#ahvolimiz
Jamiyatimizda shunday odamlar borki, xulqidan lol boʻlib, yoqa ushlaydi kishi3 ta Nuqta
Shahar markazidan chetroq hududga borishim kerak edi. Oʻzimga qulay boʻlishi uchun koʻchada duch kelgan taksida emas, oʻsha hududga qatnovchi mashinalar turadigan qoʻnim tomon yoʻl oldim, harholda, ular men borajak manzilni koʻcha taksisidan koʻra durust biladi. Koʻzim ojizligi boizidan bir ukamiz xolisona yordam bermoqni ixtiyor aylab, qoʻlimdan tutdi va biz qoʻnim sari ildamladik.
Keldik3 ta Nuqta
Ukamiz haydovchiga yuzlanib dedi:
- Akajon, qori akamizni falon joyga tashlab qoʻya olasizmi?
Haydovchi nuqsonimni qulogʻimda deb oʻyladi chogʻi (kinoya mazmunidagi gapni tushundingiz degan umiddamiz, zero, koʻzimizdagi nuqson koʻzga tashlangulik), pichirlab:
- Boʻldi, tashlaymiz. Bu, pullari bormi? Haligi, yoʻlkira oʻn ming soʻm-da,- deb qolsalar boʻladimi? Sizga aytsam, koʻzi ojizlar bundayin vaziyatlarga umrlari davomida qiryuz yoxud fitfillion bor duch keladilar.
Endi siz savol berasizki, buning nesi yoqa ushlagulik, deb.
Javob quyidagicha:
Birinchidan, aqliy jihatdan sogʻlom kishilar tabiiyki, choʻntaklarida aqcha boʻlganidagina mashinaga chiqadilar, uzr, xatto, telbalar ham.
Ikkinchidan, koʻzi ojiz degani kar degan maʼnoni bermasligini idrok etishdek baxtga muyassar boʻlmaganlargina, ularning shundoqqina oldida pichirlab, pullari boʻlmasa, olib keta olmayman, menda ham roʻzgʻor bor deganga oʻxshash gaplarni savoliga javob kelmasdanoq tiqishtiradi.
Uchinchidan, soppa-sogʻlom kishi bunaqangi savolga duch kelganmikin? 99 kishi: - yoʻq, 1 kishi: - ha3 ta Nuqta
Xullas, haydovchining koʻnglini toʻq qilib, yaʼni yoʻlkirani oldindan toʻlab, yoʻlga chiqdik. Qizigʻi, haydovchi akamiz mendan boshqa yoʻlovchilarning puli bor-yoʻqligiga qiziqmadi, yoʻl haqqining qanchaligi xususida eskartish qilmadi, oilasini boqishi darkor ekani toʻgʻrisida vaʼz oʻqimadi.
Oradan chamasi yarim soat oʻtgach, mashinaga chiqqanidan buyon tinimsiz telefonda kim bilandir hiringlashib kelayotgan bir qiz mashinadan tushishni istab qoldi va tushar jafosiga:
- Akajooon, ikki mingina pulim qolibdi, bu safarga shuni olib turing,- deb qolsa boʻladimi, erkalanib, nozlanib, xiylagina suzilib.
Haydovchi akamiz boyagi vaʼzlarni-yu oilaparvarlikni unutdi,qoldi, eridi, mardlandi va ikki mingdan-da bosh tortdi. Qoʻshimchasiga menga murojaat ohangida izoh ham berib qoʻydi:
- Odamga savob ham kerak-da. A, qori, nima dedingiz?
Indamadim, zero javobga hojat yoʻq edi3 ta Nuqta
Bu shunchaki dengizdan bir tomchi xolos, zero bundan-da ziyod muammolar talaygina bizda.
© Yodgorjon Zokirjonov
