Munajjimlar bashorati ⚡

ТАРОЗИ (24. 09 — 23. 10)

Ишда қатъиятли бўлинг. Ўзингизга бўлган ишончни сўндирманг. Орқага бош буриб ҳам қўйманг. Фақат олдинга интилинг. Тушдан кейин ҳамкасблардан бири сизга кутилмаган совға ҳадя этиши эҳтимолга яқин. Оилалилар ўз саломатлигини тиклаш, бемор қариндошлар ҳолидан хабар олишга эътибор қаратишлари керак. Фарзадлар билан суҳбатга ҳам алоҳида вақт ажратинг. Ўзингизни эҳтиёт қилинг.

ЧАЁН (24. 10 — 22. 11)

9 феврал куни оиласизлардан кимнидир яқинда танишган инсони хафа қилиши мумкин. Ҳойнаҳой, унинг туйғулари мустаҳкам бўлиб чиқмайди. Бундан ранжиш керак эмас. Турмуш қургандан кейин шундай ҳолат юзага келса, ана бунинг учун ранжисангиз арзирди. Бошқасини топасиз, вассалом. Бу ҳам тақдирнинг бир синови-да. Ижод аҳлини кечқурун жуда хурсанд қилишади. Навбатдаги ижод маҳсулингиз кўплаб олқишларга сазовор бўлади. Айримларнинг хонадонида бугун янги меҳмон дунёга келиши ҳам эҳтимолдан холи эмас.

ЎҚОТАР (23. 11 — 21. 12)

Бугун ҳамкасбларга шахсий сирларингизни ошкор қилманг. Бу сизнинг зиёнингизга ишлаши мумкин. Руҳий кечинмаларингизга ишни аралаштирманг. Ишхонадаги раҳбарлар сизни ишга кўмиб ташлаши кутилмоқда. Астойдил тер тўкишингизга тўғри келади. Кун бўйи кўпроқ пиёда сайр қилинг, фикрлашда тезкор бўлинг. Ўтмишдаги хатоликлар туфайли тушкунликка тушманг. Рўзғордаги ташвишларни бартараф этишда ташаббускорлик талаб этилади.

ТОҒ ЭЧКИСИ (22. 12 — 20. 01)

9 февралда эзгу ниятларни ҳақиқатга айлантириш, муваффақият қозониш учун сиздан бардош ва тафаккур талаб қилинади. Яқинларингизга қанча кўп ҳурмат ва эътибор кўрсатсангиз, шунча обрўйингиз ошади, ўрнингиз мустаҳкамланади. Оилавий муаммоларни ижобий ҳал қилиш учун бугун вақтингиз етмайдиган кўринади. Бу фожиа эмас. Худонинг куни кўп. Эртага ҳам бемалол ҳал қилаверсангиз бўлади. Саломатлигингизни асранг. Асабларни мустаҳкам тутинг.

ҚОВҒА (21. 01 — 19. 02)

Оиласизлар, ўзингиз жондан севган, яқин келажакда турмуш қурмоқчи бўлган инсон томон яна бир қадам ташланг. Ташлангки, орангиздаги масофа метрлардан эмас, миллиметрлардангина иборат бўлсин. Шу жумладан, у инсоннинг қаршисида ўзингизни дипломатларча тутишга ҳаракат қилинг. Бугун жисмоний зўриқишлар сизнинг фойдангизга ишлайди. Қачонки, керакли витаминларга бой таомларни кўп ва хўб истеъмол қилсангиз. Айримларга кечқурун сердаромад иш таклиф қилишлари мумкин. Дарров рози бўлинг.

БАЛИҚ (20. 02 — 20. 03)

9 феврал куни кун мобайнида асосан қоғозбозликлар қуршовида қолишингиз кутилади. Муҳим ҳужжатлар билан ишлашингизга тўғри келади. Хатоларга йўл қўйишдан сақланинг. Нимаики ишга қўл урманг, албатта режалаштирилган бўлсин. Бугун оилавий байрамлар, унаштириш ва тўй маросимлари муваффақиятли, ёқимли кечади. Севинмоқчи бўлсангиз, кўнглингизни тоғдек кўтариш ниятида бўлсангиз, бу ишни чин юракдан амалга оширинг.

