Bahodir Mexriddin (Bozorov)

#samimiy_kulgi

Kelin:

Turk tilini biladi.
Ingliz tilini biladi.
Rus tilini biladi.
Arab tilini biladi.

Kuyov:

Xotin tilini biladi)

Oila haqida anglaganlarim

Oilada birinchi navbatda eng muhimi erkak kishi uchun farzandiga munosib ona tanlay bilish va niyat qilayotgan jufti haloliga munosib boʻlish.

Qanday toʻgʻri tanlashim mumkin? Umuman ikkala tomon uchun oʻlchovlar qanday boʻlishi kerak?

Shaxsiy fikrimcha, 100% toʻgʻri tanlay olmaysiz. U bilan sevishib yurasizmi, sinfdoshingiz, kursdoshingiz yoki mahalladoshingiz boʻlsa ham.

Oilaviy masalalar boʻyicha ustozimga yordam berib turaman. Kelgan savollarni tahrirlayman.

Kelayotgan baʼzi savollar egalarining hayosiga havas qilsam, baʼzilarida esa shaxsiy fikri yoʻqligi hisobiga qaror qabul qilish qiyin boʻladi.

Ayol ikkinchi tomondan mehr, muhabbat, eʼtibor, ilm olishiga sharoit yaratib berish, moddiy tomonlama masʼulyatli boʻlishini istashadi.

Baʼzan erkaklar xiyonat qilayotgani, ayoli esa bunga koʻz yumayotgani, sabr qilayotgani haqida oʻqib qolaman. Alloh isloh qilsin.

Qadriyatimiz jihatidan ikkala tomon yaxshilab surishtiriladi. Keyin uchrashuv, keyin toʻy boʻladi.

Men bitta narsaga hayron qolganim 60-70 yoshli kattalarimiz uzoq vaqtdan beri turmush qurib yashab kelishadi. Toʻgʻri, ularda ham janjal, tushunmovchiliklar boʻladi. Kerak boʻlsa, er urganda ham uydagi muammoni tashqariga chiqarishmaydi.

Hozirda esa yashagani 1 oy, 5 oy, 1 yil, 5 yil boʻlganlar ajrashishyapti. Bu bilan ajrashmasin, hammasiga chidasin demayman. Oila masʼuliyati bir umrlik masʼuliyat.

Uylanishdan yoki turmushga chiqishdan avval albatta oila ilmini oʻrganish shart. Oila, farzand tarbiyasi va mahramiyat, halol, xarom masalasini oʻrganish shart. Bu albatta shaxsiy fikrim.

Chunki siz hozir nimaga ehtiyojingiz yoki ishingiz tushib turgan boʻlsa, oʻsha narsaning ilmini oʻrganish siz uchun shart (farz) boʻladi.

Oʻzim ham shu jarayondaman. Fikrlarim baʼzan boshqa odamlarning fikriga toʻgʻri kelmaydi. Buni ham normal qabul qilaman. Jamiyat uchun bitta qoida yoki shablon boʻlishi mumkin emas. Albatta, shariatdan boshqa.

Oila qurishdan oldin albatta niyatni toʻgʻrilash, himmatni kattaroq qilish va toʻgʻri sababiyatni qilish kerak ekan.

Ota-onamni xizmatini qilsa boʻldi, uyda oʻtirsa boʻldi, faqat meni chizigʻimdan chiqmasa boʻldi.

Tasavvur qiling, bitta begona inson sizga butun hayotini ishonib, boshqa bir begona joyga kelyapti. Uning ham oʻz orzulari, niyatlari, kutuvlari bor edi. U ham alohida bir shaxs edi.

Hozircha 21 yoshlik yigit anglaganlari, amal uchun harakat qilayotganlari haqida yozdi.

Vaqtingizga rozi boʻlasiz.

Bahodir Mexriddin oʻgʻli
24.05.2024
Toshkent, Chilonzor tumani

Farzandini urib, alamini oladigan, yigʻlatib maza qiladigan mehribon onalarni, uydagini muammosini hal qilmaydigan qayerdagi dugonalariga aytib yurgan ayollarni, ogʻzidan erkak kishi aytsa uyaladigan soʻzlarni aytib, maza qiladigan duxi baland ayollarni, bayram deb oʻzicha yigʻilib, ozodlikka chiqqan qushlarday qani oldik dugonajon deb aroqni shishalab ichadigan ayollarni koʻrsam oila ilmi nimaga kerakligini yana bir bor tushunaman.

Ayollar, sizlarga ishonganlarni hurmat qiling hech boʻlmasa...

Qabrda ham rashk qilaman

(Hayotiy hikoya)

Bir yigit din-u diyonatli va goʻzal xulqli qizga uylandi. Ikki yosh baxtli hayot kechira boshladi...
Oradan uch yil oʻtdi. Ammo taqdir taqozosi bilan Alloh taolo farzand bermadi. Qator shifokorlar huzuriga borishdi.

Oxir-oqibat tekshiruvlar xulosasiga koʻra ayol farzand koʻra olmasligi maʼlum boʻldi. Bundan xabar topgan kuyovning yaqinlari unga oilasi bilan ajrashib, boshqa bir ayol ila hayot kechirishi zarurligini aytishdi.

Ikki oʻt orasida qolgan yigit onasi va yaqinlariga qatʼiyat ila: “Ayolimni tugʻmaydigan pushtsiz deb oʻylaysizmi? Aslida, haqiqiy bepushtlik farzand koʻrmaslikda emas, balki er-xotin oʻrtasida mustahkam tuygʻu va pokiza muhabbatning yoʻqligidadir. Men undan roziman. U ham mendan rozi. Boshqa bu mavzu haqida soʻz ochmanglar”, dedi. Orada farzand boʻlmasligi ikki yoshning bir-biriga nisbatan mehr-muhabbatning yanada ziyoda boʻlishiga sabab boʻldi.

