Toshkent shahar maktabgacha va maktab ta'limi boshqarmasi

Aziz hamshaharlar!
Hurmatli ustoz va murabbiylar!
Qadrli o'qituvchi va tarbiyachilar!

✅Yana sanoqli soatlardan so'ng, jannatmakon diyormizga yangi — 2025 yil kirib keladi.
Ana shunday shukuhli damlarda barchangizni ushbu qutlug' ayyom bilan chin qalbimdan samimiy tabriklayman.

Poyoniga yetayotgan 2024 yil el-yurtimiz uchun qut-barakali va omadli keldi. Eng muhimi, yurtimizda tinchlik-osoyishtalik, turli xalq va millat vakillari o'rtasida do'stlik hamda hamjihatlik hukm surmoqda.

Muhtaram Prezidentimiz va davlatimizning oqilona siyosati tufayli barcha sohalar kabi ta'lim-tarbiya tizimida ham bir qator ijobiy natijalarga erishdik. Yangi va bir-biridan ko'rkam zamonaviy maktablar, maktabgacha ta'lim tashkilotlari qurilib foydalanishga topshirildi. Jumladan, Sergeli, Mirobod, Olmazor, Yashnobod, Chilonzor hamda Shayxontohur tumanlaridagi 8 ta maktabgacha ta'lim tashkilotlari to'liq rekonstruktsiya qilinib, qo'shimcha 2 760 ta o'rin yaratildi.

Toshkent shahar maktabgacha va maktab ta'limi boshqarmasi tasarrufidagi umumta'lim maktablarida faoliyat ko'rsatayotgan 24 ming 527 nafar oliy ma'lumotli o'qituvchilarning 61,9 foizini malakali o'qituvchilar tashkil etib, ularning 2748 nafari (10,6%) oliy toifaga, 5286 nafari (20,4%) birinchi, 7168 nafari ikkinchi malaka toifasiga ega.

Pedagoglarga malaka toifasini berishning yangi tartibi asosida 2024 yil bahorgi mavsumda o'tkazilgan test sinovlarida Toshkent shahridan ishtirok etgan 9980 nafar o'qituvchining 5337 nafari (53,5%), kuzgi mavsumda ishtirok etgan 7319 nafar o'qituvchining 4239 nafari (58%) o'z malaka toifalarini bir pog'onaga oshirishga erishgan.

Yuqoridagi kabi ijobiy natija va ko'rsatkichlarni misol qilib ko'plab keltirishimiz mumkin, albatta. Bular avvalo yurtimizda ilm-fanni rivojlantirish, ta'lim-tarbiya sifatini oshirish yo'lida qilinayotgan keng ko'lamli ishlarning samarasidir.

E'tiborlisi, Toshkent shahri maktablarini 2024 yilda tamomlagan 33847 nafar o'quvchining 23189 nafari (68,5%) oliy ta'lim muassasalariga o'qishga qabul qilindi. Davlat OTMlariga kirish sinovlarida ishtirok etgan bitiruvchilarning 2024 yilda to'plagan o'rtacha ball ko'rsatkichlari 80,5 balni tashkil etib, 2023 yildagi 76,3 ballga nisbatan 4,2 ballga oshgan. Bu borada Toshkent shahri Respublika bo'yicha eng yuqori uchtalikdan o'rin oldi.

Shuningdek, 2024 yilda o'tkazilgan umumta'lim fanlari olimpiadasining maktab bosqichida 1453 nafar, tuman bosqichida 2500 nafar, shahar bosqichida 52 nafar o'quvchi g'oliblikni qo'lga kiritdi.
Fan olimriadasining Respublika bosqichida 9 nafar o'quvchimiz 1-2-3-o'rinlarni egallab, medallar soni bo'yicha Toshkent shahri mamlakatda 2-o'rinni egalladi.
Davlat va nodavlat oliy ta'lim muassasalari bilan hamkorlikda o'tkazilgan fan olimpiadalarida g'oliblikni qo'lga kiritgan 2114 nafar 11-sinf bitiruvchilari muddatidan oldin talaba bo'lish imkoniyatini qo'lga kiritishdi.
Toshkent shahri maktab o'quvchilari bugungi kungacha o'tkazilgan Nufuzli xalqaro va mintaqaviy fan olimpiadalarida 7 ta (2 oltin, 4 kumush, 1 bronza) medalini qo'lga kiritgan.

Muhtaram do'stlar!
Qisqacha aytganda, bundan keyin ham tizim taraqqiyoti uchun va yangi hayotni, Yangi O'zbekistonni barpo etish uchun bor kuch va imkoniyatlarimizni to'liq safarbar etamiz.

Fursatdan foydalanib, Sizlarni Yangi yil bayrami bilan yana bir bor qutlab, barchangizga sihat-salomatlik, oilaviy baxt, xonadonlaringizga tinchlik va fayzu baraka tilayman.

🎄Yangi yil barchamizga muborak bo'lsin!

Nilufar HUSANBOEVA,
Toshkent shahar maktabgacha va maktab ta'limi boshqarmasi boshlig'i.

👉👉👉Kanalimizga ulaning va do'stlaringizga ulashing: https://t.me/ToshkentshaharMMTB