Shohruxbek Alibek

“Aloqa operatorlari tomonidan undiriladigan bitta SMS o‘rtacha narxi 300 foizga oshishi ham taʼsir ko‘rsatdi”

Iqtisodchi Otabek Bakirov yozmoqda:

Karrasiga oshayotgan tariflar uchun faqat UzCard va Humo‘ni so‘kishga shoshmay turing (albatta, ularniyam so‘kish kerak). Eʼtibor bergan bo‘lsangiz kerak, O‘zbekistonda bironta uyali aloqa kompaniyasi sizga kiruvchi SMS-xabarnoma paketini taqdim etmaydi. Vaholanki tarifingizda hech qachon ishlatilmaydigan chiquvchi 100ta, 500ta, 1000ta va cheksiz SMS paketlari biriktirilgan bo‘lsa ham.

Pulli va kiruvchi SMS-xabarnomalar bu uyali aloqa kompaniyalari va kontent provayderlarni abonentlarni eng ko‘p shilib oladigan segmenti hisoblanadi.

Mana qarang, Play Mobileʼning o‘zi yozayapti: ”aloqa operatorlari tomonidan undiriladigan bitta SMS o‘rtacha narxi 300 foizga oshishi ham taʼsir ko‘rsatdi”. Ertaga Humo ham xizmat narxini oshirsa, buyam tili bir uyali aloqa kompaniyalarining bosimi va ochko‘zligi tufayli bo‘ladi.

Tasavvur qilayapsizmi 300%! Yana bu ajdarholarga 2025-yildan aksiz solig‘i bekor qilingan. Byudjetdan bularning cho‘ntagiga kamida 1,2 trln.so‘m pul qaytib berilgan. Tariflarni yashirincha va til biriktirib oshirishdi, buyam kamlik qildi. Endi kiruvchi va pulli SMS-xabarnomalarni karrasiga qimmatlashtirish orqali bizni qoqishtirishni davom ettirishmoqchi. Har kuni, har soatda!

Albatta, yangi O‘zbekistonda isteʼmolchining himoyati yo‘q. Isteʼmolchilarni himoyasiga o‘tishi kerak bo‘lgan organlar esa maqsadli ravishda kuchsizlantirilgan, mustaqilligi o‘ldirilgan, o‘zbekistonliklarni talayotgan ajdarho va qaroqchilarga qarshi maʼmuriy resurssiz qoldirilgan, hatto ovoz chiqarishga ham ular zaif. Sud yo‘q. Muttaham oligarxiyaga qarshi isteʼmolchi taraf bo‘lib chiqishi kerak bo‘lgan matbuot ovozi senzuraning yangi va yangi usullari qo‘llanilib o‘chirilgan, o‘chirilishda davom etmoqda.