Shu zaylda oradan toʻqqiz yil oʻtdi. Kunlarning birida ayol oʻzida baʼzi bir oʻzgarishlarni sezdi. Shifokorga murojaat qilishganda, unda ogʻir xastalik borligi, uzogʻi bilan yana besh yil umri qolganini aytishdi.

Ayolning holati borgan sari ogʻirlashib borardi. Shifokorlar ayolning turmush oʻrtogʻiga: “Ayolingiz shifoxonada boʻlgani yaxshi. Doimo shifokorlar nazoratida boʻladi deyishdi”.

Biroq er bu taklifga rozi boʻlmasdan, tibbiy muolaja uchun kerak boʻladigan barcha narsani uyda muhayyo qilishini aytdi. Uyida ayolining tibbiy davolanishi uchun zarur boʻlgan barcha narsalarni tayyorladi va bitta hamshirani unga qarashi uchun yolladi.

Yigit ishxonasining rahbari mazkur voqeadan xabar topib, unga har kuni ishga ikki soatga kelib, qolgan vaqtda esa, oilasiga qarashi uchun ruxsat berdi. Er ishdan qaytgandan soʻng ayoliga taom pishirib, unga oʻz qoʻli bilan yedirar, soʻngra uni bagʻriga bosib, koʻnglini koʻtaradigan narsalar aytib berardi.

Ayoli vafotidan oldin biror kishiga bildirmasdan hamshiraga kichkina quti berib, uni faqatgina olamdan oʻtganidan keyingina eriga berishini tayinladi.
Ayolning ahvoli ogʻirlashib, hayotdan koʻz yumdi. Ertasi kuni hamshira kelib, oʻziga topshirilgan omonatni yigitga topshirdi.

Er qutini ochganda uning ichida toʻydan keyin ayoliga hadya qilgan atirning boʻsh idishi, toʻy kuni birga tushgan rasmi va sizni Alloh uchun yaxshi koʻraman deb yozilgan kumush uzuk turardi.

Uning ostida xat boʻlib unda quyidagilar yozilgan edi: “Suyukli mehribon jufti halolim! Mendan ayrilib qolganizga mahzun boʻlmang. Allohga qasamki, agar menga ikkinchi marotaba umr berilganida ham hech ikkilanmasdan albatta siz bilan yashashni tanlardim. Lekin siz xohlaysiz, men ham xohlayman. Biroq Alloh taolo nimani xohlasa shu boʻladi. Suyukli mehribonim! Sizga meni oxirgi aytadigan soʻzim vafotimdan keyin biror soliha ayolga uylaning.

Siz vazifangizni aʼlo darajada bajardingiz. Umid qilamanki, qiz farzand koʻrsangiz mening ismimni qoʻyasiz. Shuni bilingki, qabrda boʻlsam ham sizni yangi oilangizdan rashk qilaman!..”

Doktor Hasan Boshaning “Er-xotin ikkisiga aytiladigan nasihatlar” kitobidan #tarjima

© Hubbuna kanalidan olindi.

Bahodir Mexriddin oʻgʻli
30.12.2023
Navoiy, Qiziltepa

Ikki marta oʻqishdan ketmoqchi boʻldim

Oʻzim qishloqda katta boʻldim. Katta boʻlganimiz sari masʼuliyat oshib bordi.

Maktabda yaxshi oʻqishga harakat qildim. 9-sinfdan maktabdagi oʻqishimni bitirib, shahardagi litseyga oʻqishga topshirdim.

Bu qarorga kelishga ham koʻp ikkilandim: kimdur bunga topshir deydi, kimdur maktabni toʻliq tugat deydi, men esa oxiri bobojon va buvijonimning qoʻllashlari orqasidan litseyga topshirdim.

Litseyda oʻtgan 2 yil men uchun xayrli boʻldi: yangi muhit, yangi insonlar va yangi yechimlar.

Bizning oʻqigan paytimizning 2-yili karantinga toʻgʻri kelib, aytarli oʻqimadik ham. Lekin reja boʻyicha keyingi joy institutga topshirish edi.

Oʻzining fazli bilan oʻqishga ham grand bilan kirib oldim, lekin Navoiyga emas. 4 yillik safarimiz bu safar Jizzaxga boʻldi.

Hamma xursand edi oʻsha kun. Ularning quvonchiga men ham sherik edim. Mendan ham koʻproq ular xohlashardi oʻqishga kirishimni. Xayrlisi boʻldi.

Oʻqishda ham ancha sarguzashtlar boʻldi: oʻzim avval umuman qilmagan ishlarda ishladim. $1000 salat tayyorlash sirini 1 yil davomida bepul oʻrgandim.

Keyingi bir yilda sotuvchilikdan tortib hammollikkacha qilib koʻrdik. Shukr, hech qaysi ish behikmat boʻlmagan ekan.

Oʻqishimning oxirgi 2 yili men uchun ozgina qiyin oʻtdi. Oʻqishimni tashlab ketishimga ham oʻqishning osonligi boʻldi.

Shu joyida bitta narsani angladim: oʻqishingiz 4 yil vaqtni sarflashga arzimasa sirtqida oʻqiganingiz maʼqulroq, nima qilasiz uydagilarni ham, oʻzingizni ham qiynab.

Odamlar nima deydi, grandga kirishning ham gashti bor, keyin hammaning oldida ota-onangizni yuzini yorugʻ qilasiz grandga kirib deyishingiz mumkin.

Xayrli boʻlsa, mayli. Arzisa, mayli. Bitirib, afsuslanmasangiz mayli. Shunchaki oʻqiydi degan gap uchun oʻqishga kirmasangiz mayli.

Bahodir Mexriddin oʻgʻli
Jizzax, Sharof Rashidov
24.12.2023

Ayolingizni choʻri qilib qoʻymang

Bu sarlavha sizga boshqacha tuyulgandir balki.

