Saidxon Avazxonov | Sahifam Satrlari

Чарчоқ кетади, илм эса қолади.

Устозимиз Др. Шайх Жобир ал-Аҳмад айтиб берадилар: «Баъзида, Аллоҳ таоло сенга сен билмайдиган бир нарсани тақдир қиладики, у нарса Қуръонда зикр қилинганидек «яхшилик»дир.

«Бир нарсани ёмон кўрасиз, шоядки у сиз учун яхшидир. Бир нарсани яхши кўрасиз, шоядки, у сиз учун ёмондир. Аллоҳ билур, сизлар билмассиз.»
(Бақара сураси 216-оят)

Фақат тақводорларгина эриша оладиган Аллоҳга қулликнинг мукаммал даражаси - Аллоҳ таоло сени қаерда бўлишингни ирода қилган бўлса, шу билан рози бўлишингдир. Масалан, сени фалон мадрасада бўлишингни битди, сен эса хоҳламайсан. Уни Истанбулда, буни эса Ўзбекистонда бўлишини хоҳлади, у эса хоҳламайди. Ишонинг, агар ишингизни Аллоҳга топширсангиз, сизга энг хайрлисини беради. Шунинг учун, Абдулқодир Жийлоний айтади:

«Етишганларимизнинг барчасига фақатгина нафсларимиз ёмон кўрадиган нарсалар билангина етишдик.»

Эътибор беринг, фақатгина нафсларимиз ёмон кўрадиган нарсалар билангина етишдик, демоқдалар. Ишонинг, юксак даражаларга эришган олим, тақводор ёки валий бўладими, уларнинг барчаси ҳаётининг бошида жуда қийин чидаб бўлмас ҳолатда бўлганлар. Лекин кимнинг бошланиш ҳаёти, мақолда айтиладигандек:

«Кимнинг бошланиши ёндирадиган бўлмаса, ниҳояси ҳам қуёш каби порлоқ бўлмайди»
(Араб халқ мақоли).

Аҳёнан, инсон ҳаёти давомида бошдан кечирган қийинчиликларини эслайди. Менинг Мисрга борганим ёдимда туради. 2004 йил эди, магистратура ўқирдим у пайтларда. Мисрда 3 ой қолишим керак эди. Аллоҳга қасамки, биринчи борган кунимдаёқ ҳамма пулимни ўғирлатиб қўйдим. Оилам фақир, бой эмасдик. Отам вафот этган, ака-укаларим эса мадрасада ва мактабларда ўқир, бизда пул йўқ эди. Шароитимиз жуда ҳам содда. Шу сабаб, онамга менга пул юборинг дейишга уялдим. Бундай катта маблағни қандай топиб юборарди, ахир.

Шундай қилиб, тақрибан, 3 ой фақат банан еб яшадим. Банан Мисрда деярли бепул. 1 кг олсанг, катта эҳтимол, сендан пул ҳам олмайди ҳаттоки. Миср банан аҳли, аслида. Мен яшайдиган уй ва университетнинг орасидаги масофа 10 км эди. Пиёда бориб келардим. Айтмоқчи бўлган нарсам шуки, чарчоқ кетади, илм эса қолади. Ҳаттоки, эсимда, охирги марта Ҳалабда шифохонага борганимда жисмим аллақандай витаминларга, даъволаниш ва ҳоказоларга муҳтож эди. Лекин ҳаммаси ўтиб кетди. Сизлар ҳам бу илм йўлингизда қандай қийинчиликларга дуч келсангиз ҳам, билингки, у сиз учун яхшиликдир.

📝 Авазхонов Саидхон

@Saidxon_Avazxonov | #Ҳикоя

Banda bir gunohda davom etaverarkan, Alloh taolo uning qalbidan nadomat hissini olib qo'yadi.

@Saidxon_Avazxonov

Ихтисос

Устозимиз Др. Шайх Жобир ал-Аҳмаднинг зиёратларида эканмиз, ўқиш борасида қайси соҳада ўқиш тўғрисида маслаҳат сўрадим.

