Самарқанд вилояти судлари | Расмий канал

СУДЬЯ ВА ТАЛАБАЛАР УЧРАШУВИ

Судьялар талабалар билан мунтазам учрашувлар ўтказиб, самимий давра суҳбатлари ташкил этиши анъанага айланган. Бундай учрашувлар ёшларни янада кучлироқ билим олишга, мақсад сари интилишга чорлайди. Энг муҳими, бундай тадбирлар доимо жўшқин кайфиятда, самимий ва қизиқарли ўтади.

Фуқаролик ишлари бўйича Самарқанд шаҳар судининг раиси Ш. Тавбоев Ўзбекистон Республикаси Ички ишлар вазирлигининг Самарқанд академик лицейи талабалари билан учрашув ўтказди.

Суд раиси талабаларни эркин мулоқотга ва фаол бўлишга чақирди. Мулоқот давомида суд-ҳуқуқ тизимида амалга оширилаётган кенг қамровли ислоҳотлар, давлатимизнинг ёшларнинг мустаҳкам билим олишига катта эътибор қаратаётгани, билим даргоҳларида яратилган шарт-шароитлар ҳақида мисоллар билан маъруза қилди.

Таъкидландики, бир амаллаб диплом олиш натижага эришиш эмас. Бугунги кунда замон тезлашиб, жамиятимиз ҳам шунга мос равишда ривожланиб бормоқда. Танлаган касби бўйича етарли фундаментал билимга эга, бир неча тилларни биладиган, дунёқараши кенг, давлат сиёсати ва ижтимоий ҳаётни теран ҳис қиладиган мутахассис ҳар қандай соҳада ўз жойини осон топади.

Кутилганидек, талабалар тадбирда фаол иштирок этди. Фикр-мулоҳазалар билдирилди, қизғин савол-жавоблар бўлди. Барча саволларга суд раиси батафсил тушунтириш берди.

Талабалар бундай учрашувларни тез-тез ташкил қилишни сўрашди ва албатта ижобий жапвоб олдилар. Лицей раҳбарияти билан бу борада талабалар иштирокида келишиб олинди.

Telegram I Facebook

ЖОМБОЙДА САЙЁР ҚАБУЛ

Ҳуқуқ тарғиботининг турлари жуда кўп. Уларнинг энг самаралиси аҳоли билан юзма-юз учрашиб, суҳбатлашиш, уларни тинглаш, қийнаётган муаммоларини ҳал этиш чораларини кўриш, тўғри йўл кўрсатиб, ҳуқуқий маслаҳатлар беришдир.

Фуқаронинг муаммоли масаласи жойида ҳал этилса қонунчиликка, судларга ҳурмат ҳиссини кучайтиради.

Самарқанд вилоят суди раиси О.Ҳайитов ва ўринбосари З. Аллабаев Жомбой туман Зарафшон МФЙда Жомбой ва Булунғур туманлари аҳолиси билан учрашув ва сайёр қабул ўтказди.

Тадбирда шунингдек, жиноят ишлари бўйича Жомбой ва Булунғур туман судлари раислари, тергов судьялари, фуқаролик ишлари бўйича Жомбой туманлараро суди, Жомбой туманлараро иқтисодий суди раислари ҳам иштирок этдилар.

Дастлаб, йиғилганлар билан учрашув ўтказилди. Учрашувда вилоят суди раиси Олим Ҳайитов йиғилганларга бугунги суд-ҳуқуқ ислоҳотлари, қонунчиликдаги янгиликлар, давлатимизнинг бу соҳадаги одилона сиёсати, сайёр қабулларнинг аҳамияти ва самараси ҳақида тушунча берди. Фуқароларни қизиқтирган саволларга батафсил жавоб берди. Давра суҳбати шаклида ташкил этилган учрашув қизиқарли ва сермазмун бўлди.

Шундан сўнг, сайёр қабул ташкил этилди. Қабул жараёнида жиноят, фуқаролик, иқтисодий масалалар юзасидан фуқаролар мурожаатлари кўриб чиқилди.