Ayolning vazifasi, oiladagi burchlari aslida nimadan iborat edi?

Nima ayol kishiga faqat uyingizning doim toza-ozoda holda turishi uchun oila qurdingizmi?

Yoki siz yaxshi koʻrgan shirin ovqatlarni dasturxonga ketma-ket qoʻyishi yoki faqat uydagi ishlarni bajartirish uchun uylandingizmi?

Hamma oilalarda shunday yoki barcha ayollar shunday deyishdan yiroqman, ammo men aytayotgan ayollar ham yoʻq emas.

Ayollarni ayblashdan umuman yiroqman, bu yozayotganlarim ayolini faqat uydagi ishlar bilan band qilib qoʻygan erkaklarga qaratilgan.

Albatta, ayolning oʻz eri uchun qilgan har bir ishida ajr bor, qancha savob bor.

Ammo ayolining oʻz ustida rivojlanishi, oʻzi va oʻzidan keyingilar uchun foydali boʻlgan ilmlarni oʻrganishi, kerak boʻlsa olima boʻlishi tarafdoriman.

Bunday oilalar ham talaygina degan yaxshi gumondaman.

Uyga kelsa, birinchi savoli bugun nima ovqat qilding emas, bugun nimalar oʻrgandik deya birinchi ilmidan soʻraydigan erkaklarimizda va shunday oilalalarimizda baraka bor, fayz bor.

Uylarida koʻpligidan soni ham aniq boʻlmagan idish-tovoqlar-u koʻrpa-yostiqlardan ham koʻra birga oʻzlarining shaxsiy kutubxonasini tashkil qilib qoʻygan oilalar bor boʻlishsin.

P. S. Bu mavzu boʻyicha fikringiz menga ham qiziq)

Bahodir Mexriddin oʻgʻli
Jizzax, Sharof Rashidov.
21.12 2023

Men dunyodagi eng yomon odam boʻlsam kerak

Hayotingizda eng katta xatoyingiz nima?

Sizning qoʻlingizda hozir, ayni vaqtda boshqalarda yoʻq nimalar bor?

Hozirgi siz avvalgi sizdan farq qiladimi?

Haliyam kechira olmay, gina saqlab yuradigan odamlaringizni kechirim soʻrasa hech joyi kam boʻlmaydi deb yurasizmi?

Oʻzingizni eng koʻp aldagan yolgʻoningiz nima?

Boshqalarning soʻzi, koʻzi va gapi uchun yashagan umringiz qancha?

Mehr kerak payti qayerga yoki kimga borasiz?

Sizga hech kim eʼtibor bermay qoʻysa siz uchun hayot qanday boʻladi?

Qaysi xatoni takror-takror qilasiz?

Boshqalardan yordam olish ojizlikmi yoki donolik?

Tushkunlikka tushib qoldingiz, eng birinchi qiladigan ishingiz?

Qalbingizga haqiqiy halovatni qayerdan, nimadan yoki kimdan topgansiz?

Insonlarga koʻproq ishonasizmi yoki ishonch berasizmi?

P. S. Savollarga javob berish ixtiyoriy:)

Bahodir Mexriddin oʻgʻli
Jizzax, Sharof Rashidov
20.12.2023

Insonsen, oʻzingga eʼtibor ber, qaydan yaralgansan

Hayotimdagi kunlardan, voqealardan, har bir holatdan hikmat qidirishga harakat qilaman.

Nimaga oʻzi inson bunday qilishi kerak?

Inson unutuvchi, tez unutadi, yaxshiliklarni ham, yomonliklarni ham.

Hatto baʼzan oʻzi qanday bu dunyoga kelgani-yu qanday yaralganini ham unutib qoʻyadi, gʻaflatda qoladi.

Sarhisob, nafsni tergash, har kuni nimadir yangilik qilish yoki nimadir yangi narsa oʻrganish..

Insonlarni kuzatdim, ular nimani oʻylayapti, kimlar bilan koʻproq muloqotda boʻlyapti, missiyasi qanday?

Yaratganni anglamoq uchun yaratilganlarga boqing – ajoyib-a)

P. S. Blog uchun post yoza olmadim anchadan beri, buning ham hikmati bor)

Bahodir Mexriddin oʻgʻli
Jizzax, Sharof Rashidov
19.12.2023

Baʼzan «dunyo»ga tushunmay qolaman

Xavfsizlik uchun ishlab chiqarilgan kamarni faqat formali akalarni koʻrganda taqamiz. Shunda formalilar xavflimi?

Masjiddan yoki qabristondan oʻtayotganda qoʻlimiz duoda, Allohni eslab qolamiz. Shunda Allohni eslashni ham oʻz joyi bormi?

Boshimizga katta musibat tushib qolsa yoki yaqinimiz vafot etib qolsa, Qurʼon oʻqiydigan imom-qorilarni qidirib qolamiz. Shunda «Oʻqi» deya faqat imom-qorilarga buyurilganmi?

Folga ishonma deymiz, ammo folsiz ham yurma deymiz. Six ham, kabob ham kuymasin deymizda endi-a?

Ota-onang topilmaydi degan qoʻshiqlarni baland qilib, zap eshitib yuramiz. Ammo ota-onamizdan xabar olganimizga yaqinda 1 hafta boʻladi. Mehr-muhabbat juda kuchli-da bizda-a?

Haftaning aynan jumalarida, hayit bayramlarida bizdan taqvolisi yoʻq. Shunda taqvo kunga qarab taqsimlanganmi?

Sevgi toʻgʻrisidagi musiqalar bilan pleylistimiz toʻla. Kerak boʻlsa, qayta-qayta eshitamiz, ayniqsa, chin dildan sevgan qizchamiz bilan arazlashib qolsak bormi. Lekin u qiz bilan bilan tanishib, sevishganimizga 1 hafta boʻlgan edi. Sevgimiz kuchli-da, sevgimiz?