Устозим: «Қудуқни қази ва ундан сувни чиқар». Араб тили соҳасини танладингми, давом эт, тўхтама. Масалан, шифокорни олайлик. Маълум йил ўқийди, сўнгра ундан сўнг кўз соҳасида ихтисослашади. На кўзга ва на қулоққа алоқаси йўқ, фақатгина кўз. Шу соҳасида мисли кўрилмаган натижаларга эришса шу орқали унинг даражаси белгиланади. Бошқа касалликлар билан алоқаси бўлмайди. Масалан, шахсан ўзим, ҳадисдан бирор нарса сўрасангиз, 20% демайман, Аллоҳга қасамки, юздан 15% га бормайди. Ақидада эса 10% га ҳам бормаса ажаб эмас. Ҳақиқатни айтапман. Чунки улар менинг ихтисосим эмас. Лекин араб тили, фиқҳ ва усул. Мен бошланишида нима қилдим, қалбим нима хоҳлаётганини топдим. Ҳозир истаган саволингизни сўранг ихтисосимдан. Лекин ҳадисдан нарса сўрасангиз, жавоб бермайман. Чунки бу менинг ихтисосим эмас, алоқам йўқ, балки хато жавоб бериб қўярман.

Бизнинг муаммомиз нима, бизнинг муаммомиз шуки, ҳамма нарсада олим бўлишни хоҳлаймиз. Иқтисод, Тиб, Математика, Астрономия, Фиқҳ, Ҳадис, Ислом молияси, Ақида ва ҳоказолар. Йўқ, мумкин эмас.

«Ҳалол ва ҳаромни энг яхши биладиганингиз Муъоз ибн Жабал, Мерос илмидан энг хабардорингиз Зайд ибн Собит, Қуръондан энг яхшингиз Убай ибн Каъб, Абдуллоҳ ибн Масъуд ҳадисдан нима гапирса ишонинг.» (Ҳадис маъноси)

Олдингизга режа қўйдингизми, масалан, дейлик, 10 йиллик режа, 10 йилдан кейин араб тилида фалон даражага эришаман. Ундай бўлса, Аллоҳ умримизни узоқ қилса, 10 йилдан кейин кўришганимизда араб тилида энг кучли мутахасис бўлишинг керак. Ҳар бирингиз ҳам ўз соҳангиз устаси бўлган бўлишингиз лозим.» дедилар.

Ҳаттоки, бир марта ўзлари айтгандилар: «Аллоҳга қасамки, Шофеъий фиқҳида бирорта ўқиб чиқмаган китобим қолмаган.»

📝 Авазхонов Саидхон

@Saidxon_Avazxonov | #Ҳикоя

Kelin emas - xizmatkor.

(@Yechimhubbuna) ba'zida shu kanalga keladigan savollarni o'qib, jahlim chiqadi. Oila erkak va ayol o'rtasida qurilganmi yoki ikki ayol o'rtasidami bilmay qolaman.

- Erim meni ishlashga majburlayapti.
- Erim oyligimni uydagilarga berishimni talab qilyapti. Mening esa ehtiyojlarim bor.
- Erim safarda, biz bilan birga yashamaydi. Bir yilda bir keladi.
- Qizlik uyimga borishimga qaynonam qarshilar, erim esa onamdan o'tib hech narsa deyolmayman, deyaptilar.
- Qaynonam meni qiz chiqmagansan deb ayblayapti, erim esa tarafimni olmaydi.
- Qaynonam meni va ishimni yoqtirmasligini aytib, ko‘ngilga va nafsoniyatga tegadi. Ajrashtirib yubormoqchi.

Sanayman desa, tugamaydi. Nega buni aytyapman?

- Balki hali yosh, aqllilik qilyapti desangiz, deng-ku, ammo keyin ham bu fikrimdan qaytmayman:

Bizda ona bilan ayoli o'rtasidagi adolatda juda katta xatolik bor. Aksar oilalarda shunaqa. Ota-onamning so'zlaridan o'tolmayman, deb aksar hollarda ayollar zulm ko'radi. Bu inkor qilib bo'lmas voqe'likdagi holat.

Siz o'z oilangizda erkakmisiz yoki ayolmi?! Siz boshliqmisiz yoki ota-onangizmi?! Siz ota-onam deb, ayolingizga zulm qilmang! Ularni ortig'i bilan hurmat qiling, ammo sizning bu shaxsiy oilangizda o'zingizning qat'iy qaroringiz bo'lsin!

Aslida, ayol kishi qaynona-qaynotasining xizmatini qilishga majbur emas! Agar men musulmonman desangiz, bu gapga taslim bo'lishingiz kerak. Ayolingiz esa qo'lidan kelgancha xizmatlarini qilsa, yana kamiga yuqorida zikr qilingan holatlarga o'xshash voqea bo'lsa, bundan katta zulm bormi axir?!

