Акнун сухане чанд роҷеъ ба ташдид дар баъзе калимаҳо баён карда мешавад. Дар ин маврид низ ғалаткориҳо ба назар мерасанд. Дар баъзе калимаҳое, ки аслан ташдид надоранд, ташдид мегузоранд ва баръакс калимаҳоеро, ки бояд бо ташдид навишта шаванд, беташдид менависанд. Маълум аст, ки дар калимаҳое чун «миннат», «ҳиммат», «диққат» ташдид мавҷуд аст. Аммо қаламкашони мо калимаҳои «зинат» ва «қимат»-ро ҳам бо ташдид менависанд, ки ғалат аст. Ба ин монанд калимаҳои «сода», «тило» ва «фавқулъода»-ро ба гунаи «содда», «тилло» ва «фавқулъодда» менависанд, ки дуруст нест. Баръакс калимаи «бача»-ро бояд «бачча» навишт, то саҳеҳ бошад. Мо дар забон калимаҳои мураккабе чун «пирмард», «пирзан», «барзгов», «шаҳрёр», «бахтёр» ва «Исфандёр» дорем. Мутаассифона, то имрӯз ба таркиби онҳо ҳарфе афзудаву ба шакли «пирамард», «пиразан», «барзагов», «шаҳриёр», «бахтиёр» ва «Исфандиёр» менависанду талаффуз мекунанд, ки иштибоҳе беш нест. Ин ғалат вақте маълум мешавад, ки калимаҳои мавриди назарро ба ҷузъҳо ҷудо кунем: пира(?)+мард, пира(?)+зан, барза(?)+гов, шаҳри(?)+ёр, бахти(?)+ёр, Исфанди(?)+ёр. Чун калимаҳои «пирзол» ва «ҳушёр»-ро бо ин калимаҳо муқояса намоем, ғалатнависиямонро дармеёбем. Калимаи «парвардгор»-ро ҳам метавон зикр кард, ки иштибоҳан «парвардигор» навишта мешавад. Бояд гуфт, ки чунин иштибоҳҳо имрӯз дар забону баёни мо фаровонанд.
Аз ин рӯ, ҳар яки мо бояд бо камоли ғамхорӣ нисбат ба забони худ амал кардаву барои пок нигоҳ доштани он бикӯшем ва андешаи худро огоҳона баён намоем, то мӯҷиби эроду нуктагирӣ нагардад, ки бузургон гуфтаанд:
Сухан бояд ба дониш дарҷ кардан,
Чу зар санҷида в-он гаҳ харҷ кардан.
Мубашшир Акбарзод
┄┅অঠই✯❀✯ইঠঅ┅┄
http://T.ME/BO_ZABONI_TOJIKI_MEOMUZEM
