dilm

***

xabar ol undan
holidan xabar ol

«yaxshimisan?», de
«ishlaring qalay?», de

o'zidan-o'zi
bemaqsad
xabar ol undan

«seni eslagandim», de
«o'zing yaxshimisan?», de

eslaganingni ayt
gaplaringni ayt
xabaringni ayt

xabar ol undan,
balki, u o'lgandir…
tirikmikin o'zi?
xabar ol.

2023

***

senga
kim bo‘lib
ko‘rinaman?
uzun soqolli
erkakmi?
yoki
nechidir yoshdagi
yoshbola bo‘libmi?
kim bo‘lib
ko‘rinaman senga?
hassos ijodkor bo‘libmi?
hassos inson bo‘libmi?
hassos…
yigit bo‘libmi?
o, hassoslik qursin...
senga
qanday ko‘rinaman?
g‘amgin, siqilinch bo‘libmi?
yoki
ko‘p kuladigan
tez-tez hazil qiluvchi
qiziqchi bo‘libmi?
senga
kim bo‘lib
ko‘rinaman?
do‘sting bo‘libmi?
yaqining bo‘libmi?
tanishing bo‘libmi?
senga
kim bo‘lib ko‘rinaman?
yig‘loqi bo‘libmi?
yig‘lamas bo‘libmi?
sen
meni
yig‘laganimni
ko‘rmagansan-ku?
senga
kim bo‘lib
ko‘rinaman?
sevib qolganmisan meni?
hech sevib ko‘rganmisan meni?
sevib
qolganingda
qanday ko‘rinaman men?
men
o‘zi ko‘rinamanmi?
qachon ko‘rding meni?
so‘nggi bor, qachon ko‘rding?
umuman, o‘zi
hayotingda
meni
ko‘rganmisan?
senga
kim bo‘lib
ko‘rinaman?
uzun soqolli
erkak bo‘libmi...

2022

***

bir kuni
uyimga kelsam –
seni ko'raman.
ungacha esa,
uyimga kelib turibman
o'sha bir kunni kutib.

2023

hammasini yozib qo'ysam nima bo'lishi haqida

kulaman
yig'layman
kulaman
yig'layman
kulaman.
tugamaydi bu holat.

2023

***

sen yaxshi eding,
baribir,
ko'zlaring o'zingniki,
yuraging,
tabassuming…
hatto,
meni yomon ko'rib qolsang ham
o'zing bo'lib yomon ko'rasan
qanday qilasan buni?
mendan
rostakam xafa bo'lasan.
men sening o'zingdan
«uzr» so'rayman keyin.
kechirmaysan.
chunki sen –
o'zingsan,
sen o'zing xafa bo'lasan mendan
bir o'zing.
qanday qilasan buni?
men sendan
faqat sendan
keta olmayman.
sendan ketgan
boshqa bir
dilmurod bo'ladi.
ahmad ali bo'ladi masalan.
men esa
sendan keta olmayman.
sen yaxshi eding,
baribir.
sen o'zing eding.

2023

***

quyoshga
uzoq tikilib turolmayman
oyga ham
senga qarab turardim ko‘p vaqt
agar yonimda bo‘lsang.

2022

Maktub

Nega seni Sayyoh deyishimni bilmayman ochigʻi, shunchaki boshqa nom yoʻq menda, isming aytgani erinarman balki. Seni sevmasligingni allaqachonlar bilaman buni kutganim ham yoʻq. Istamayman ham ochigʻi, seni sevib qolganim ham yoʻq. Goʻyoki bu olma sotib olishga oʻxshaydi, sen qizil olma qidirasan, topolmaysan, soʻngra boshqa turdagisini olaverasan. Keyinchalik qizil olmani topasan. Ammo olmaysan endi keragi yoʻq uyda olmalaring juda koʻp. U chirib ketadi deysan. Va shunchaki e'tiborsiz qoldirasan. Va bari tamom. Men doimgidek yashayabman ba'zan soatlarda ba'zan kunlarda yashash uchun sabab topyabman oʻzim uchun. Oʻz dunyom hali ham barbod boʻlgani yoʻq. Seni zarracha ham kutganim yoʻq. Oʻzing istagan kun hayotimda oʻrning qolmagan.
Ha ahmoqman chindan, va ulardek sogʻ ham boʻlolmayman hech qachon, meni dardlarimni ham sevishingni istamayman, hayotim zerikarli deyolmayman ahmoqliklarimni  hisobga olsam bunday emas. Meni kuchsiz deb oʻylaysan negadir, balkida meni chindan bilmaysan, bu qiziq emas istamayman ham. Sen telbasan chindan. Va negadr sendan hafa ham boʻlmayman. Umuman hissiz. Oyogʻingni ham atayin bosganman, yana buni bilib turib. Mendan nafratlanishingni istaganman.

Va seni kech uchratganim ham kundaligim ham biron nimani anglatmaydi.....

Sabo
9 oktabr, 2023 yil.