P.s: Shaxsan, men shu paytgacha aksar hollarda kelinlarga zulm bo'lganiga guvoh bo'lganman. Va ushbu kanaldagi kelayotgan savollarni o'qib, yanada amin bo'lmoqdaman.

Alloh holimizni isloh qilsin!

(Biroz ta'sirlanib yozildi, e'tibor bermaysizlar))

@Saidxon_Avazxonov

Shu o'rinda yana bir eslatma: xoh erkak bo'lsin, xoh ayol, nima bo'lishidan qat'iy nazar, fitratdan hisoblangan xulqlar bilan xulqlanishga intilishi lozim.

Masalan, qo'rqoq, bemas'uliyat, qat'iyatsiz erkak - g'alati eshitilarkan-a?!

Qo'rs-qo'pol, betkachopar, befarosat ayol - bu ham g'alati-a?!

Erkak kishiga jasurlik, qat'iyat, matonat, hikmat, aql bilan ish yuritish va shu kabi xislatlar yarashgani singari, ayoli kishiga ham nafosat, nazokat, farosat, latofat, hikmat kabi go'zal xulqlar yarashadi.

Mening borim shu deb - bemas'uliyat erkak, befarosat ayol o'zini isloh etishga urinmasa ham qiyin bo'ladi, albatta.

Eng muhimi - hikmat. Har bir ishda hikmatli bo'lishga intiling.

@Saidxon_Avazxonov

Bir kuni akam bilan gaplashib o'tirsak: - "Shaxsan, ayol kishi erkaklarni kuzatishiga qarshiman. Yaxshi ish emas" - degandilar.

"Nega?" - desam:
- "Bir erkakni hadeb kuzatavergan ayol, o'z idealidagi kishini shu erkak misolida ko'rib qolishi mumkin. Keyin esa muammolar boshlanadi" - deb javob bergandilar va bir ma'noda bu javobdan qoniqqandim.

P.s: Albatta, hamma ham bunday emas. Buni shunchaki eslatma o'laroq aytib o'tishni lozim deb topdim. Va yana bir gap: Bu fiqhiy hukm emas. Hech kim hech narsani halol-harom degani yo'q.

@Saidxon_Avazxonov

Oiladagi muammolarning bosh sababi - taqqoslash

Ko'p qizlar bilan gaplashgan, necha turfa xil yuz-chehralarga nazar tashlagan kishi o'ziga umr yo'ldosh tanlashda qiynaladi.

Sababi, u tanlov payti kelganda, qarshisida turgan qizni o'zi gaplashgani o'nlab qizlarga, ko'rgani minglab yuzlarga solishtiradi.

Eng birinchi va eng katta muammo ayni mana shu solishtirish ila boshlanadi.

Eshitmaganmisiz: "Falonchining eri bunday", " Pistonchining uyi bunday" - degan gaplarni?

Solishtirish boshlandimi, bu katta muammo. Shu sabab, o'zingizni tiying, ko'zingizni tiying. (Garchi ba'zi o'rinlarda halol bo'lsa ham)

Yo'qsa, o'zingiz sezmagan holda, xayolingizda mukammal insonni shakllantirib olasiz: Chiroyli, xushmuomala, dindor, g'azablanmaydigan, itoatkor, pazanda, chevar, chaqqon, epchil vahokazolar...

Keyin oxirida o'zingizga qiyin bo'ladi. Orzuyingizni shu tariqa shakllantirib olganingizdan keyin, bunday kishini topolmaysiz. Keyin biri bilan oila qurasiz, bu sifatlarning ba'zisini topolmaganingizdan keyin, garchi oshkor qilmasangiz ham, ich-ichingizda norozilik kayfiyati qolib ketadi. Rafiqangizdagi yo'q orzu qilgan narsalaringiznigina ko'rishni boshlaysiz. Va tinchingiz buziladi.

Shuning uchun, baxtli bo'lay desangiz, o'zingizni va ko'zingizni tiying!

P.s: Bu gap qizlarga ham tegishli.

@Saidxon_Avazxonov

Gunohlar ofati

Tunning uchdan bir qismi qolganda Alloh taolo dunyo osmoniga tushib: “Kim istig'for aytadi, mag'firat qilaman. Kim duo qiladi, ijobat qilaman. Kim rizq so'raydi, rizq beraman” - desa-yu, sen g'aflatda yotgan bo'lsang, bundan ortiq musibat bormi?!