Poliglotmiz. Koʻp tillarni bilamiz. Dindori bilan dindor, savdogari bilan savdogar, soddasi bilan sodda boʻlib gaplashamiz. Axir, biz bir yuzli, koʻp tilni biladigan odamlarmiz-da.

100 yoshga kiraylik deb har duomizda aytamiz. Sigaret, nos, aroq, kolyan va yana boshqalarni xilma-xilini bilamiz, ayniqsa beradigan mazasigacha. Koʻp yashamoqchi edikmi?

Yuqoridagi gaplarda haddimizdan oshish va xatolik boʻlsa, oʻzimizga aytib qoʻying.

Bahodir Mexriddin oʻgʻli
Jizzax, Sharof Rashidov
27.11.2023

Bir kun kelib asliyatimizga qaytamiz

3 kundan beri safardaman.

Safar qilish har tomonlama foydali boʻldi.

Silai rahm nima ekanligini oʻzimga eslatib qoʻydim.

Otamning yuziga anchadan beri toʻyib qaramagandim.

Bobom bilan buvimning yoshligimdagi quchogʻini sogʻinibman.

Yoʻlda ham ancha odamdan dars oldim.

Butun Oʻzbekistonni aylanib, safarga chiqaman deb niyat qilgandim, niyatimni yangilab qoʻydim.

Bahodir Mexriddin oʻgʻli
Samarqand, Kattaqoʻrgʻon
26.11.2023

Haqiqat haqiqatan achchiq boʻladi(mi?)

Hozir yozmoqchi boʻlgan gaplarim avvalo oʻzimga nasihat, sizga esa ozgina ibrat boʻladi.

Biror kishiga aql oʻrgatish-u, ilmliman deya davo qilish maqsadidan yiroqman, ayniqsa shu joyda.

Bahodir, meni eshit, yolgʻiz oʻzing boʻlganing yaxshiroq, bu soʻzlarim bir oʻzing boʻlganingda tezroq taʼsir qiladi.

Hech kimga ishonma. Bu gapni nima uchun aytyapsan, tinchlikmi deysanmi?

Tinchlik, shunchaki hech kimga ishonib qolma. Toʻgʻri, aytishing mumkin: ota-onam, yaqinlarim, doʻstlarimchi, ularga ham ishonma demoqchimisan shunda?

Ha, toʻgʻri aytding, ularga ham. Nima uchunligini hozir aytaman.

Inson tabiati ishonishga moyil, oʻzi xohlagan, koʻproq xohlagan va eng koʻp xohlagan narsalariga.

Hayotingda hali shunday vaziyatlaring boʻladi: ota-onangga qisqa umr berilganini, ular ham bu dunyoda abadiy qolmasligini bilasan.

Nima buni bilmasmiding deysanmi? Buni bilasan, ammo eslamaysan, yaʼni koʻp ham eslamaysan. Xuddi oʻzingning oʻlimingni eslamaganing kabi.

Xoʻp, hech kimga ishonmas ekanman, kimga ishonay unda?

Baʼzi bir insonlar faqat oʻzingga ishon, boshqalarga ishonma, hammasini, albatta, oʻzing uddalaysan deyishganlariga ishonaymi?

Ana shu yerda ehtiyot boʻlgin, agar amallaring faqat oʻzing tufayli boʻlayotganiga ishonib qolsang, yoʻldan adashasan (1).

Xulosa: insonlarga ishonch ber, yordam ber, ammo insonlarga ishonib qolma.

Ikkinchi maslahatim: hech kimga havas qilma, hasad ham qilma. Nima deganing bu endi?

Havas ham qilmasam, hasad ham qilmasam nima qilishim kerak unda?

Yanada aniqlashtiraman, eshit yoki oʻqi: mol-mulkiga, ilmiga, obroʻyiga, chiroyiga, oʻziniki boʻlmagan, undagi bor narsalarga havas ham qilma, hasad ham.

Havas yaxshi, lekin shunchaki havas, quruq orzudan boshqasi emas. Hasad esa oʻzing bilasan (2).

Insonlar otasiga, bobosiga, avvalgi oʻtgan avliyolarga havas qiladi-ku, nima bu yomonmi?

Ikki holat bor: bir insonga boylik berildi, bir insonga ilm berildi, ikkovi ham yaxshilikka sarfladi, berilgan narsasining orqasidan yaxshilik qildi, hammaga foyda berdi. Shunda havas qilsang, boʻladi.

Xulosa: quruq havasda yurma, koʻr-koʻrona havasda yurma, hasadni esa umuman qilma.

Hozircha shu, Bahodir. Alloh panohida boʻl, aytganlarimga amal qil, soʻzlarga mahliyo boʻlib, yana quruq havasda yurma.

Bahodir Mexriddin oʻgʻli.
Oʻzbekiston, Jizzax
4.11.2023

Eringizdan pul ololmayapsizmi, buning yoʻli oson

Ayollarning yana bir ilm olishiga amin boʻlyapman.

Judayam jahlim chiqyapti.

Kopirayterligim uchun har xil loyihalar bilan ishlayman.

Toʻgʻri aytishgan ekan: sen bilmagan narsangni qulisan.

Jamiyatda shunday ayollarimiz bor ekan, endi bilyapman.

Oʻzi bu mavzuga kirishga oriyatim yoʻl qoʻymaydi, lekin aytmasam boʻlmaydi.

Iltimos, ilmingiz yetmayaptimi, kerakli ilmni oling.

Oʻsha ilmni egasidan oling, har biznesvumen-u oʻzidan malikalarni yasab sizga bir nimalar oʻrgatadigandan emas.

Baʼzi ayollarimiz shunday holga tushib qoldimi, eridan pul olish, uni boshqarishni oʻzidan psixolog yasab olganlardan oʻrganishyapti.

