✍️ Jaydari Kopirayter | Kopirayting blogi

Ming afsus…

Juda ko‘pchilik metrodagi naqshlarning ma’nosini tushunmaydi

Soat 12 dan o‘tdi, men esa hali ham metroda o‘tiribman. Hali Bekobodga chiqib ketishim ham bor.

Eng qizig‘i, 4 haftadan buyon shu ahvol. Yo Bekobodga borolmayman yoki borsam ham shunaqa kech boraman yo bo‘lmasa, 1 kunda ham borib, ham qaytishimga to‘g‘ri keladi.

Shunda o‘ylab qolaman, o‘zi nima uchun harakat qilyapman, kim uchun ishlayapman?

Bugun ham bitta progrevni (onlayn sotuv) yakunladim va buning uchun 3.5 million so‘m oldim. Shu ish uchun 10 kun ishladim. To‘g‘ri, erta-yu kech emas, lekin baribir shu ish 10 kunga cho‘zildi-da.

Endi boshim qotgan, hozir 350 mingga har kuni quldek ishlagan bo‘lyapmanmi? Bu summa asosiy ishimdan kelmagan, ammo qo‘shimcha ish uchun ham juda kam-da.

Bu ketishda qachon uy olaman, qachon mening shartlarimga tayyor holatdagi qizni topaman, qachon ota-onamni boshqa davlatlarga sayohatga yuboraman?

Hozirgi lallayishim bo‘lsa, 3-5 yil ketishi aniq. Biroq men shu paytgacha 24 yilni yo‘q qilib bo‘ldim, yana oshiqcha 5 yil bu juda uzoq muddat. Men-ku kutaveraman, lekin yaqinlarim, menga ishonganlar kutishlarini hech kim kafolatlamaydi. Hammamiz ham bugun bormiz, ertaga Alloh biladi.

Shu sababli nimanidir ozgina yaxshiroq, ko‘proq va tezroq qilishga to‘g‘ri kelyapti.

Alloh bermaydiganini xayol qildirmas deyishadi. Bir paytlar 1.5-2 million oylik olganimda, qaniydi har bittasi oyiga 2 million to‘laydigan ishlar bo‘lsa deyardim. Mana hozir 10 kunga 3.5 million beradigani chiqsa ham ko‘nglim to‘lmayapti.

Nafs degani oxiri yo‘q o‘yindek gap ekan, 1-bosqichdan keyin 2-bosqich, undan keyin yana davomli bosqichlar va oxirida bu bosqichlar unchalik qiziq emasligini tushunganingizda, xato marafonda bellashganingizni bilasiz. Unda tabiiy-ki ancha kech bo‘ladi.

Shunday ekan jarayondan zavqlanib boraverish kerak. Nega deganda kino tugasa, faqat ketkazgan vaqtingizga achinasiz. Qalbga taskin beradigani kinodagi go‘zal xotiralar va chiroyli voqealar bo‘ladi. Faqat ularning soni kino ko‘rish davomida maza qilganlarda ko‘proq bo‘ladi.

Shuning uchun kitob o‘qiyotganda uni 1.5X tezlikda o‘qishga harakat qilish har doim ham eng to‘g‘ri variant emas va aksincha, ba’zi bir audiolarni 2X qo‘yib eshitgan va hatto umuman ochmaslik ham zo‘r variant bo‘ladi.

Chunki matn yozishga imkoni bo‘la turib audio jo‘natgan. Audio yozayotganda esa insonning o‘ylashga vaqti kam bo‘ladi va natijada keraksiz fikrlarni bildirib qo‘ygan bo‘lish ehtimoli juda yuqori.

Xulosa qiladigan bo‘lsak, yer osti metrodan yetib kelganimcha yer usti metrosi yopilib qolibdi. Endilikda qolgan yo‘lni taksida bosib o‘tishga to‘g‘ri keladi. Mehmonxonada narsalarimni yig‘ayotganda buni hisobga olganman, shunga xavotir olmang, yetarlicha pul bor.