ҚЎЙ (21. 03 — 20. 04)

Бугун ҳамкасблар ва дўстлар айтган энг муҳим гапларни албатта ёдда сақлаб қолинг. Яқин келажакда асқотади. Айниқса, сизнинг мартабангиз билан боғлиқ ахборот бўлса яна яхши. Кун давомида ишчанлик ва жамоавийликка алоҳида эътибор қаратинг. Башарти ёлғиз қолишни ихтиёр этсангиз, табиат қўйнига чиқиб кетинг. У ерда ҳам дам оласиз, ҳам келгуси режаларни пухталаштирасиз. Кечқурун эса албатта тоза ҳавода сайр қилинг.

БУЗОҚ (21. 04 — 21. 05)

9 февралда кўплаб муҳим ахборотларга эга бўласиз. Ҳаракатлар содир этишдан олдин куч ва имкониятларингизни назардан ўтказиб олинг. Сиз билан ҳамкорликда ишлайдиган одамларнинг ҳам фикрларини инобатга олинг. Шахсий бизнеси борлар билсинларки, бугун даромад сиз кутган даражада бўлмайди. Қолганлар эса моддий жиҳатдан муаммога дуч келишмайди. Аксинча, айрим дўстларимиз мўлжалдагидан кўпроқ пулга эга бўлишлари кутилмоқда.

ЭГИЗАКЛАР (22. 05 — 21. 06)

Бугун барчанинг диққат марказида бўлинг, касбингиз бўйича янги билимларга эга бўлиш пайига тушинг. Ишларингиз юриша қолмаса, асабийлашманг. Юриштириш усулларини топинг. Кун мобайнида олис сафарга отланишингиз эҳтимоли ҳам йўқ эмас. Куннинг иккинчи ярмида касбингиз билан боғлиқ малакангизни ошириш ҳаракатига тушишингиз кутилади. Спорт билан фаол шуғулланадиганлар ёғ ва углеводлар истеъмолини камайтиришлари тавсия қилинади.

ҚИСҚИЧБАҚА (22. 06 — 23. 07)

9 феврал куни пул эмас, мартаба учун тер тўкишингизга тўғри келади. Молиявий аҳволингиз ҳавас қиладиган даражада эмас, лекин чидашга мажбурсиз. Рўзғор, хўжалик билан боғлиқ муаммоларни бартараф этишда хотиржамлик сақланг. Сурункали хасталикларни даволашда янгича усуллардан фойдаланишингиз керак бўлади. Бироқ олдин мутахассис билан албатта маслаҳатлашинг. Саломатлик масаласида хатоларга йўл қўйишга ҳаққингиз йўқ. Кечқурун овқатланишда меъёрни билинг.

АРСЛОН (24. 07 — 23. 08)

Агар профессионал касбингиз билан боғлиқ ишингиз келажаги учун фойда берса, жами истеъдодингизни кенг оммага намойиш этишингиз керак. Уялманг, тортинманг, иккиланманг. Дўстларингиздан кимдир сизни чув тушириш пайига тушиши мумкин. Эҳтиёт бўлинг. Жуфтингиз ёки бўлғуси жуфтингизга кўпроқ эътибор қаратинг. Саломатлиги билан қизиқинг, муаммолари бўлса, биргаликда бартараф этинг. Кечқурун хонадонингизга кутилмаган меҳмонлар ташриф буюриши мумкин.

ПАРИЗОД (24. 08 — 23. 09)

9 февралда молия ва муҳаббатда омадингиз чопади. Ишингиз юзасидан айрим масалаларда кимларгадир ниманидир исботлаш илинжида елиб-югуришингиз мумкин. Ақлий меҳнат кишиларига даромад бўйича етадигани бўлмайди. Кечки пайт олис сафарга отланишингиз эҳтимоли бор. Сафар давомида оиласиз бўлсангиз, бир инсон билан танишишингиз мумкин. Келгусида эса танишув муҳаббатга айланиши кутилади.