Ayni shu Allohning rahmati nozil bo'lar mahal, Alloh ta'olo o'z Zoti ila yer yuziga tushar payt, seni gunoh ustida ko'rishidan og'irroq nima bo'lishi mumkin?!

Alloh tavfiq berib, 2 rak'at namoz o'qigan taqdiringda ham, u namozingni namoz desa bo'ladimi axir?! Naqadar g'aflatdasan-a...

Qalbing shu darajada qotib ketgan-ki, sajdaning lazzatini, Robbing munojatini, iymon halovatini nima ekanini yodingdan chiqarding. Ko'zingdan hattoki tomchi yosh kelmay qo'ygani seni tashvishga solmaydimi axir?!

Ilgari bir gunoh qilsang, darhol ko'zingga yosh kelar, qilgan ishingga afsuslanib, tavbaga shoshar eding. Hozirchi, hozir? Ko'z yosh tugul, afsus ham chekmay qo'yding. Tavbang esa quruq so'zdan iborat bo'lib qoldi.

Shu qadar ko'p gunoh qilganingdan, Alloh ta'olo nadomat hissini qalbingdan olib qo'ymadimikan?!

Ishlaring o'xshamasligi, zehning pasligi, omadsizliklaring sababi ham ayni shu gunohlaring sababidandir, ehtimol:

"Albatta, banda qiladigan gunohi tufayli rizqdan mahrum qilinadi."
(Ibn Hibbon rivoyati)

Lekin bir narsani eslataman:
Hali nafas olar ekansan, sen uchun tavba eshiklari ochiq. Agar Robbingga qaytsang, u zot seni shubhasiz qabul qiladi.

Va yana bir narsani yodingda tut:
Sen gunohim ko'p deb siqilma, ehtimol o'sha gunohing sabab jannatga kirarsan.

"Магар ким тавба қилса, иймон келтириб, солиҳ амал қилса, бас, Аллоҳ ана ўшаларнинг ёмонликларини яхшиликларга алмаштирур. Аллоҳ мағфиратли ва раҳмли бўлган зотдир." (Furqon surasi 70-oyat)

Tavbaga shoshil, ey nafsim. Qalbingni bu holidan aslo rozi bo'lib qolma. Sen Allohga duo qilib so'rayver, qalbing yumshab, sen ham solihlar qatoridan joy olsang, ajabmas. Lekin hech qachon rahmatidan umid uzma!

@Saidxon_Avazxonov

* * *

Ёлғондан тўқилган ҳислар - бекордир,
Йиғлабоқ кулсанг гар - кўзёш бекордир,
Амалдан мосуво илм - бекордир,
Саботдан хабар бер, собитлар қайда?

Нафснинг жиловидан тутмоғинг даркор,
Нафсга қуллук қилма, қуллигинг бекор,
Нафс-ла мужодала тўхтамас зинҳор,
Ислоҳдан хабар бер, солиҳлар қайда?

(olindi)

* * *

Chin shoirlar bari otilgan,
Qolganlari bari sotilgan.
Mard so‘zim shu - hammasi qo‘rqoq!
O‘zim kimman? So‘ramang biroq.
Men ismimni aytmasman zinhor,
Zamon nozik, bola-chaqam bor.

#Erkin Vohidov

@Saidxon_Avazxonov

Qalbning qotib ketishi bir kasallik bo'lsa, uning haddan ziyod yumshab ketishi ham kezi kelganda, pand berib qo'yishi mumkin ekan.

@Saidxon_Avazxonov

#Biroz_hazil

Yaqinda bir akamizning (@ibrohimovis_blog) mushukchalarini rosa yaxshi ko'rib qolgandim.

Bechora bilan 2 soat birga o'ynab, qiynab yubordim. Oxiri qochib ketgandi, baribir ushlab olib, rosa qiynagandim. Rosa shirin ekan o'ziyam)

Endi hattoki tushimda ham ko'rib chiqyapman, subhanalloh)

Men ham yaqinda she'r yozib yubormasam bo'ldi:

"Ko'chalar, hov begona ko'chalar,
Stalba lip-lip qildi,
Mushuk deydi miyov-miyov
Pitpildig'im qaydasan" - deb))

@Saidxon_Avazxonov