Islomda er oʻz ahli ayoli uchun nafaqa qilib turishi aytilgan. Bu oddiy yechim.

Boshqa insonning hayoti bilan yashashni toʻxtating, boʻlmasa har kim oʻzingiz uchun ideal qilib olib, qarashlaringiz oʻzgarib boshlaydi.

Bu postda balki xato fikrlarim boʻlgandir, postni hissiyot bilan yozdim.

Bahodir Mexriddin oʻgʻli
Oʻzbekiston, Jizzax
29.10.2023

Chekish, ichish, narkomaniya – oʻzi aslida insonni nima oʻldiradi?

Insonni xiyonat oʻldiradi, xiyonat boʻlibam (boʻlib ham) oʻziga boʻlgan xiyonat.

Inson oʻziga qanday qilib qilib xiyonat qilishi mumkin degan fikr oʻtgandir hozir xayolingizdan.

Inson oʻz siyratiga xiyonat qiladi. Oʻziniki, aslida unga boʻlmagan ishlar uchun urinadi.

Toʻgʻri odam qilgan ishni odam qiladi, lekin har sohani oʻsha sohaga nisbatan muhabbatli boʻlgan insonlari qilgani oʻsha inson uchun ham, boshqalar insonlar uchun yaxshiroq menimcha.

2 hafta oʻzim umuman bilmagan, qiziqmagan ishda qatnab ishladim, shunchaki menga kompyuterni bilishim qoʻl keldi, ammo oʻsha ish hali ham men uchun tushunarsiz.

Toʻgʻri, bu hayotda har doim ham oʻzim sevgan sohada ishlayman, boshqasi kerakmas deya olmayman. Koʻpincha menga yoqmagani ortida men bilmagan hikmat yotadi.

Natija nima boʻldi, sekin tushunishni boshladim, ammo men qiynalaman, bir xil sharoitda, bir xil ishni qilishga. Yaʼni, rivojlanmasam qiynalaman. Yo oʻsha ishni oʻzgartirishim kerak, yoki tanaffus olishim kerak.

Hamma ham tashqi koʻrinishi orqali odamga oʻxshaydi, aslida asliyati kabi odam boʻlish juda qiyin, baʼzida.

Inson vaʼdasiga xiyonat qiladi, boʻlibam oʻziga bergan vaʼdasiga.

Nima uchun hozir baʼzi insonlarda vaʼdasiga vafo yoʻq, chunki oʻziga bergan vaʼdalari yolgʻon boʻlgan.

Oʻzini eng koʻp aldagan, oʻziga eng koʻp vaʼda berib bajarmagan oʻzi boʻlgan.

Men ham oʻziga eng koʻp vaʼda berganlardanman, shuning uchun ham ingliz tilini 6 yildan beri oʻrganaman.

Baʼzi insonlar savol berishadi, oʻzimga boʻlgan ishonchim tushib ketyapti, nima qilsam boʻladi deya.

Bittagina sodda yechim: shunchaki oʻzingizni bergan vaʼdangizni eng muhimi deb biling va uni bajarish uchun kerak boʻlsa, kam ovqat yeyishingiz, kam uxlashingiz, odamlarga kam qoʻshilishingizga toʻgʻri keladi, oʻzingizni bergan vaʼdangizni bajarguncha.

«Kema uchun eng xavfsiz hudud – qirg‘oq. Ammo u buning uchun yaratilmagan» degan ajoyib sitatani oʻqib qoldim.

Keyin bu fikrlarimni bir tomonlama qabul qilmang, oʻzingiz uchun xulosa oling, lekin shu ekanda toʻgʻri yoʻl deya darrov hazm qilmang.

Yana bir ishni baʼzi insonlar tavsiya berishadi: omma oldida vaʼda bering va keyin oʻsha ishni bajarishni boshlang.

Bu ham bir tomonlama toʻgʻri boʻlishi mumkin, omma oldida vaʼda berib, axiyri ilojsiz sharmanda boʻlmay deya ham oʻsha vaʼda qilgan ishini bajarganlar boʻlishi mumkin.

Hay mayli, postimiz ham Buyuk Xitoy devori kabi uzun boʻlib ketdi, shu yergacha oʻqib kelgan boʻlsangiz, tabriklayman, siz oʻzingiz uchun bir foydali ishni bajardingiz.

Vaqtingizga rozi boʻling, uni oʻta qadrlang, fikrlaringiz boʻlsa, izohda yozishingiz mumkin, foydali deb bilsangiz ulashishingiz mumkin. Keyingi postgacha)

Bahodir Mexriddin oʻgʻli
Oʻzbekiston, Jizzax
16.10.2023

Drabllar

Isrof yoki pulga kelgan arpalar

Bobo nabirasiga dakki berayotgan edi:
— Nimaga xaltadagi arpani toʻkding?
— Koʻzingga qarasang boʻlmaydimi?
— Tezda supurib ol...!

Nabira yerda sochilib yotgan arpalarni supurib, yerning pastiga tashladi.

Bobo nabirasini bu qilgan ishini koʻrib, yana uni koyidi:
— Nimaga bunday qilasan? Qilolmayman desang oʻzim qilardim. Shuncha arpaning har bitta donasi pulga kelgan-ku...

➖➖➖➖➖➖➖➖➖➖➖

Kola

Mardikorlik uchun bir uyga ishlashga borgan bola Coca-Colaning zararlari haqidagi videoni obdon eshitdi. Bundan keyin umuman kola ichmayman deya oʻziga soʻz ham berib qoʻydi va devorning bir chetida turgan zajgalka bilan sigaret tutatishni boshladi...

➖➖➖➖➖➖➖➖➖➖➖➖

Gʻiybat

Koʻrinishidan musulmonga oʻxshaydigan 50 yoshlardagi inson oʻz doʻstining «yangisidan bormi, odam zerikdi-ku» degan gapini eslab, uni «zinoxoʻr» deya yonidagi odamlarga uni ayblashni boshladi. Keyin esa uning bu suhbati shirin gʻiybatga aylanib qolganini oʻzi ham sezmay qoldi.