Yaxshi dam oling. Bu gaplarim bilan hech nima demoqchi emasman, shunchaki metroda bekor o‘yin o‘ynab ketgandan bekor post yozib ketdim-da. Lekin Siz gaplarimga yengil qaramang, kechqurun kelgan G‘ayrat aka kunduzi kelgan 10 nafar Ilhom akadan ancha bilimliroq bo‘ladi.

UPD. 24:55 da yetib keldim, navbati kelgan haydovchi akaga hozir yursangiz ketaman dedim.

Haydovchi aka niyat 01:00 ga, agar shu vaqtgacha odam chiqmasa, yuraman dedilar.

1 soatdan buyon to‘lmayotgan mashinaga mendan tashqari 3 daqiqada 2 kishi keldi-ku. Shuning uchun aytaman, yaxshi niyat yaxshi-da.

@Munira_Mustafa kopiraytingga vaqtlari kam-u, lekin bir og‘iz aytsangiz, yordamlarini ayamaydilar

#shogird

Ramazon yaqin…

Bu oyda ko‘p narsa boshqacha bo‘ladi. Jumladan, reklamalar ham.

O‘zi kompaniyalarga taqvim olib tarqatishni tavsiya bermayman. Nega deganda hamma shunday qilgani hisobiga, taqvimga bo‘lgan ehtiyoj 0 ga tushib ketadi.

Endi Siz baribir bilganingizdan qolmasangiz va taqvim tayyorlatayotgan bo‘lsangiz, ko‘pchilik qilayotgan xatoni qilmang.

Taqvimning maqsadi (asosiysi hammaga ma’lum) faqatgina brend taniqliligi emas, balki sotuvni ham oshirishga yordam berishi mumkin.

Qanday qilib desangiz, taqvimning 2-tomoniga aksiyadagi mahsulotingiz yoki xizmatingiz haqida ma’lumot bering (Belissimo shunday qilibdi, lekin menga ular taklif qilayotgan narx juda qimmat tuyuldi, shu sababli 2-tarafini rasmga olmadim).

Faqat u narx rostan ham Ramazon kelganini bildirish kerak. Ya’ni ilmli insonlar aytgandek, Ramazonda arzonchilik bo‘lishiga sabab bo‘lsin.

Endi o‘zimning xizmatlarim va ayniqsa, kurs narxiga to‘xtalsak, o‘tgan yili 50% chegirma qilganimda, kursni olganlarga nisbatan natijaga chiqqanlar foizi keskin tushib ketgan. Shu sababli bu Ramazonda chegirma e’lon qilmoqchi emasman.

Lekin hali Ramazon oyi kelmasidan, 3-4 nafar do‘stlarimiz shu oyda chegirma qilishimni so‘rashibdi.

Ammo boya aytganimdek, chegirma qilolmayman. Biroq o‘zini narxida oling deyishim ham noto‘g‘ri.

Keling, shu sababli bir ish qilamiz. Shunda six ham kuymaydi, kabob ham.

Agar kopirayting xizmatlari bo‘yicha byudjetingiz men so‘ragan xizmat narximga to‘g‘ri kelmasa, men Sizga Sizdagi byudjetga mos tajribali mutaxassis topib beraman. Hatto tekin ishlaydigani kerak bo‘lsa ham.

Kurs narxlarida esa yengillik qilib berishga tayyorman. Faqat o‘zingizda bor byudjet bilan juma kuni murojaat qiling. Sizdagi byudjet necha pul bo‘lishidan qat’i nazar, shu byudjetga mos tarifni yoki taklifni berishga harakat qilaman.

Va Sizni ham nima ish qilishingizni farqi yo‘q, xizmat ko‘rsatayotgan yoki mahsulot taqdim etayotgan insonlaringizga boshqa oyga nisbatan ozgina yengillik qilishga urunib ko‘ring. InshaAlloh, hamma taraflama aniq baraka topasiz, nasib qilsa.

