"Кеўилим кеширмелери"

КИМЛЕР БОЛА АЛАР ТУЎЫСҚАНЫҢДАЙ

Бирге өскен тай қулындай тебисип,
Сен-менге, келмеген хасла керисип,
Қуўанған табысқа жетсең ерисип,
Кимлер бола алар туўысқаныңдай.

Ата үйден: қустай ушып тараған,
Жан ашырың, мүтәжиңе жараған,
Сағынып жолыңа айдай қараған,
Кимлер бола алар туўысқаныңдай.

Мисли ажыралмас ет пенен тырнақ,
Мудам жүретуғын жырыңды жырлап,
Айтсаң: муқыятлап дәртиңди тыңлап,
Кимлер бола алар туўысқаныңдай.

"Аш болсаң" жегени бойына батпай,
Аўырсаң пәрмана, қабағын шытпай,
Хызметиңе таяр ертлеўли аттай,
Кимлер бола алар туўысқаныңдай.

Абыройға шерик тырысқанындай,
Арың ушын белин буўысқанындай,
Бир нанды тең бөлип жеген уяда,
Кимлер бола алар туўысқаныңдай.

Сениң ушын жанын жаббарға берген,
Алдын алған: саған, апаттың келген,
Туўылып бир анадан, ақ сүтин емген,
Кимлер бола алар туўысқаныңдай.

Биреўи атқосшың, бири жас үлкен,
Аўырыңды жеңил етеди билсең,
Қаналасым деп, ой-баўырын үзген,
Кимлер бола алар туўысқаныңдай.

Мехирге лиммә-лим кеўил ханасы,
Дүнья, мүлкиңе жоқ сирә таласы,
Саналған көзиңниң ақ хәм қарасы,
Кимлер бола алар туўысқаныңдай.

Сағынып көрискен қушақ жайысып,
Басыңа ис түссе турған қайысып,
Кетпең олар менен жүзлер шайысып,
Кимлер бола алар туўысқаныңдай.

Акшолпан Аманияз

БИЗ ӨМИРГЕ КЕТИЎ УШЫН КЕЛЕМИЗ

Әрманлаймыз, арзыў-хәўес етемиз,
Дүнья жыйнап оны көз-көз етемиз,
Негизинде хеш ким тулға болмаған,
Биз өмирге кетиў ушын келемиз.

Қам сүт емген, бендемиз бар қәтемиз,
Менменсинип гейде хәси кетемиз,
Бар тапқаның қалып кетер артыңда,
Биз өмирге кетиў ушын келемиз.

Хәлсизлерге жудырықты түйемиз,
Хәмелдарға неге басты ийемиз,
Ханбысаң, я қарамысаң қалмайсаң,
Биз өмирге кетиў ушын келемиз.

Билип-билмей кеўиллерге тийемиз,
Бәрин көрип турыпты ғой ийемиз,
Жаўласаңда он сегиз мың әлемди,
Биз өмирге кетиў ушын келемиз.

Марапаттты жандай жақсы сүйемиз,
Ашыўланып сәл нәрсеге күйемиз,
Бендемиз ғой түсинбеймиз хеш соны,
Биз өмирге кетиў ушын келемиз.

Аўыз- бирлик сақлап жүриң адамлар,
Бес күним, хош күним дейди наданлар,
Жыласақта, сықласақта бәри бир,
Биз өмирге кетиў ушын келемиз.

Ҳүкимдар болсаң да жаўлап дүньяны,
Тәрк етерсең бир күни алтын уяны,
Ўақтынша дур жаратқанның инәмы,
Биз өмирге кетиў ушын келемиз.

Саўап қылсақ, гүнәмызды артамыз,
Мәйли пулға толып турсын қалтамыз,
Бир күн келип көш- көренди тартамыз,
Биз өмирге кетиў ушын келемиз.

Ўақты келип пайманамыз толады,
Жаратқаным- аманатын алады,
Өлмей мәңги кимлер дейсең қалады,
Биз өмирге кетиў ушын келемиз.

Не қалдырдың излериңде өлместей,
Жулдызыңыз ақса дағы сөнбестей,
Хау! ким едик, нызамларға көнбестей,
Биз өмирге кетиў ушын келемиз.

Акшолпан Аманияз