Abdulqodir Samarqandiy

ХАЛҚНИНГ МУЛКИ
Имом Бухорий роҳимаҳуллоҳнинг “Саҳиҳ”ида Нофиъ розияллоҳу анҳудан ҳадис келади:
“Умар розияллоҳу анҳу хазинадан аввалги муҳожирларнинг ҳар бирига тўрт минг дирҳамдан пул берди, аммо ўғли Абдуллоҳга уч минг беш юз дирҳам берди. Кишилар ундан нега ўғлига бошқалардан оз пул берганини сўрашди. Умар розияллоҳу анҳу деди:
-У қолганлар каби ёлғиз эмас, балки отаси билан бирга ҳижрат қилган эди!”.

Халқнинг молини муҳофаза қилиш энг буюк ибодатдир. Чунки бу барчанинг мулкини сақлашдир.
Халқнинг молини исроф қилиш эса ҳар бир шахсга қилинган хиёнатдир. Чунки бу барчанинг молини исроф қилишдир.
Қанча-қанча олди-бердиларда кишилар ўз яқинлари томонига ён босишади.
Қанча-қанча мансаб ва вазифалар таниш-билишчилик орқали қўлга киритилади.
Кўпчилик инсонлар қандайдир шахсларнинг мулкидан эҳтиёт бўлишади, аммо омманинг мулкига эътиборсиз бўлишади.
Йўл қуриш, иншоотлар бино қилиш, қандайдир проектларни амалга оширишда хиёнатга йўл қўйиш аслида якка шахсларга қилинган хиёнатдан оғирроқдир.
Чунки якка шахсга қилинган хиёнатда қиёмат кунида бир киши олдида тик турсангиз, оммага қилинган хиёнатда ҳар бир фуқаро олдида жавоб берасиз!!!

Хайрли кун!!!

https://t.me/Abdulqodir_Polvonov

ЎЗ ЖИНСИДАН…
Имом Аҳмад роҳимаҳуллоҳ ўзининг “Муснад”ида Оиша розияллоҳу анҳодан ҳадис келтиради. Оиша розиялооҳу анҳо дейди:
“Бир куни менинг ҳузуримга Абдурраҳмон ибн Авф келди ва деди:
-Эй онажон! Молимнинг кўплиги мени ҳалок қиладими деб қўрқаяпман. Қурайшнинг ичида мендан бой инсон йўқ!
Оиша розияллоҳу анҳо деди:
-Уни инфоқ қилгин!”.

Оиша онамиз розияллоҳу анҳу бизга буюк бир сирни ўргатмоқда. Садақа неъматнинг жинсидан бўлиши афзалдир.
Бойнинг фарзлардан кейинги идеал ва намунали ибодати нафл рўза эмас, садақа қилишдир.
Қозининг идеал ва афзал ибодати зуҳо намози эмас, балки ҳукмда адолат қилишидир.
Пудратчининг идеал ибодати кечаси қоим бўлиш эмас, қурилишда хиёнат қилмасликдир.
Савдогарнинг идеал ибодати умранинг ортидан умра қилиш эмас, балки савдодаги ростгўйликдир.

Аллоҳ сизга нима неъмат берганига назар солинг. Унинг закоти ўз жинсидандир!!!

https://t.me/Abdulqodir_Polvonov

ҲАҚДА БЎЛИНГ…
Ахнас ибн Шариф мусулмон бўлишидан олдин Бани Зуҳра қабиласи билан иттифоқдош эди. Шомдан келаётган Абу Суфённинг карвонига мусулмонларга қарши ёрдам бериш учун мушриклар билан бирга чиқди. Уларга йўлда карвон мусулмонлардан қутилиб чиққани ҳақидаги хабар етиб келди. Аммо Қурайш мусулмонлар билан жанг қилиш учун Бадрга йўл олди. Ахнас ибн Шариф эса иттифоқдоши бўлмиш Бани Зуҳра қабиласига қайтишга ишора қилиб деди:
-Бадрга боришларинг шарт эмас. Карвонларинг Абу Суфён билан бирга мусулмонлардан қутилди!

Уларнинг бари ортга қайтди. Бани Зуҳра қабиласидан Бадрда бирор киши ўлмади”.