Oldin ofis yo‘qligida va hozirgacha ham zudlik bilan qaysidir ishni hal qilish kerak bo‘lib qolsa, istalgan kafe yoki oshxonaga kiraman, suv, limon choy yoki qora bijilloq suvning shakarsiz variantidan olaman-da, ishimni qilib o‘tiraveraman.

To‘g‘ri, ishlash uchun qilingan hududlaridagidek (coworking) juda qulay emas, lekin 5-10 mingga 10 martalab arziydigan sharoiti bor, deb hisoblayman. Qolaversa, bunaqa joylarni topish uchun uydan tashqariga chiqib, istalgan tarafga 400-500 metr yursangiz bo‘lgani.

Balki viloyatlarda oshxona va kafelar bu darajada ko‘p emasdir, lekin yetarlicha ekani aniq.

#topilma

#shogird

Bu do‘stimizni oshiqcha tanishtirib o‘tirishga zarurat yo‘q. Bilgan biladi, bilmagan o‘zi biladi)

Xalqimiz to‘q va boy, ko‘z tegmasin.

Qaytimni ba’zilari tangaligi uchun olmasa, yana ba’zilari shunchaki qaytim bo‘lgani uchun olmaydi.

Cheklarni ham ba’zilari kambag‘al yoki ziqna ko‘rinishni istamaganliklari uchun o‘tkazmasa, yana ba’zilari arzimagan pul hisoblab, vaqtlarini ketkazishni xohlashmaydi.

Bu kabi holatlar odatda supermarketlarda ko‘p kuzatiladi. Har qanday supermarketda o‘zining ilovasi bo‘ladi va shu ilova orqali 1% keshbek olishingiz mumkin. Keyin xarid cheki bilan “Soliq” ilovasidan yana 1% qaytarib berishadi.

Bu eng minimal miqdor, olgan mahsulotingizga qarab, keshbek 30-40 % gacha ham bo‘ladi. Mayli, o‘rtacha 2% ham deylik, shuni olishga kim yoki nima qarshilik qiladi?

Dono xalqimizning “Toma-toma ko‘l bo‘lur” degan gapi bor. 10 ming bo‘ladimi yoki 100 ming, harna-ku, shu pulni kim Sizga beradi?

Ishonmasangiz, qiziqishga, ko‘chadagi odamlardan pul so‘rab ko‘ring. Qani kim pul berarkin? Bu gapni zerikkanimdan aytmayapman, rostan so‘rab ko‘ring. Ishoning, oson emas. So‘rashga juda qiynalasiz. Ichingizda tushunarsiz hissiyotlar kechadi va ko‘p anglashlarni bilib olasiz.

Endi mavzuyimizga qaytsak, arzimagan pul Sizga kerak bo‘lmasa, shuni kerakli insonlarga bering. Deyarli hamma savdo markazlarida zarur insonlar uchun maxsus quti joylashtirilgan, odamlar hech bo‘lmasa qaytim va cheklari bilan bo‘lsa ham kerakli insonlarga yordam berishga harakat qilyapti. Siz ham shu odamlar safiga qo‘shiling.

Birinchidan, Sizning arzimagan, mening arzimagan pullarim yig‘ilib yaxshigina summa bo‘lishi mumkin.

Ikkinchidan, bergan sadaqangizni qaysi biri qabul bo‘lishini bilmaysiz yoki qaysi biri kerakli insonga borib, unga manfaat ulashishini o‘lchay olmaysiz. Shuning uchun ehsonning kattasini qilyapsizmi, Sizdan nima ketdi, kichigina ham qilavering.

Bu gaplarim bilan nima demoqchiman? Bezrayib turmay, reaksiya bosing-da:)

Inson o‘zi aytgan tavsiyasiga amal qilganida, uning tavsiyasi boshqalar uchun ham qadrli, ham ta’sirli bo‘ladi.