©Bahodir Mexriddin oʻgʻli yozdi.

Bahodir Mexriddin oʻgʻli
Oʻzbekiston, Jizzax
10.10.2023

21 yillik umr yashadim deyishga arziydimi oʻzi?

Yashash bu tabiiy jarayon. Yoʻq, bu xuddi oʻlmasak yashaymiz degan qarashga yaqin emas.

Dunyoga kelish. Ulgʻayish. Qarilik. Umrning oxirlashuvi.

Toʻgʻrisi, hozir nima deyishga hayronman. Shayx Yorqinjon qori ustoz (Alloh taolo rahmatiga olgan boʻlsin) bir suhbatlarida aytgan edilar: mana shuncha yashadingiz, shuncha umringizdan nima hikmat oldingiz, nima foydali ish qildingiz?

Insonni baʼzi bir savollarni ich-ichidan oʻziga berishni boshlaydi. Nima uchun bu hayotga keldim? Nimalar qilyapman oʻzi? Oʻzi nima qilishim kerak edi?

Yoʻq, bu yerda men falsafa haqida gapirmoqchi emasman, umuman falsafa haqida ilmim yetarli emas. Din taraflama ham aytmoqchi emasman. Chunki ular haqida soʻz ochishga hozircha haqqim yoʻq, yaʼni yetarli ilmim yoʻq.

Buncha bu bola ilmim yoʻq, ilmim yoʻq deydi, bildik ilming yoʻqligini deyapti «ichimdagi odamcha». Aslida bir haqiqat ham ana shunda: bilmasligingizni bilib, tan olishingiz.

Hayotim davomida koʻp insonlar bilan tanishdim. Doʻstlashdim. Bildim. Koʻrdim, koʻzlarim bilan.

Allohning fazli bilan hayotim davomida menga yordam bergan insonlar koʻp boʻldi. Yaxshi boʻlmasam-da yaxshi insonlarni yoʻlimga chiqardi, yoʻldosh qildi.

5 yildan beri uydan uzoqda yashash qanday boʻlishini bilib kelyapman. Bu oʻzgacha tuygʻu. Nimaga aytaymi? Haqiqiy neʼmatni neʼmatdan uzoqlashganimda bildim. Ungacha shunchaki koʻnikib qolish kasaliga chalinib yashaganman, xolos.

Shunday vaqtlar boʻldi, isitmamizdan oshkor boʻlmasin deb oʻzimizni kasal ekanligimizni oshkor qilmadik. Keyin bildik, bu bir neʼmat ekan.

Yosh bola holimizda halol mehnat qilamiz deya tuhmatlarga qoldik. Biz uchun bu jarayon notanish edi. Biz hayotni faqat kamalak rangida koʻrgan bir bola edik-da.

Keyin bilsak, bu ham katta neʼmat boʻlib chiqdi. Tarbiyamiz uyaltirmadi, sof vijdon bilan gʻolib boʻldik.

Din nima? Nimaga kerak oʻzi u? Namoz degani nima? Allohga ibodat qilish qanday boʻladi? Bular ham biz uchun qorongʻu zulmatdagi hali eshigi ochilmagan bir sirli xona edi.

Na bu xonaga qiziqqan edik. Na u xonani ochuvchi kalitga. Yoʻq, agar soʻzlarimda sal ogʻish boʻlgan boʻlsa, bu noqislik bizga xos. Oʻzimizcha bir nimalar deganday boʻldik. Vaqtingizga rozi boʻlasiz.

Bahodir Mexriddin oʻgʻli
Oʻzbekiston, Jizzax
5.10.2023

Mundarija bu yerda

1.Ona baribir ona-da: https://t.me/bahodir_mehriddin/570

2. Uch jumla: https://t.me/bahodir_mehriddin/594

3. Bu postni yozishga oʻsha bir kun undadi: https://t.me/bahodir_mehriddin/608

4. Bu post jamiyatning bir ogʻrigʻiga yechim bera oladi: https://t.me/bahodir_mehriddin/614

5. Olmaning tagiga faqat olma tushadimi? https://t.me/bahodir_mehriddin/616

6. Kerakligingizni his qilib yashang: https://t.me/bahodir_mehriddin/618

7. Tafakkur qilmasangiz, qayta oʻqing: https://t.me/bahodir_mehriddin/620

8. Qurʼon soʻzini toʻgʻri ishlataylik: https://t.me/bahodir_mehriddin/621

9. Oʻzini yaxshi koʻra olish xudbinlik(mi)? https://t.me/bahodir_mehriddin/622

10. Zamon senga boqmasa, sen zamonga boq: https://t.me/bahodir_mehriddin/623

11. Gʻaflatdagi doʻstim barchasi sen uchun: https://t.me/bahodir_mehriddin/624

12. Hammasi shu kuningdan boshlanadi: https://t.me/bahodir_mehriddin/627

13. Har bir inson oʻziga xos missiya bilan yuborilgan: https://t.me/bahodir_mehriddin/628

14. Yashasin Feminizm: https://t.me/bahodir_mehriddin/630

15. Insonni qayoqdan kelgani emas, qayerga borayotgani muhim: https://t.me/bahodir_mehriddin/632

17. Tafakkur vaqtini qanday oʻtkazsam boʻladi: https://t.me/bahodir_mehriddin/633

18. Qalbingiz arazlashiga yoʻl qoʻymang: https://t.me/bahodir_mehriddin/635

19. Ramazon kundaligi qoʻllanma: https://t.me/bahodir_mehriddin/637

20. Bu dunyoda yemagan somsangga ham pul toʻlaysan, oxiratda esa faqat «yeganingga» toʻlaysan: https://t.me/bahodir_mehriddin/649