Сайёр қабулда 23 та мурожаатлар бўлди. Ҳар бир мурожаатга алоҳида эътибор қаратилди. Шундан қонунга мувофиқ келадиганлари ижобий ҳал қилинди ва қолганларига ҳуқуқий тушунтириш берилди. Сабаби, суд-ҳуқуқ масалаларидаги мурожаатлар ҳал этилиши аксарият ҳолларда вақт ва жараён талаб қилади.

Булунғурлик Б. Абдуллаев вилоят суди раиси қабулида бўлиб, бехосдан автоҳалокат содир қилиб белгиланган жазони ўтаётганлиги, жазони ярмидан кўпроғини ўтаганлиги, қилмишидан пушаймонлиги, тегишли хулоса чиқарганлигини билдириб, оиладан ягона боқувчи эканлиги, оилавий аҳволи оғирлашиб қолганини инобатга олиб, жазонинг қолган қисмидан озод қилишни сўради.

Худди шундай содир қилган жиноий қилмиши учун жазони ўтаётган 18 нафар шахслар, пушаймонлиги, тегишли хулоса чиқарганлиги, бундай буён соғлом турмуш тарзида яшаб, ибратли ҳаёт кечиришини билдириб жазонинг ўталмай қолган қисмидан озод қилишни сўради.

Сайёр қабул давомида жиноят ишлари бўйича Жомбой ва Булунғур туман судларининг сайёр суд мажлислари ташкил этилди. Сайёр судда ҳар бир ҳолат алоҳида кўриб чиқилиб, қонунга мувофиқ келадиган мурожаатлар ижобий ҳал этилди.

Вилоят суди Жамоатчилик ва ОАВ билан алоқалар бўлими.

Telegram I Facebook

СУДДА АДОЛАТ ҚАРОР ТОПДИ

Ўзбекистон Республикаси Президентининг 2023 йил 27 ноябрдаги “Коррупцияга қарши курашиш тизимини янада такомиллаштириш ҳамда давлат органлари ва ташкилотлари фаолияти устидан жамоатчилик назорати тизими самарадорлигини ошириш чора тадбирлари тўғрисида”ги Фармони билан Коррупцияга қарши курашиш бўйича 2023-2024 йилларга мўлжалланган давлат дастури тасдиқланиб, унда маъмурий тартиб-таомиллар соҳасида коррупциянинг олдини олиш борасида суд органлари зиммасига муҳим вазифа юклатилган.

Хусусан, судлар томонидан давлат органлари ва ташкилотларининг, уларнинг мансабдор шахсларининг бекор қилинган ноқонуний қарорлари тўғрисидаги маълумотларнинг жамоатчилик учун очиқлигини таъминлашга оид чора-тадбирлар ташкил қилиш белгиланган.

Самарқанд вилоят жиноят ишлари бўйича туман ва шаҳар судлари томонидан 2024 йилнинг 4-чорагида давлат органлари ва ташкилотлари, уларнинг мансабдор шахсларининг 321 та қарори ноқонуний чиқарилганлиги учун бекор қилинган.

Мисол учун, Нуробод туман Давлат солиқ инспекциясининг 2024 йил 8 октябрдаги QSAM-2424004895916-рақамли қарори билан М.Хатамов МЖтКнинг 175-моддаси 2-қисмида назарда тутилган ҳуқуқбузарликни содир этганликда айбли деб топилиб, БҲМнинг 10 баравари, яъни 3.400.000 сўм жарима жазоси тайинланган.

Иш ҳужжатларига кўра, М.Хатамов “NUROBOD TUMAN AGRO SERVIS MTP” МЧЖда директор вазифасида ишлаб келиб, корхонанинг 2024 йил учун юридик шахслар ер солиғи ҳисоботини ўз вақтида солиқ идорасига тақдим этмаган, деб ҳужжатлар расмийлаштирилган.

Жиноят ишлари бўйича Нуробод туман судининг 2024 йил 11 декабрь кунги қарорига кўра, М.Хатамовнинг ҳаракатида МЖтКнинг 175-моддаси 2-қисмида назарда тутилган маъмурий ҳуқуқбузарлик аломати мавжуд эмас деб топилди ва Нуробод туман Давлат солиқ инспекциясининг 2024 йил 8 октябрдаги қарори бекор қилинди. Иш МЖтК 271-моддаси 1-бандига асосан юритишдан тугатилди.