Dori ichishdan oldin mutaxassis bilan maslahatlashing degan akalarimiz, Sizlar ham reklama chiqarishdan oldin mutaxassis bilan maslahatlashing-da)

#kopirayter_kerak

Kopirayter uchun eng zo‘r ishlardan biri — Telegram kanal yuritish

Nega deganda 2024-yildan boshlab juda ko‘p brendlar Telegramga ham fokus qaratishni boshlashdi. Top brendlarni-ku, gapirmasa ham bo‘ladi, oyiga $ 4000-5000 byudjet aynan Telegram sahifa uchun ajratiladi.

Bu juda katta imkoniyat degani. Chunki juda ko‘p loyihalar Telegramdagi oddiy joylarda ham xato qiladi. Bunga asosiy sabab — katta brendlarning Telegramga qiziqishi boshlanganiga hali uncha ko‘p bo‘lmadi.

Kopirayter esa o‘zi Telegramning odami. Albatta, mijozdan loyihasini olish oson bo‘lmaydi. Lekin natija qilingan mehnatga arziydi. Loyiha yashar ekan, Telegram yuritiladi, bu Sizning 1 ta loyihadan har oylik maoshingiz tayin degani.

1-1.5 million kichkina summa bo‘lishi mumkin. Ammo buni 1 yilga, 10 yilga hisoblasa, yaxshigina mablag‘ degani. Qolaversa, shu 1 millionni ham kim Sizga berib qo‘yadi? Kam bo‘lsin, barakasini bersin, harna-da)

#kopirayter_kerak

Juma kuni do‘kondan 1-2 ta narsa olgandim. Qaytim qaytarayotganda yana 1000 so‘m berishim kerak, o‘rniga qurt ola qoling, deb aytdi.

Odam ko‘pligi uchun xayol bilan qurt olish esimdan chiqibdi. Bugun kirib o‘tgan safar qurt esimdan chiqqanini va hozir olmoqchiligimni aytdim. Sotuvchi yigit mamnuniyat bilan olishim mumkinligini aytdi.

Shunda xalqimiz orasida mashhur bo‘lgan gap esimga tushdi: So‘raganning aybi yo‘q.

Hozirgi davrga kelib bu jumlani mana bu ko‘rinishda o‘zgartirsa bo‘ladi: Qayta-qayta, qayta-qayta so‘raganning aybi yo‘q.

Sinfdoshim turmush o‘rtog‘idan telefon raqamini so‘radi, uylanish uchun ko‘p harakat qildi. Hozir shirin qizchasi bor, baxtli oila.

Dadamdan universitetdan ketish uchun ruxsat so‘radim, rozi bo‘lishlari oson bo‘lmadi. Ayni vaqtda o‘zim yaxshi ko‘rgan va yuqori daromad keltiradigan ishim bor.

Shogirdim “ish bormi?” deb so‘ragandi, hozir frilansdagi loyihalarimning yarimini shu qiz qilib beradilar.

Hamkasbim $ 80 turadigan original krossovkani $ 25 evaziga olishi mumkinmi, deb so‘radi, sotuvchiga Instagram bo‘yicha yordam berib, hozir shu krossovkani kiyib yuribdi.

Akam, $ 7000 turadigan Sparkni birdaniga emas, qo‘shimcha ustamalarsiz, shu narxda bo‘lib bersam bo‘ladimi, deb mashina egasidan so‘radi.

Hozir shu mashina oilasi va ro‘zg‘origa yordamchi.

Bitta obunachi kursimga chegirma qilib berishimni so‘radi, hozir shu o‘quvchi individual tarifga 780 ming chegirma bilan qo‘shildi.

Bunaqa misollar juda ko‘p. Sizning ham hayotingizda shu kabi voqea bo‘lgan bo‘lsa, izohlarda yozib qoldirsangiz bo‘ladi.

