Короновирус: АЁЛ ҚУДРАТИ
“Юрт бошига тўфон келса тиниб турмас у!”
Мен “Аёл” деб номланган шеъримда шундай жумлани келтирганман. Чунки, ҳақиқатан ҳам аёл зоти куюнчакликда ҳам, меҳрда ҳам, ардоқда ҳам эҳтиросларини юқори даражада ифода этади. Унинг нозиклигида ҳам, камтарлигида ҳам, бўйсуниши ва ҳатто заифлигида ҳам қудрат бор! Мен ҳукмронман, деб ҳисоблайдиганлар ҳам ўзлари сезмаган ҳолда унинг измига тушадилар, босаётган қадамларини ўзга томонга бурадилар, мақсадларини ўзгартирадилар...(Мен эркакларимизни асло камситмоқчи эмасман, аксинча, бу бўйсуниш замирида аёлга бўлган ҳурматни, маданиятни, ҳамфикрликни назарда тутяпман.)
АЁЛ қудрати ҳақида бежиз сўйламаяпман, бугун юрт бошига, майли, тўфон, демайлик, синов тушганда мана шу қудратни намоён этишларини сўрайман! Негаки, сиз турмуш ўртоғингиз, фазандларингиз нотўғри қадам қўйсалар, уларни тўғри йўлга сола оласиз. Шунинг учун сиздан илтимос, мана шу синовдан ўтишда элни бирлаштирувчи қурол бўлинг! Яъни:
1.Энг аввало, миллати, дини, ирқидан қатъий назар жипсликка даъват этинг! “Фалон миллатга, ёки фалон юртга қайсидир иши учун кулфат келди”, дея айблашларига, кулишларига йўл қўйманг! Буни ўзингиз ҳам қилманг! Зеро биз ҳаммамиз бир инсонмиз ва ер юзидаги энг олий қадриятмиз! Қолаверса, ибтидомиз бир бизнинг! Мен сиз ҳақингизда “Қўйиб берсанг, ер юзига меҳр экан у!” деганимда шуни назарда тутганман.
2.Турмуш ўртоғингиз, фарзандингиз ёки бошқа яқинларингизга, шу оғир синовдан фойдаланиб, озиқ-овқат маҳсулотлари, тиббий воситалар ва бошқа эл учун керакли маҳсулотлар нархини ошириш орқали даромад топишни ор, деб, номус, деб ўргатинг! Буни ўзингиз ҳам қилманг!
3. “Элга келган тўй-да бу”, “қирқ йил қирғин келса ҳам ажали етган ўлади”, дея бу вирусдан ҳимояланишга эътиборсизлик қилишларига йўл қўйманг! Зеро, Худойим ҳам “сендан ҳаракат, мендан барокат”, дер экан... Шу ўринда бир бир ривоятни эсладим: Тақводор бир одам сувга чўкаётган экан. Уни қутқаришга келганларни “Мен бир умр Худо йўлида ибодат қилдим. Мени Унинг Ўзи қутқаради”, деб, рад этибди. Тепасидан учиб келиб, қанотини тутган қушга ҳам шу жавобни айтибди. У ҳатто олдидан оқиб ўтган ёғочга ҳам қарамабди. Оқибатда, чўкиб, дунёдан кўз юмибди. Боқий дунёга боргач эса, Роббидан сўрабди: “Худойим! Мен Сенга ишонган эдим. Нега мени қутқармадинг?” Шунда унга шундай Жавоб бўлибди: “Мен сени қутқармоқчи бўлдим. Аввал қутқарувчиларни, сўнг қушни, ундан сўнг ёғочни юбордим, аммо уларни ўзинг рад этдинг, яъни сени қутқариб қолишимни истамадинг. Мен истаганингни бердим”.
Алқисса, ҳимояни аввало ўзимиз исташимиз керак!
3. Тиббиёт ходимларини қўллаб-қувватлашларига йўналтиринг, уларни камситишларига йўл қўйманг. Буни ўзингиз ҳам қилманг! Мен ижтимоий тармоқда уларга нисбатан “ишда биз учун эмас, пул учун қоляпсиз”, қабилидаги иддаоларни ўқиб қолдим. Шундай фидойи шифокорларни, ҳатто жуда кўпини биламан, бир ставкадан ортиқ ишлаб, тунги навбатчилик ҳақларини ҳам қўшганда олган ойликлари ошиб борса икки миллион сўмни ташкил этаркан. Лекин, касблари уларнинг ҳаёти мазмунига айланган.(Буни олий тоифали бир шифокор сўзидан олдим) Яқингинада эса, қайси бир вазирлик ходимлари, бошқа давлат идораси ходимларининг ўн миллионга яқин маош олишлари ҳақида ўқигандим. Қиёслаб олаверинг. Тўғри, гуруч курмаксиз бўлмайди, деганларидек, улар орасида ҳам нотўғри қадам босаётганлари, билимсизлари ҳам бордир, лекин умумий ҳолда олганда улар фидойи инсонлар! Бугун ҳам буни исботлаяпти улар!
4.Касаллик битта хавф бўлса, ваҳимаси тўрт карра юқори хавф экан. Сал кенгроқ фикрлайлик-да, бўлар-бўлмас уйдирмаларга йўл қўймайлик! Аксинча, масофадан бўлса ҳам, бир-биримизга кўтаринкилик, ишонч ва меҳр улашайлик. Бу борада ҳам айниқса, биз аёлларнинг ҳиссамиз катта эканини унутмайлик!
5.Касалликнинг қилдек белгиси сезилса ҳам, буни яширишларига йўл қўйманг, ўзингиз ҳам бундай қилманг! Зеро, бунинг ортида нафақат яқинларингизнинг, сизнинг, балки, миллатнинг саломатлиги турибди. Сиз эса, миллатнинг бир бўлагисиз!
Ҳаммамиз бирликда ушбу синовдан омон-эсон ва яқин кунларда ўтиб оламиз, Худо хоҳласа! Омон бўлинг, азизлар!
https://telegram.me/Shaxlo_Axrorova