ТАРОЗИ (23. 09 — 23. 10)

Тарози буржи вакилларининг шахсий ҳаётида у қадар ёқимли бўлмаган ҳодиса юз бериши кутилади. Кайфиятингиз ўша заҳотиёқ тушкун ҳолатда қолади. Уни сунъий тарзда кўтаришнинг имкони бўлмайди. Ана шунда сиздан ирода кучи талаб этилади. Бардош билан ўзингизни мажбурлаган ҳолда кайфиятингизга ўзингиз позитивлик ҳадя этишингиз керак. Кимки бугун хориж саёҳатига отланса, албатта муваффақият қозонади. Ўзингизни эҳтиёт қилинг.

ЧАЁН (24. 10 — 22. 11)

8 февралда бардошингиз синовдан ўтказилади. Нафи тегмайдиган ишдан ҳам бош тортманг. Борича ҳаракатингизни қилаверинг. Куннинг иккинчи ярмида оила аъзоларингиздан кимдир сизга жуда ҳам ёқимли хабар етказади. Азбаройи мамнун бўлганингиздан рақс тушиб юборай дейсиз. Бугун жисмоний меҳнатдан қатъиян воз кечинг. Бел қисмингизда муаммо пайдо бўлиши мумкин. Оллоҳ сизга ёр бўлсин!

ЎҚОТАР (23. 11 — 21. 12)

Бугун пул масаласида имкониятлар сал кечикиши мумкин. Анчадан бери ўша даромадни кутаётгандингиз. Афсуски, энди кимларгадир қўнғироқ қилишингиз, қаерларгадир боришингиз, кимларгадир ҳужжатларни тақдим этишингизга тўғри келади. Бусиз кўзланган даромадни ўз вақтида ола билмайсиз. Фақат муштингизни ишга солманг. Нақ балога қоласиз-а! Кечқурун жуфтингиз ёки бўлғуси жуфтингиз сизга кутилмаган совға ҳозирлаши кутилмоқда. Бахтингизни берсин!

ТОҒ ЭЧКИСИ (22. 12 — 19. 01)

8 феврал куни бир юзингизга уришса, иккинчисини ҳам тутиб беришга мажбур эмассиз. Бу сизнинг принципларингизга тўғри келмайди. Албатта урганга арзирли жавоб қайтаришингиз лозим. Ишхонангизда ҳам кўнгилсиз вазият юзага келиши мумкин. Бугун тиббий кўрикдан ўтишингиз эҳтимоли бор. Таҳлиллар натижаси қандай бўлишидан қатъи назар саломатлигингизни эҳтиёт қилинг. Айниқса, ангинадан эҳтиёт бўлинг.

ҚОВҒА (20. 01 — 18. 02)

Бугун ҳар жабҳада танаффусларни бошдан кечирасиз. Улар сиз учун жуда ёқимли кечади. Ишхонангизда мартабангиз ошиши ҳам ўша танаффусларнинг бири дейиш мумкин. Оилангизда яқинларингиз билан ўзаро муносабатлар қил устида турганини унутманг. Бу муаммони ҳам бугундан қолдирмай ижобий ҳал этсангиз, ўзингизга яхши. Харидларда тежамкор бўлинг. Молиявий инқироздан худонинг ўзи асрасин.

БАЛИҚ (19. 02 — 20. 03)

8 февралда иш жойингиздаги ҳамкасбларнинг кўпчилиги сиздан маслаҳат сўраши кутилади. Лекин мағрурланиб кетманг. Ҳали бундай ҳолатга тушишингизга вақт бор. Атрофдагилар билан мулоқотда тилингизга жуда эҳтиёт бўлишингиз тавсия этилади. Акс ҳолда жанжалли вазиятларга тушиб қолишингиз мумкин. Кечқурун ёлғизлар романтик учрашувга отланишади. Оллоҳ сизга ёр бўлсин!