Gapning indallosi, nimadir kerakmi, nima kerak bo‘lishidan, kimdan so‘rashga to‘g‘ri kelishidan qat’i nazar, so‘rang, chunki so‘raganning aybi yo‘q.

Juda zo‘r o‘ylashibdi

E’lon, vizitka yoki shu kabi Sizning xizmatingizni tavsiflaydigan reklamalarni odatda insonlarning o‘zi tashlab yuboradi.

Agar odamlar uni kerak bo‘ladi, deb qoldirishgan holatda ham reklamangiz simyog‘ochlar, yo‘laklar kabi yerlarga joylangan bo‘lsa, uni obodonlashtirish xodimlari tozalab ketishi zarur.

Lekin Siz ko‘rib turgan reklamani olib tashlashmagan. Nega deganda u yerda o‘ta zarur holatdagi murojaat uchun raqamlar berilgan va oxirida sekingina taksi kompaniyasi o‘zining raqamini ham qo‘shib qo‘ygan.

Eng qizig‘i, buni birinchi marta Bekobodda ko‘rdim. Balki boshqa joylarda bu kabi usuldan foydalanishayotgandir, ammo hozircha mening e’tiborimga tushmadi.

Oddiy flayerni olsak, uni hamma olgan zahoti katta ehtimol bilan tashlab yuboradi. Biroq shuning matni uchun ham kopirayterga o‘rtacha $ 20-30 to‘lashadi.

Endi shu kopirayter yuqoridagi keysimizdagidek, nimadir o‘ylab topsa-yu, odamlar shu sabab flayerni tashlab yubormasa, bu o‘z-o‘zidan sotuv oshishiga ta’sir qiladi. Buning natijasida kopirayterga ham bemalol 3-4 barobar ko‘proq pulni rozi bo‘lgan holatda berishadi.

Shu sababli atrofdagi shu kabi reklamalarga e’tibor berib yuring. Chunki ertaga kopirayter sifatida ish boshlasangiz, juda foyda beradi. Hozir esa e’tiborni hech nimaga chalg‘itmay, yotib uxlang)

#keys

Kopiraytingni shunisi yaxshi. Birdaniga katta maosh olmasligingiz mumkin. Lekin bir oyda bir necha marotaba kam-kamdan choy puli tushib turadi.

#mashaalloh

Kopirayter nima ish qilishini yaqinda bo‘lgan #keys misolida ko‘rib chiqamiz

1. Kopirayter — idea generator. Aytaylik, mijozning bir nechta filiali bor. Bir nechta filiali bor biznesmenlar biladi, qaysidir filialda savdo zo‘r bo‘lsa, yana qaysidirida savdo past bo‘ladi.

Shu holatda nimadir idea qilish kerak. Kamolondagi do‘stlarimiz 50 ming so‘mgacha bo‘lgan miqdorda kupon qilishibdi. Bu Siz borib 70 minglik ovqatlansangiz, 20 ming to‘lab chiqib ketishingiz mumkin degani. Mijozni chaqirib olish uchun juda zo‘r aksiya o‘ylab topishgan.

Shu yerda ham bitta nozik joyi bor. Kupon miqdori kam bo‘lsa, xaridorlar bormaydi. Ko‘p bo‘lsa, mijoz katta xarajatga tushishi mumkin. Shu sababli kuponni necha pulligidan, necha dona chiqarilishini ham yaxshilab hisoblab chiqish kerak.

2. Kopirayter — tanqidiy tafakkuri bor mutaxassis. Miya hammada ham bor, ammo aynan gap matnlar haqida ketganda, kopirayter kuchliroq fikrlay olishiga ishonish kerak bo‘ladi.

