлари учун чекмасман фиғон.
Бу кунлар, рўйи рост кунларимдирки,
Кимсасиз эканим исботлайтурғон.
Бу кунларнинг ҳолсиз қадам босиши
Навқирон кўнглимга солмайди ҳадик.
Мен нажот тиланиб инграётирман,
БУ КУНЛАРНИНГ ЭСА
ҚУЛОҒИ
КАРДЕК!Бек АЛИ2024 йил.
Telegram |
Facebook |
Instagram |
@bekaliijodi1920' rel='nofollow'>YouTube