21. Sizning ham «antiradaringiz» ishlayaptimi: https://t.me/bahodir_mehriddin/650

22. Hayotni anglash uchun 60 yoshga kirish shartmi: https://t.me/bahodir_mehriddin/651

23. Axir har bir goʻzallik uchun qilingan oroyishlar erkak uchun emasmi: https://t.me/bahodir_mehriddin/654

24. Hamma narsani bilishga bildik-ku, ammo haddimizni bilmadik: https://t.me/bahodir_mehriddin/656

25. Hamma narsani bilishga bildik-ku, ammo haddimizni bilmadik: https://t.me/bahodir_mehriddin/657

26. Ozgina pul bilan ham tez boyib ketishni xohlaysizmi: https://t.me/bahodir_mehriddin/658

27. Iymon koʻzoynagi bilan tomosha qilingan dunyo hech qachon xira koʻrinmaydi: https://t.me/bahodir_mehriddin/660

28. Yomon inson ham yoʻq, yaxshi inson ham yoʻq, faqat yaxshi ustoz bor: https://t.me/bahodir_mehriddin/661

29. Qachonki olishni emas, berishni ham oʻrgansangiz, keyin ikki hissa olishni boshlaysiz: https://t.me/bahodir_mehriddin/668

30. Ustozlarning ilmidan bahramand boʻlish ham bir neʼmatdir aslida: https://t.me/bahodir_mehriddin/670

31. Agar siz uchun oʻqishga kirish STATUS boʻlsa, universitetda oʻqimaganingiz maʼqul: https://t.me/bahodir_mehriddin/671

32. Ota-onangiz siz uchun har doim yaxshilikni ravo koʻradi(mi?): https://t.me/bahodir_mehriddin/672

33. Bu xatni boʻlajak jufti halolimga atab yozdim: https://t.me/bahodir_mehriddin/674

34. «Men faqat oʻqiganga turmushga chiqaman» deb shart qoʻyayotgan oʻqimishlilar: https://t.me/bahodir_mehriddin/675

35. Eshitdingizmi, qoʻshnining qizi qaytib kelibdi: https://t.me/bahodir_mehriddin/676

36. 21 yillik umr yashadim deyishga arziydimi oʻzi: https://t.me/bahodir_mehriddin/679

37. Qisqa hikoyalar: https://t.me/bahodir_mehriddin/681

38. Chekish, ichish, narkomaniya – oʻzi aslida insonni nima oʻldiradi: https://t.me/bahodir_mehriddin/682

39. Eringizdan pul ololmayapsizmi, buning yoʻli oson: https://t.me/bahodir_mehriddin/684

40. Haqiqat haqiqatan ham achchiq boʻladi: https://t.me/bahodir_mehriddin/685

41. Bir kun kelib asliyatimizga qaytamiz: https://t.me/bahodir_mehriddin/687

42. Baʼzan dunyoga tushunmay qolaman: https://t.me/bahodir_mehriddin/688

Bahodir Mexriddin oʻgʻli
Oʻzbekiston, Jizzax
1.10.2023

Eshitdingizmi, qoʻshnining qizi qaytib kelibdi...

Yozilayotgan va oʻqilayotgan har bir soʻzimizni insonlar uchun foydali qilishidan umidvormiz.

Jamiyatni ichidan yemiradigan, aynan jamiyatni, balki har bir insonni ichidan yemiradigan, koʻplab balolar boshiga kelishiga sabab boʻladigan bir yomon illat bor. Bu – gʻiybat.

Muhammad Abdulhay Laqhvaniy rahimahullohning «Gʻiybat oʻzi nima» (ustoz Yorqinjon qori Fozilov tarjima qilganlar, ustozdan Alloh rozi boʻlsin) kitoblarini oʻqishni boshladim.

Nima deb oʻylaysiz, oʻzi gʻiybat haqida kitob oʻqish kerakmi?

Kitobda yozilganlaridan shunchaki yoqa ushladim. Chunki, biz koʻpchiligimiz bu illatdan toʻliqligicha xabardor emasmiz.

Baʼzi insonlar bor: boshqa bir insonning hamma ayblarini oqizmay-tomizmay gapirib, oxirida gʻiybat boʻlib qolmasin, oʻzi eshitsa xafa boʻlishadi deyishadi, baraka topishsin.

Yana baʼzi holatlar bor: men bu gaplarimni gʻiybat qilinayotgan insonning oʻziga ham ayta olaman deyishadi, yaʼni ham orqasidan, ham oʻzining oldida ham.

Gʻiybat shunday yomon ish ekanki, hatto Alloh buyurmagan ish(zino)dan ham ogʻirroq gunoh ekan.

Aynan nima uchun ogʻir? Chunki bir xato ishni bilmasdan qildingiz, keyin bilib tavba qildingiz. Bilib turib, yana oʻsha xato ishni qildingiz, yana tavba qildingiz. Alloh taolo buni kechiradi.

Ammo bir insonni gʻiybatini qilsangiz-u, gʻiybat qilgan insoningizdan oʻziga aytib, uzr soʻramasangiz, bu qilgan xatoyingiz kechirilmaydi, agar gʻiybat qilgan inson sizni kechirmasa.

Bu maʼlumotlarni «Gʻiybat oʻzi nima» kitobi orqali bildim va sizga ham shu kitobni oʻqishni tavsiya beraman.

Koʻplab xato ishlarimizga shu besuyak tilimiz sababchi boʻladi-yu, biz bilmay qolamiz.

Agar soʻzlarimizda haddimizdan oshishlar va xatolar boʻlgan boʻlsa, Oʻzi ofiyat bersin va toʻgʻri yoʻlga boshlasin. Vaqtingizga rozi boʻling.