Manzil kirilchada yozilsa, bir paytlar qolib ketgan “Кичик халка йули, 13” holatida turish kerak edi. Biroq baraka topishsin, manzilni lotinchada yozishibdi, lekin “Халка” so‘zidagi q harfini to‘g‘rilashibdi-yu, shu h harfiga e’tibor berishmabdi-da.

Yana bitta kechirilmas xato — sanalarning 2 xil yozilgani. Agar inson bilmay turib xato qilsa, buni tushunish mumkin. Ammo bitta joyda bitta yozuvni 2 xil yozilganini kasb nuqtayi nazaridan kechirish ozgina qiyin. Nega deganda bu xato bilimsizlik emas, balki e’tiborsizlik natijasida yuzaga kelgan.

Tushunmaganlar uchun gap “12-yanvar” va “19- yanvar” yozuvlari haqida ketyapti. Bu yerda qaysi variant to‘g‘ri ekani ahamiyatsiz, bittasi xatoligi aniq. Shu xato esa to‘g‘ri yozilishi qanday ekanini bilgan holatda qilingan.

3. Kopirayter = ChatGPT 10.0. Shu kupondagi matnni sun’iy intellekt ham yozib beradi. Biroq sun’iy intellekt 2 km radiusda 2 ta bir xil manzil bo‘lishini taxmin qila olmaydi (shunaqa kino ham bo‘lardi, eslaysizmi?) va yoki-da o‘zi borib tekshirmaydi.

Kamolon operatorlariga telefon qilsangiz, “kupon kichik halqa 13” manzilida amal qilishini aytishadi. Kartaga xuddi shu manzilni kiritsangiz, qandaydir tartibsiz joyga oboradi. Kamolonning Gulzor filiali esa bu yerdan yarim soatlik yoki 15-20 ming so‘mlik uzoqda joylashgan bo‘ladi.

Shaxsan o‘zim ham shu sababli ovora bo‘lib, hafsalam pir bo‘ldi. Eng qizig‘i, kollektivga ham Kamolonga borish haqida men aytgandim, ularning oldida ham hijolat bo‘lib qoldim-mi?

Endilikda menda eng yaxshi ko‘rgan brendlarimning biriga nisbatan nafrat hissi paydo bo‘ldi, buyog‘iga nafaqat bu yerga bormayman, balki boradiganlarni ham qaytaraman. Bu postni kuponning aksiya muddati o‘tib ketganidan keyin joylayotganim, boshqa kollektivlarim bilan Kamolonga emas, boshqa joyga bormoqchiligim, shu gaplarimning isboti bo‘ladi.

1 ta kollektivimiz bilan o‘tirishimiz 300-500 mingga tushadi. Kopirayter do‘stimiz yuqoridagi xatolarga e’tibor berganlarida edi, men yana 2-3 ta kollektivimni oborish bilan birga shu aksiya tugamasidanoq xolis reklama ham qilib berardim.

Ko‘rib turganingizdek, bitta mijoz sababli brend qaysidir ma’noda qisman zarar ko‘rdi. Bu mijozni qo‘llab-quvvatlaydigan shu postni o‘qiyotgan boshqa bir inson sababli brend yana zarar ko‘rishi mumkin bo‘ladi. U mijozni hurmat qiladigan insonlar sababli brend yana zarar ko‘rishda davom etadi. Bu zanjir davom etib ketaveradi va vaqt o‘tgani sayin ulangan har bitta halqani uzish hamda to‘xtatish shunchalik qiyin bo‘lib boraveradi.

Hazillashyapman, ja unchalik vahimali emas. “Boyga jin urarmidi” degandek, kichkina xatolar katta brendga men tariflaganchalik katta zarar keltirmaydi. Bu gaplarni shunchaki kopirayterning qadr-qiymati qanchalik yuqori ekanini tushuntirish maqsadida yozdim.

P. S. Baribir ham Kamolon jamoasiga #kopirayter_kerak deb o‘ylayman. Albatta, bu mening fikrim, adashayotgan bo‘lishim ham mumkin)