ҚЎЙ (21. 03 — 20. 04)

8 феврал куни турли номақбул ҳаракатлар билан яқинларингизнинг жонига тегишингиз мумкин. Агар ўзингизни қўлга олсангиз, ўзингизга нисбатан қаттиққўлроқ бўлсангиз, зиён қилмасди. Мабодо кимдир беҳуда асабингизга тегса, бу негативнинг тагига етинг. Яқиндагина шахсий бизнесини очганлар учун бугун анча оғир кечади. Иш кўпайгандан кўпаяди. Савдо-сотиқнинг чангини чиқарасиз. Омад сизга ёр бўлсин!

БУЗОҚ (21. 04 — 20. 05)

8 феврал куни қайсидир муҳим масалада юзага келган муаммолар автомат тарзда ижобий ҳал бўлиши кутилмоқда. Аммо муаммони кимларнингдир кўмагига суяниб эмас, ўзингиз мустақил равишда бартараф этасиз. Суюкли инсонингизга қаттиққўл бўлишдан тийилинг. Ўз ноғорангизга камроқ ўйнатинг. Шунда муносабатлар янада мустаҳкам торта боради. Ҳатто, молиявий инқироз ёқасида бўлсангиз ҳам банклардан асло кредит ола кўрманг.

ЭГИЗАКЛАР (21. 05 — 21. 06)

Геракл бўлиб кетинг-э! Бир дунё ишингиз бор эди. Бугун тушгача қолмай уларни уддалаб улгурасиз. Сифати ҳам кўнгилдагидек бўлади. Моддий аҳволингизни яхшилаш учун ҳам бугун қулай имкониятлар бисёр бўлади. Тадбиркор бўлсангиз, ҳуқуқшунос ёрдамида молиявий масалаларни осонликча ҳал эта оласиз. Муҳаббатда майда кўнгилсизликлар кузатилиши мумкин. Улар сизни келажак ҳақида жиддийроқ ўйлашга мажбур этади.

ҚИСҚИЧБАҚА (22. 06 — 22. 07)

8 феврал сиз учун жанжалларга бой бўлиши эҳтимолга яқин. Йўқ, аслида қалбан ҳеч ким билан жанжаллашишни истамайсиз. Аммо эмоция дош бера олмаслиги мумкин. Уни назорат қилишга ожиз қоласиз. Кун давомида азалий орзуларингиздан бири ушалиши мумкин. Орзуингиздаги буюмни ниҳоят харид қиласиз. Аммо харидларни кечқурунга қолдиринг. Кундузи бу амал ишдан чалғитиши ҳеч гап эмас. Суюклингизни зинҳор ранжитманг.

АРСЛОН (23. 07 — 23. 08)

Бугун кунингиз туғадиган бўлиб турибди. Лавозимингиз ё мартабангиз ошиши, молиявий соҳада мўмай даромадларга эгалик қилишингиз эҳтимоли бор. Яқин ўтмишдан қолган, бартараф этилмаган муаммолар ортга чекинади. Муҳаббатда миянгизга бўлмағур хаёллар бостириб келишига йўл қўйманг. Агар жуфтингиз ёки бўлғуси жуфтингиз сизни росманасига севса, тушунади ва орангизда англашилмовчиликлар бўлмайди. Айримлар кечқурун ўзга шаҳарга фавқулодда жўнаб кетишлари кутилмоқда.

ПАРИЗОД (24. 08 — 22. 09)

8 феврал куни эрталабоқ сизга кимдир қимматбаҳо буюм ёки жиҳозни ҳадя қилиши мумкин. Ким билсин. Балки у инсон суюклигингиз бўлиб чиқар. Бахтингиз ҳам бугун тўкисдан-да тўкисроқ бўлади. Ишда ҳам мушкулотлар кўзга ташланмайди. Ҳар кунгидек хотиржамликда зиммангиздаги вазифаларни бажараверасиз. Оилада анчадан бери режалаштирган бир амалингизни адо этинг. Сурункали хасталикка йўлиққан бўлсангиз, ўзингизни эҳтиёт қилинг.

