Рўзадор учун икки хурсандчилик бор
Рамазон фазилатли, муборак ой бўлиб, Аллоҳ таоло бу ойда инсонларга кўп яхшиликларни берган. Бу ойнинг фазилатлари, бу ойда рўзадорлар учун бўладиган яхшиликлар ҳақида Набий соллаллоҳу алайҳи васалламнинг ҳадиси шарифларида баён қилинган. Мана шу яхшиликлардан бири “рўзадорларга бўладиган икки хурсандчилик” бўлиб, бу ҳақида ҳадиси шарифда шундай дейилган:
عَنْ أَبِي صَالِحٍ الزَّيَّاتِ، أَنَّهُ سَمِعَ أَبَا هُرَيْرَةَ رَضِيَ اللَّهُ عَنْهُ، يَقُولُ: قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ:» قَالَ اللَّهُ: كُلُّ عَمَلِ ابْنِ آدَمَ لَهُ إِلَّا الصِّيَامَ، فَإِنَّهُ لِي وَأَنَا أَجْزِي بِهِ، وَالصِّيَامُ جُنَّةٌ، وَإِذَا كَانَ يَوْمُ صَوْمِ أَحَدِكُمْ فَلَا يَرْفُثْ، وَلَا يَصْخَبْ، فَإِنْ سَابَّهُ أَحَدٌ أَوْ قَاتَلَهُ، فَلْيَقُلْ: إِنِّي امْرُؤٌ صَائِمٌ، وَالَّذِي نَفْسُ مُحَمَّدٍ بِيَدِهِ لَخُلُوفُ فَمِ الصَّائِمِ أَطْيَبُ عِنْدَ اللَّهِ مِنْ رِيحِ الْمِسْكِ، لِلصَّائِمِ فَرْحَتَانِ يَفْرَحُهُمَا، إِذَا أَفْطَرَ فَرِحَ، وَإِذَا لَقِيَ رَبَّهُ فَرِحَ بِصَوْمِهِ«. رَوَاهُ الْبُخَارِيُّ.
Абу Солиҳ Заййотдан ривоят қилинади: У Абу Ҳурайра розияллоҳунинг шундай деяётганларини эшитди: «Расулуллоҳ соллаллоҳу алайҳи васаллам айтдилар:
«Аллоҳ таоло: «Одам боласининг барча амали ўзи учун, фақат рўза мустаснодир. Чунки, у Мен учундир ва унинг мукофотини Ўзим бераман», деди. Рўза қалқондир. Биротангиз рўза тутган куни фаҳш сўз айтмасин ва бақир-чақир қилмасин. Агар бирортаси у билан сўкишмоқчи ёки уришмоқчи бўлса: «Мен рўзадорман», десин. Муҳаммаднинг жони қўлида бўлган зотга қасамки, албатта рўзадорнинг оғзидан келган ҳид Аллоҳнинг наздида мушкнинг бўйидан яхшироқдир. Рўзадорни хурсанд қиладиган икки хурсандчилик бор: Ифтор қилганда хурсанд бўлади ва Роббига йўлиққанида рўза тутганига хурсанд бўлади». Бухорий ривоят қилган. Ҳадисда: “Рўзадорни хурсанд қиладиган икки хурсандчилик бор: Ифтор қилганда хурсанд бўлади ва Роббига йўлиққанида рўза тутганига хурсанд бўлади”, дейилди. Демак, рўзадорнинг биринчи хурсандчилиги шу дунёда ифторлик пайтида бўлади. Бу хурсандчиликнинг боиси бир нечта бўлиши мумкин, улар қуйидагилар:
1. Зиммасидаги шу кунги фарз рўзани адо қилгани сабабидан.
2. Шу фарзни адо қилишга Аллоҳ таоло унга куч қувват ва тавфиқ бергани сабабидан.
3. Шу куннинг рўзасини тўлиқ адо қилганидан кўплаб савобларга эга бўлгани сабабидан. Ҳадиси шарифда шундай дейилган:
عَنْ ابْنِ عُمَرَ رَضِيَ اللَّهُ عَنْهُمَا، قَالَ: « كَانَ النَّبِيُّ صَلَّى اللهُ عَلَيْهِ وَ سَلَّمَ إِذَا أَفْطَرَ، قَالَ: » ذَهَبَ الظَّمَأُ وَابْتَلَّتِ الْعُرُوقُ وَثَبَتَ الأَجْرُ إِنْ شَاءَ اللهُ » . رَوَاهُ أَبُو دَاوُدَ.
Ибн Умар розияллоҳу анҳудан ривоят қилинади: У киши айтдилар: «Набий соллаллоҳу алайҳи васаллам қачон ифтор қилсалар:
«Чанқоқлик кетди, томирлар ҳўлланди ва иншааллоҳ ажр собит бўлди», дер эдилар».
Абу Довуд ривоят қилган.4. Кун бўйи бўлган очлик ва чанқоқликдан кейин Аллоҳ таоло унга таомланишни насиб қилгани сабабидан.
5. Ифтор пайтда дуолар ижобат бўлиши сабабидан. Бу ҳақида ҳадиси шарифда шундай дейилган:
عَنْ عَمْرِو بْنِ شُعَيْبٍ، عَنْ أَبِيهِ، عَنْ جَدِّهِ، قَالَ: سَمِعْتُ رَسُولَ اللهِ صَلَّى اللَّهُ عَلَيْهِ وَسَلَّمَ يَقُولُ: » لِلصَّائِمِ عِنْدَ إِفْطَارِهِ دَعْوَةٌ مُسْتَجَابَةٌ » . وَكَانَ عَبْدُ اللهِ بْنُ عَمْرٍو إِذَا أَفْطَرَ دَعَا أَهْلَهُ وَوَلَدَهُ وَدَعَا. رَوَاهُ الْبَيْهَقِيُّ.
Амр ибн Шуъайбдан, отасидан, бобоси розияллоҳу анҳудан ривоят қилинади: У киши айтдилар: «Мен Расулуллоҳ соллаллоҳу алайҳи васалламнинг: “Рўзадор учун оғиз очган пайтида ижобат қилинадиган дуо бор”, деб айтаётганларини эшитдим. Абдуллоҳ ибн Амр розияллоҳу анҳу оғзини очсалар аҳлини ва фарзандини чақириб, дуо қилардилар ». Байҳақий ривоят қилган.
Иккинчи хурсандчилик охиратда, Роббисига йўлиққан пайтда бўлиб, рўзадор тутган рўзаси сабабидан савоблари кўпайгани сабабли хурсанд бўлади.
Аллоҳ таоло барчамизни Рамазон ойида бериладиган яхшиликларга эриштирсин ва охиратда Раййон номли эшикдан жаннатга киришни насиб айласин.Канал манзили 👇
•••••┄┄┄┄༻❅༺┄┄┄┄•••••
https://t.me/Beshkappa_uzz
