☘️HASAN va ZUHRA - RUHIYAT va SHEʼRIYAT☘️

  🌹 АЁЛ 🌹

       (8-март байрамига атаб)

Дунё сенинг пойингда тиз чўкса арзир бугун,
Жаҳонда тенгсиз малак, сирли сийратсан, Аёл!
Чаман кўрки — гул мисол яшнаб очилиб гулгун,
Сен ҳусни малоҳатда шаксиз ибратсан, Аёл!

Меҳринг қайнар булоқдай қайнаб оқар тинмайин,
Ишқинг сўнмас оловдай ўтлар ёқар дам сайин,
Ўзинг дардда ёнсанг ҳам, юзинг боқар жилмайиб,
Сен сабру қаноатда чексиз ҳимматсан, Аёл!

Ҳар нега бардошлисан, минг битта митти жонинг,
Ором билмас қувватинг етгунча бор имконинг.
Оиланг-чун, боланг-чун бахш этурсан ҳар онинг,
Борки не синоатда — тенгсиз қудратсан, Аёл!

Сен вафо тимсолисан — бу жаҳонни асровчи,
Донишлар онасисан — ҳар замонни асровчи.
Қўрғонингда бир умрга бир "ёмон"ни асровчи,
Сен бахту саодатга тўла ҳикматсан, Аёл!

Сен, асли, кенг оламнинг чироғи — нур, зиёси,
Гўзалликда топилмас чиройинг йўқ қиёси.
Сенсиз яралмагайдир Муҳаббатнинг дунёси,
Сен ишқий самоватда сарҳадсиз бахтсан, Аёл!

Шодон кулсанг, бу олам сенла бирга кулгайдир.
Кўриб ҳуснинг — ошиқнинг ярим кўнгли тўлгайдир,
Дунё меҳринг тафтидан яшнаб — Дунё бўлгайдир,
Сен қиёматга қадар тенгсиз хилқатсан, Аёл!

Сен хилқатсан, сен ҳикматсан, сен ибратсан, эй Аёл!!!

✍ЗУҲРАХОН АБДУЛҲАКИМХОН қизи

@HASANvaZUHRA

ТОПИЛМАС

Дардима чин малҳами дармон топилмас,
Жонима жон бўлгали Луқмон топилмас.

Кеча-кундуз ғам чекиб тортсам жафолар,
Онажонимдек бирор гирён топилмас.

Ишқ аро юз минг балоларни кўрибон,
Бу оламда мен каби сарсон топилмас.

Тим қаро қалбим сира бир дам ёришмас,
Қувнатиб дил ёзгали хандон топилмас.

Кўзларимни яйратолса эрди олам,
Бу фанода Жаннатул Ризвон топилмас.

Суҳбатига мафтун айлар қайда бора,
Мен дили нозикка хос султон топилмас.

Англагилким Зуҳрахон, бу заҳматингга
Ёлғиз Оллоҳдин бўлак дармон топилмас.

ЗУҲРАХОН АБДУЛҲАКИМХОН қизи

@HASANvaZUHRA

Синглим Зуҳрахоннинг шеърларидан қўшиқлар куйлаган Марғилонлик ҳофиз укамиз Абдураҳмон қўшиқлар альбомини бизга жўнатибдилар, эшитиб дуо қилиб қўйинглар азизларим...

БАХТ ОСТОНАСИ

(Қиз узатаётган Она сўзлари)

Яхшиларга кенг олам, саховатли бўл, қизим,
Аллоҳ ва расулига итоатли бўл, қизим.
Ёр-ёр садоси билан кетяпсан бахт уйига,
Раббим дилингда бўлсин, ибодатли бўл, қизим,
Икки дунёда бахтли, саодатли бўл, қизим!

Қизлар қадим қадимдан палахмоннинг тошидир,
Ҳар қадаминг гул бўлсин бу ҳаётинг бошидир,
Кўзларида онангнинг дарёли кўз ёшидир,
Мендан кўнглинг тўқ бўлсин ҳаловатли бўл, қизим,
Икки дунёда бахтли, саодатли бўл, қизим!

Улғайибсан бир пасда, сезмай қолдим жон қизим,
Асраб сени авайлаб ҳар хатардан, ёлғизим.
Сен кўкдаги порлаган танҳогина юлдузим,
Тош келганда кемиргин қаноатли бўл, қизим,
Икки дунёда бахтли, саодатли бўл, қизим!

Борган жойингда тош қот, аямагин меҳрингни,
Яқинларинг кўнглин ол, қўшиб озроқ сеҳрингни.
Доим яхши ном билан ёд этсинлар зикрингни,
Меҳрингни баробар қил, адолатли бўл, қизим,
Икки дунёда бахтли, саодатли бўл, қизим!

Мевали боғ яратгин, гулдир сенинг қўлларинг,
Ифори ширин бўлсин эккан ҳар бир гулларинг.
Қуёшдай порласанг гар нурли ҳаёт йўлларинг,
Оилангга, ёрингга садоқатли бўл, қизим,
Икки дунёда бахтли, саодатли бўл, қизим!

Розиман, то қиёмат берган ошу тузимдан,
Ибрат олгин сен менинг босган ҳар бир изимдан.
Ранжимагин, азизам, дилдан айтган сўзимдан,
Гўзал ҳаёт йўлингда фаросатли бўл, қизим,
Икки дунёда бахтли, саодатли бўл,  қизим!

ЗУҲРАХОН АБДУЛҲАКИМХОН қизи

@HASANvaZUHRA