ТАРОЗИ (23. 09 — 23. 10)

Бугун биринчи навбатда молиявий мушкулотлар гирибонингиздан олиши мумкин. Бу ҳам етмагандек, қариндошлардан бирининг хасталаниши кўндаланг туради. Буларнинг барчаси ишингизга ҳам жиддий халал бериши тайин. Аммо ишни ортга суриб бўлмайди. Барибир ўз вақтида адо этиб улгуришингиз керак. Аёллар ва қизлар куннинг иккинчи ярмида гўзаллик салонига чиқиб келишади-ю, кўзгуга боқиб ўзларининг нақадар гўзал эканликларига кўзлари тушади. Ёлғизлар учун кечқурун романтик учрашувга чиқиш имкони туғилади.

ЧАЁН (24. 10 — 22. 11)

7 февралда алданиб қолишингиз эҳтимоли юқори. Шунинг учун катта ишларга пул тикманг, нотаниш одамлар билан мулоқотга киришманг, ўтмишни ёдга олманг. Уй жониворларидан нарироқ бўлишингиз тавсия этилади. Улар аллергия қўзғатиши мумкин. Мабодо шундай бўлиб чиқса, дарҳол дерматологга мурожаат этишингиз керак. Дарҳол муолажа бошланг. Кечқурун хонадонингизга меҳмонлар ташрифи кутилмоқда.

ЎҚОТАР (23. 11 — 21. 12)

Бугун ўзингизни жуда яхши ҳис этасиз. Кайфиятингизда позитивлик яққол кўзга ташланиб туради. Оиласиз бўлсангиз, бунинг ўзига хос сабаблари бор. Сиз кимнидир севиб қоласиз. Кўнгилсизликлар ортда қолди деб ўйламанг. Муаммо барибир бор. Бироқ уларни бир зарб билан бартараф этишга кучингиз етади. Компьютер қаршисида камроқ ўтиринг, кун давомида тоза ҳавода кўпроқ пиёда сайр қилинг. Об-ҳаво бу амални адо этиш учун кўнгилдагидек кечади.

ТОҒ ЭЧКИСИ (22. 12 — 19. 01)

7 феврал куни ўзингиздаги авантюризм, магнетизм ва либерализмни кенг намойиш этасиз. Атрофдагилар сизнинг бу қадар сержиҳат одам эканингизни кўриб ҳайратдан ёқа ушлайди. Оила қурмаганлар кун давомида янги танишган бир инсон билан мулоқотдан кейингина яхши кайфиятга эга бўлишади. Унинг оптимист эканидан хабар топишингиз сизни мамнун этади. Кечқурун кўпчилик аёллар уй юмушлари билан банд бўлади. Омад сизга ёр бўлсин!

ҚОВҒА (20. 01 — 18. 02)

Бугунги кунингиз асабий кечади. Лекин жиддий муаммолар кўзга ташланмайди. Пессимизмга асир бўлманг. Келажакка умид ва ишонч билан боқинг. Оёқ-қўлларингизда шиш пайдо бўлган чиқса, буйракларингизда оғриқлар сезилаётган бўлса суюқликни камроқ ичинг. Юрак хасталигининг олдини олиш учун керакли таҳлиллар топширишингиз талаб этилади. Кечқурун оилангиз даврасида вақт ўтказинг.

