Nahot taqdir emas seni ko‘rganim,
Axir qo‘shni mahallada o‘smaganding sen.
Nahot taqdir emas ko‘ngil qo‘yganim,
Qo‘shni mahallangda turmagandim men.

Dunyoning ishiga bu ko‘ngil ojiz,
Nahot taqdir emas uchrashganimiz?
Nahot yo‘llarimiz kesishdi bejiz,
Nahot taqdir emas bizning uchrashuv?

Sen Shoshning qayerida eding-u,
Men Vodiyning qay yerlarida.
Endi bir osmondan nafas olyapmiz,
Shunda ham taqdirni tan olmayapmiz.

Nahot taqdir yozmadi bizlarni birga,
Nahot shunchakimidi uchrashganimiz?
Taqdir keltirmadimi yo‘llarni yo‘lga,
Nahot taqdir emas suhbatlarimiz?

Xabar bermadimi zabonsiz ko‘zlar,
Nigohing qarshisida chalkashgan so‘zlar?
Butun vujud bilan tinglangan so‘zlaring,
Nahot taqdir emas meni ko‘rganing...


2024-yil 25- NOYABR TOSHKENT

©Oybek G'ofurov