Zafar Khashimov

Кеча Киев шаҳрида ўтган яна бир аҳамиятли ходиса Киев Миллий санъат галереясида очилган “Украин рассомларининг Самарқанд эпопеяси 1941-1945” деб номланган бадиий суратлар кўргазмасининг очилиши бўлиб ўтди.
Бу кўргазма ўз ичига Иккинчи Жаҳон уруши йилларида Ватанимизга эвакуация қилинган бир гуруҳ украин рассомлари мўйқаламларига мансуб бўлган юзлаб асарларни ўз ичига қамраб олган.
Бу лойиҳа ҳар икки миллат орасида мавжуд маданий тарихий алоқаларининг яна бир янги жабҳасини очиб берди.

Кўргазма ўтиши ташаббуси Ўзбекистоннинг Украинадаги элчиси Alisher Kurmanov ҳамда Украинанинг Ўзбекистондаги элчиси Mykola Doroshenko лар томонидан қизғин қўллаб- қувватланиши натижасида амалга ошди.

Бу кўргазма ўтказишда ва унга бағшланган бадиий журнал чоп этилишида мен ҳам Ўзбекистон Украина ишбилармонлар Кенгаши номидан ўзимнинг камтарин моддий хиссамни қўшганим билан фаҳрланаман.

Бу кўргазма ва унинг тарихига, ҳамда унда тақдим қилинган асарлар репродукцияси жойлаштирилган бир юз олтмиш саҳифалик “Антиквар” номли санъат журналининг маҳсус сонини ҳар иккала ўзбек ва украин тилларида чоп этишга ҳам муяссар бўлдик.

Яқинда журналнинг ўзбек тилидаги тиражи Ватанимизга олиб келиниб, кенг оммага тақдим этилиб, кутубхоналару, санъат ва маданият масканларига, ўқув муассасалари-ю ва санъат мактабларига топширилишини режа қилаяпмиз.

Кеча Украина пойтахти Киев шаҳрида мен раислик қиладиган Ўзбекистон Украина Бизнес Кенгашининг навбатдаги учрашуви бўлиб ўтди. Бу Кенгаш 2021 йили Ўзбекистон ва Украина Савдо- Саноат Палаталари томонидан таъсис этилган бўлиб, шундан бери у ҳар иккала мамлакат тадбиркорлари орасида самарали ҳамкорлик муносабатларини мустаҳкамлаб келмоқда. Украинада давом этаётган уруш шароитида ҳам мамлакатларимиз ишбилармонлари ўтган йили ўзаро товар айрбошлаш ҳажмини ўсишига эришганликлари бунга далил бўлаолади. Учрашувда Ўзбекистон ва Украина Элчи жаноблари, Украина Савдо- саноат палатаси Раиси ва мутассадилари ҳамда Украина ишбилармонлик доиралари вакиллари қатнашди. Учрашув жуда очиқ ва самимий ўтди ва унда мавжуд муаммолар қайд этилиб, уларни бартараф этиш бўйича тадбир ва амаллар белгиланди. Шундай муаммолардан бири, мисол учун келтирсам, Украинага Ўзбекистондан келадиган текстил маҳсулотларининг божхона қийматини биздан келаётган инвойс ва декларация асосида эмас, балки қатор холларда украин божхонаси белгилайдиган қимматроқ қийматда қайд этилиб, маҳсулотларимиз Украина бозорига кираётган пайтида юқорироқ ҚҚСга тортилаяпти. Йиғилишда шу каби муаммолар Украин ҳамкорлари ва мутассадилари эътиборига тортилиб, уларни бартараф этиш бўйича чоралар кўришга келишиб олинди. Бу каби масалаларнинг бир талайгинаси муҳокама қилинди ва яна қатор соҳаларда, жумладан уруш шароитида азият чекаётган қатор украин ишлаб чиқариш корхоналарини Ўзбекистонга релокация қилиш, креатив иқтисодиётда ҳамкорликни ошириш каби таклифлар муҳокама қилинди.