БАЛИҚ (19. 02 — 20. 03)

7 февралда ўзгаларнинг ишини ҳам кўнгилли равишда зиммангизга юклаб олишингиз тавсия этилмайди. Ўз вазифангизни аъло даражада адо этиш пайида бўлинг, вассалом. Кун давомида ёқимли хабарлар эшитишингиз ҳам эҳтимолдан холи эмас. Раҳбарларингиз маошингизни оширадиган кўринади. Қанийди. Суюкли инсонингиз билан муносабатлар совуқлашиб кетишини истамасангиз, шубҳа-гумонларга эрк берманг

ҚЎЙ (21. 03 — 20. 04)

Бугун кимгадир ваъда берган бўлсангиз, ёки ваъда берсангиз, албатта устидан чиқинг. Ҳаммаси эртакдагидек силлиқ кечаверади деб ўйламанг. Иш вақтида ўтмишдаги тажрибангизни ёдга олинг. Бу муваффақият гаровига айланиши мумкин. Бугун зарарли одатларни ташлаш жуда хайрли кечади. Саломатликни мустаҳкамланг. Спорт билан мунтазам шуғулланишни ўзингизга одат қилиб олинг. Омад сизга ёр бўлсин!

БУЗОҚ (21. 04 — 20. 05)

7 феврал куни пул сарфлашни минимум даражага қадар камайтиришингиз керак. Пул йиғишни жуда яхши уддалай оласиз. Демак, топганингизнинг бир қисмини заҳирага олиб қўйсангиз, фойдадан холи бўлмайди. Шахсий ҳаётда жуфтингиз билан ўзаро муносабатларни тартибга солинг. Тез-тез айтишиб қоладиган одатингизни ташласангиз, яна яхши. Жуда бўлмаса, психолог хизматидан фойдаланинг.

ЭГИЗАКЛАР (21. 05 — 21. 06)

Эрталаб кўзгуга боқинг. Ташқи қиёфангизга ижобий ўзгартишлар киритиш палласи етган кўринади. Аёллар ва қизлар терини тозалаш, уни фойда берадиган кремлар билан парваришлаши шарт. Тиш дўхтирига ҳам бирровга чиқиб кела қолинг. Куннинг иккинчи ярмини фақат ўзингизга бағишланг. Дўстларингиздан бири ҳе йўқ-бе йўқ қаёқдаги гапларни гапириб асабингизга тегиши мумкин. Ўзингизни эшитмаганга солинг, вассалом. Кечқурун албатта тоза ҳавода сайр қилинг.

ҚИСҚИЧБАҚА (22. 06 — 22. 07)

7 февралда ишхонангиздагилар сизга у қадар ишонқирамаслигини англаб етасиз. Шунча куч ва вақт беҳуда сарфланганидан хафа бўласиз. Лекин бугун сиз учун пул ишлаб топиш вариантлари кўп. Кучингизни тўғри тақсимлай билсангиз бас. Ҳамкасбларингиздан кимдир жуда муҳим лойиҳани қандай тез ва тўғри ҳаётга тадбиқ этиш усулини сир тутаётган кўринади. Агар шу масаланинг тагига ета олсангиз, раҳбарлардан олқиш олган бўлардингиз.

АРСЛОН (23. 07 — 23. 08)

Бугун арслон буржида таваллуд топганлар учун анча оғир кун бўлади. Аёлларни ишдан кўра ташқи кўриниши кўпроқ қизиқтира бошлайди. Ўзингизга ёқадиган иш топинг. Топа олмасангиз, бугунги кунни маданий ҳордиқ чиқаришга бағишланг. Дангасаликка асло йўл қўйманг. Айримлар аллергия ва гастрит қўзғалишидан безовталаниши мумкин. Бу муаммони дори ва парҳезсиз бартараф эта олмайсиз.

ПАРИЗОД (24. 08 — 22. 09)

7 феврал куни янги муаммолар устингизга ёпирилмаслиги учун жуда сергак туришингиз керак. Олдинда баҳор. Иммунитетингиз эса тушиб кетган. Агар ўз вақтида муаммони ижобий ҳал этмасангиз, хасталиклардан қочиб қутула олмаслигингиз тайин. Куннинг иккинчи ярмида ёлғизларга собиқ севгилиси қўнғироқ қилиши кутилади. Бундан мамнун тортасиз. Кимларгадир ҳануз керак эканингиз кўнглингизни кўтаради. Оллоҳ сизга ёр бўлсин!