Hammasi o'sha tip-tiniq osmonni qidirganimda  boshlangan edi...
Bir paytlar... Osmonda
oppoq toshbaqalar suzib  yuradigan o'sha paytlar,  menga bular bulut deyishsa  ishonmas edim. Bilmadim  menda bunday xulosa  qayerdan paydo bo'lgan ekan. Bilganim, osmonda oppoq va  katta- kichik toshbaqalar  suzib yurardi, boshqa gap  yo'q. Yomg'ir yoqqan paytlari  toshbaqalar qayerda qoldi  ekan deb achinganlarim, qor  yoqqanda sovuqda kasal  bo'lib qolishmasa bo'ldi deya  havotirlanganlarim ham o'sha  bir paytlar edi.  Atrofimdagilarni bular oddiy  bulut ekaniga ishontiraman  deb chiranishganlarini eslasa- a-am... Qanchalar o'jar bo'lganman-a?! Lekin bir amallab  yomg'ir degan narsani shu  toshbaqalar paydo qilishiga  ishontirishgan edi. Keyin o'zim toshbaqalarni bulut ekanini bilganimda esa...  E, xudoyim, ularni qanchalik  yomon ko'rib qolgandim. Meni aldaganliklari uchun. Axir ular  biror marta "toshbaqa  emasmiz" deyishmagan-da.  Aytilmagan gaplar ham  yolg'on o'rnida bo'ladi ba'zan. Ana shu yolg'onchilardan  arazlab  toshbaqasimi, bulutimi nimasi  bo'lsa ham, umuman  shulardan holi tip-tiniq osmon izlab qoldim. Va hammasi  mana shundan boshlandi. Osmon qolib yerdagi toshbaqalar, yerdagi  yomg'irlar... Tortishish qonuni  teskari ishlab ketganday tuyuladi ba'zan. Nimani qidirsang aksiga uchraysan. Ehtimol,  osmon qanday bo'lsa  shundayicha qabul qilish  kerakdir! Ko'nikish kerak, ha, ko'nikish!

Aziz Nur

***

sen kulishni
bas qilmasang edi…
men
kulishni
to'xtatmasdim!

2023

***

yozganlarim –
menga tegishli emas.
ular –
yuragimga tegishli.
ammo,
yuragim sodda
u «muallifman» demaydi.
u –
uni sevishlarini xohlaydi, xolos.

2023

***

adabiyotga jahl qilsang bo‘ladi -
agar uning otasi bo‘lsang.

adabiyotga mast bo‘lib kelsang bo‘ladi -
agar uning otasi bo‘lsang.

adabiyotga e’tibor bermasang bo‘ladi -
agar uning otasi bo‘lsang.

eng zo‘ri -
adabiyotdan ketsang bo‘ladi,
otasi bo‘lsang uning.

menga tuyulaveradi
adabiyotning otalari
qasos olyaptimi, deb.

2023

***

seni uchratsam
aytaman deb
gaplarimni to'plab qo'ydim.
ba'zilari
esimdan chiqmoqda.

2023

***

men senga
tushuntirishni –
seni sevishimni
aytishdan
boshlayman.

2023

***

sog'inishga
hech kimim
qolmadi.
yig'lagim
kelmoqda.

2023

***

qayerda edi
«sevaman» degan
maktubing…
bormidi o'zi u?
uyqim kelmay o'ylayapman.

2023

***

ehtimol
sen uni shaharda
so'nggi bor
ko'rayotgandirsan –
oilasini sog'ingan insonni.

2023

***

hammaning
o'z yo'li bor
deysan
men o'z yo'limdan ketayotib
seni uchratib qoldim.

2023

***

sababsiz qo'ng'iroq qil…
gaplashaylik!
nimadir haqida
sen istagan –
har qanday mavzu haqida.
sababsiz qo'ng'iroq qil
jim bo'lib qolaylik
orada,
axir sen
«nima gap o'zi?»
deganimda
indamay qolasan
«hech gap yo'q»
deysan.
sababsiz
qo'ng'iroq qil,
gaplashaylik…

2023

***

meni sevmasligingni
aytma menga
boshqa gap yo'qmi
aytishga?
soat nechi bo'ldi?
havo qanday
ertaga quyosh chiqadimi?
nima yangiliklar
kim o'libdi
qanday o'libdi?
mashinasini
tez haydagan bo'lsa kerak-da!
yomg'irda
mashina haydash qiyin
ertaga quyosh chiqsa
shunda haydash kerak.
tunda ham qiyin
mashina haydash
yurish ham qiyin
quyoshda yurish qiyin
soat nechi bo'ldi?
havo qanday?
meni sevmasligingni
aytma menga
soat nechi bo'ldi?
ertaga yomg'ir yog'masin-da.

2023

***

muhabbat zamonga qarab
o'zgardi, deysan.
men seni –
eskicha sevib qoldimmi…
endi seni unuta olmaymanmi?

2023