Отабек Набиев,
Самарқанд вилоят суди судьяси.

Telegram I Facebook

“ИБРАТЛИ СУДЬЯ”
Судьяларнинг масъулияти азалий ва абадийдир. Судья қанчалик муваффақиятга эришиши, юзи ёруғ, қадри ва обрўси баланд бўлиши унинг билими, тажрибаси, ўз устида ишлаши, қолаверса ҳалоллигига боғлиқ. Чунки, инсоният ўртасида манфаатлар тўқнашуви, унинг ортидан эса низо, муроса, келишув деган тушунчалар ҳам мавжуд. Демак, инсон доимо ҳақ ва ҳақиқатга эҳтиёж сезди. Икки тараф ўртасида адолат қарор топиши учун суд тизими фаолият кўрсатади. Шунинг учун адолат тушунчаси макон ва замон танламайдиган энг олий мезондир.
Мамлакатимизда кўплаб суд-ҳуқуқ ислоҳотлари қатори ўз касбига садоқатли, тажрибали судьялар меҳнатини эътироф этиш орқали одил судловга эришиш борасида катта ишлар қилинмоқда. Президентимизнинг 2020 йил 7декабрдаги “Судьяларнинг чинакам мустақиллигини таъминлаш ҳамда суд тизимида коррупциянинг олдини олиш самарадорлигини ошириш чора-тадбирлари тўғрисида»ги тегишли фармони билан судьяларнинг одил судловни амалга оширишдаги фаолиятини рағбатлантиришни йўлга қўйиш, «Ибратли судья» мукофоти жорий этилди. Мазкур Фармондан келиб чиқиб, Судьялар олий кенгаши томонидан “Судьялар фаолиятини баҳолаш бўйича электрон рейтинг тизими» яратилди. Унга кўра, энг яхши деб топилган судьялар йил якунида “Ибратли судья” мукофоти билан тақдирланиши ҳам кўрсатилган. Ўтган йили мукофотга номзодларни саралаш натижаларидан келиб чиқиб, Республикамиз суд тизимида фаолият юритаётган 16 нафар судья “Ибратли судья” мукофоти билан тақдирланган эди. Бу йил эса 20 нафар судья бу шарафга лойиқ кўрилди.
Судьялар фаолиятини баҳолаш бўйича электрон рейтинг тизими кутилган натижани бермоқда. Судьялар фаолияти шаффоф ва одилона баҳоланаяпти. Ҳар йилги тақдирланганлар ҳам юқори рейтинг кўрсаткичлари асосида танлаб олинади.
Ҳуқуқшунос сулоласи вакили бўлган Орифжон Нуримов фаолияти ҳақида доимо илиқ фикрлар билдирилади. Чунки Пайариқ туман иқтисодий судига келган ҳар бир фуқаро камтар, маданиятли, ўз билими ва тажрибасига ишонган, суҳбатдошини тинглай оладиган ва маънили фикр берадиган бу судьянинг ҳузуридан норози бўлиб кетмайди. Суд биноси остонасига қадам қўйганлар бу ердаги орасталик, ободлик, ўзаро ҳурмат муҳитидан кўнгли тўлади.
Таъкидлаш жоиз, рейтинг профессионализм, одоб-ахлоқ қоидаларига риоя этиш, мурожаатлар билан ишлаш, билим даражаси, қабул қилинган суд қарорларининг сифати каби мезонлар асосидаги тўплаган баллари ҳисобидан шакллантирилади. Шу маънода Орифжон Нуримов ушбу мукофотга ҳақли равишда лойиқ эканлигини ортиқча таърифлаш шарт эмас. Чунки, мукофотни топширишга бағишланган тантанали маросимда Судьялар олий кенгаши ҳам, Самарқанд вилоят суди раиси ва ҳамкасблар ҳам буни алоҳида эътироф этишди. Ўз навбатида мукофот соҳиби ҳам барчага шундай мақом насиб этишини айтиб, ўз миннатдорчилигини изҳор қилди.