Аллоҳ таоло бу динни кишининг ақлига келмайдиган йўллар билан ҳимоя қилади. Аллоҳ Ахнаснинг қалбига шу фикрни ташлади. У кишиларга ўз фикрини айтди. Кишилар эса унга итоат қилишди.
Мана шу инсонни сабаб қилиб Аллоҳ Бадрдан кўп сонли мушриклар қўшинини буриб юборди.
Жанг тартиби билан кўп ҳам машғул қилаверманг ўзингизни. Аллоҳ таоло динини ҳатто шайтонни сабаб қилиб ҳам ҳимоя қилаверади. Сиз ҳақ томонда бўлишга ҳаракат қилинг, тамом!!!

https://t.me/Abdulqodir_Polvonov

ИСТАК
Имом Тирмизий роҳимаҳуллоҳнинг “Сунан”ида келади:
“Халифа Умар ибн Хаттоб розияллоҳу анҳу Байтулмолдан мусулмонларга пул тарқатаётиб Усома ибн Зайд розияллоҳу анҳуга беш минг дирҳам берди. Ўзининг ўғли Абдуллоҳ ибн Умар розияллоҳу анҳуга эса икки минг дирҳам берди. Шунда Абдуллоҳ отасига эътироз билдириб деди:
-Усомани мендан устун кўрдингиз, ҳолбуки мен у қатнашмаган жангларда ҳам қатнашганман!
Шунда Умар розияллоҳу анҳу деди:
-Набий саллоллоҳу алайҳи ва саллам Усомани сендан кўра кўпроқ яхши кўрар эдилар, отаси ҳам у зот учун сенинг отангдан кўра суюклироқ эди!”.

Умар розияллоҳу анҳунинг ҳассослигига боқинг. Ўзининг истагини эмас, Набий саллоллоҳу алайҳи ва салламнинг хоҳишларини устун кўрмоқда.
Биз ҳам Набий саллоллоҳу алайҳи ва салламнинг яхши кўрган нарсаларига эътиборсиз бўлмаслигимиз лозим. Ўз истагимиздан у зотнинг истакларини устун кўришимиз керак.
У зот истаган нарсаларни қилиб, истамаган нарсалардан сақланишимиз лозим.
Ҳақиқий ошиқ ошиқ бўлган инсонининг истакларини ўз истаги деб билса муҳаббат чўққисини забт қилган бўлади!!!

https://t.me/Abdulqodir_Polvonov

ҲАҚ
Имом Аҳмад роҳимаҳуллоҳ ўзининг “Муснад”ида келтиради:
“Саҳобалардан Имруъул Қайс деган кимса ер борасида Рабиъа ибн Ийдон билан хусуматлашиб Набий саллоллоҳу алайҳи ва салламнинг олдиларига келди. Ер уники бўлсада, ҳужжат ва далили йўқ эди. Набий саллоллоҳу алайҳи ва саллам ундан сўрадилар:
-Ер сеники эканлигига далилинг борми? Йўқса унга қасам ичтираман!
Имруъул Қайс деди:
-Агар у қасам ичса еримни ўзиники қилиб олади-ку!
Шунда Набий саллоллоҳу алайҳи ва саллам дедилар:
-Ким бир нарсага эга бўлиш учун ёлғон қасам ичса қиёмат кунида Аллоҳ таоло унга ғазабнок ҳолда рўбарў бўлади!
Имруъул Қайс деди:
-Эй Аллоҳнинг Расули! Ҳақ бўлатуриб ҳаққидан воз кечган кишига нима бор?
Расулуллоҳ саллоллоҳу алайҳи ва саллам дедилар:
-Жаннат!
Имруъул Қайс деди:
-Мен ердан воз кечганимга сизни гувоҳ қиламан!”.

Баъзан уришиб талашгандан кўра ҳақдан орқага чекиниш хайрлироқ бўлади. Аммо ёдимиздан чиқмасин, бу дин хорлик ёки қўрқоқлик дини эмас.
Инсон ишларни тарозига солишни билиши керак. Қайси бир иш тинч ва кишини Аллоҳга яқин қилса ўшани танлаши лозим. Истаса ҳаққини Аллоҳ учун тарк қилади ва ажрини Аллоҳдан олаверади. Истамаса ҳаққи учун курашади. Бу эса унинг ҳаққидир!!!

Хайрли тонг!!!

https://t.me/Abdulqodir_Polvonov