Kitobni elektron holda oʻqish uchun: https://e-hilolnashr.uz/catalog/detail/iibat-zi-nima

P. S. Tilimiz uchun roʻza tutish vaqti keldi.

Bahodir Mexriddin oʻgʻli
Oʻzbekiston, Jizzax
22.09.2023

«Men faqat oʻqiganga turmushga chiqaman» deb shart qoʻyayotgan oʻqimishlilar

Baʼzan ilm olishdan ham qoʻrqib qolaman. Chunki ilm olsangiz-u, unga amal qila olmasangiz bu sizning faqat zararingizga kifoya boʻladi.

Baʼzan johilligimdan qoʻrqib ketaman, qancha ilmlilar oʻzining darajasini past sanab turganda men oʻzim bitta aqlliday goʻyo.

Hozirgi paytda zamonning zayli bilan ilm olish uchun hech qanday toʻsiqlar yoʻq, agar toʻsiqlar bor desangiz, bu sizning qarashingiz.

Baʼzan shunday gaplarni eshitib qolaman, men faqat oʻqiganga uylanaman, diplomi borga turmushga chiqaman.

Hech qachon oʻqigan, ilmli inson oʻzining ilmli ekanligi bilan maqtanmaydi, oʻzini osmondagi oy kabi koʻrsatmaydi.

Baʼzan shunday erkaklarni uchrataman, oʻqigan, diplomi boʻlsa, oilaga qarashadi-da, nima faqat oila menga kerakmi deb qolishadi baraka topishsin, rizqi keng boʻlgurlar.

Balki aytishingiz mumkin, buning nimasi yomon, ayol oʻzi xohlab ishlasa, oilasiga qarashsa yaxshi-ku deya. Toʻgʻri, buning hech yomon tomoni yoʻq deb oʻylaysiz, ammo erkak boshqaruvga va himoya qilishga moyil. Vaqti kelib, ayol mustaqillikka intilishi va jufti halolimning yordami men uchun shartmas deya fikrlar oʻtib qolishi mumkin.

P. S. Jamiyatimizdagi yigit-qiz munosabati, muhabbat borasidagi va oilaviy munosabatlardagi boshimizdan oʻtkazayotgan muammolarga 55 ta noyob yechimlarni taklif qiluvchi asar tarjimasi tayyor boʻlyapti, inshaalloh.

Bahodir Mexriddin oʻgʻli
Oʻzbekiston, Jizzax
12.09.2023

Bu xatni boʻlajak jufti halolimga atab yozdim

Men uchun sevimlilar ichida sevimli boʻladigan ey koʻzlari qora, sochlari undanda qora, koʻzlari bilan faqat yerni chizadigan xonim. Sizga ozginadan sal kamroq(qanday oʻlchov boʻldi oʻzim ham tushunmadim)dil izhorlarim bor.

Bu dil izhorlarim shunchaki bittada rom qilish-u, hali bajarilishi aniq boʻlmagan vaʼdalardan iborat boʻlishini xohlamadim.

Hayotingizning 1/3 qismi men bilan oʻtishini hisobga olsak, demak bu anchadan koʻproq(shunday xonim, mening oʻlchovlarim dunyo oʻlchovlariga toʻgʻri kelmaydi, aytib qoʻyay) birga boʻlasiz degani.

Xoʻp boʻladi, shu umringizning yarmidan koʻpini men bilan manfaatli, xayrli va rozi boʻlgan holingizda oʻtkazish uchun men tayyormanmi? Siz tayyormisiz?

Uchta oddiygina savolimni bersam maylimi, ey Yaratganning eng goʻzal yaratigʻi.

Sizning oila qurishdan maqsadingiz ne? Shartmi umringizni bir qayerdagi keyinchalik eng yaqiningiz boʻladigan begona bilan oʻtkazish?

Dunyo sababiyat ustiga qurilgan ekan, biz ertaga bizdan keyin yuzimizni yorugʻ qiladigan, odamlarning nima deyishini ham oʻylab koʻrmasdan Robbining buyrugʻi neligi bilan qiziqadigan va eshitgani zahoti oʻsha joyida amalda qoʻllaydigan shirindan shakar farzandlarimizni tarbiya qilishga tayyormizmi? Siz tayyorsizmi?

Oʻzimizni isloh qilishda bardavom boʻla olamizmi? Siz bardavom boʻla olasizmi?

Allohning bergan vaqt atalmish neʼmatini biz Oʻzining roziligi uchun yashab, haqiqiy qul kabi bu ijaraga olingan dunyodan yuzimiz kulgan holda, tabassum bilan oʻta olamizmi?

Uylanish. Turmush qurish. Oila. Jamiyat tarafidan bu tushunchalarni oddiy qabul qilinadigan «bir kunlik toʻy» kabi qabul qilinishini xohlamayman.

Niyatimiz toʻgʻrimi? Oila qurishdagi niyatingiz toʻgʻrimi? Nima boʻlsa ham, Allohning taqdiri deya koʻna olamizmi? Koʻna olasizmi? Sabrimiz yetadimi?

Xatolarim, yaʼni gunohlarim bor. Bilgan, bilmagan va aynan bilib qilgan. Farishta emasman, haqiqiy rijol ham emasman. Tan olaman.

Minnatdorman. Haliyam yashayotganligimdan. Menga umr berganidan.

Men xohlayman, jufti halolim uchun eng yaxshisini berishga. Nimaga eng yaxshisi? Chunki u munosib bunga.

Nima uchun munosib bunga? U erining roziligi qanday maqomda ekanligini biladi. U ilmga muhabbati, shijoati va amali qanchalik koʻpaysa, jufti haloli uning uchun barchasiga tayyorligini tushunadi.

Bahodir Mexriddin oʻgʻli
Oʻzbekiston, Jizzax
7.09.2023

• Kitob oʻqimaydigan chiroyli xotindan kitob oʻqiydigan chiroyli xotin yaxshi.

© Ustoz Gʻiyosiddin Yusuf