#eski_qaydlardan
Hayot naqadar qisqa, kitoblar naqadar ko'p!
Sizning ham borganingizda vaqtni to'xtatib qo'yishni xohlaydiganingiz yer bormi?
Menda bor. Ular - kutubxonalardir.
Bugun - payshanba, anchadan beri kirishni orzu qilganim Makkadagi Masjidul Harom kutubxonasiga* kirdim. Kutubxona mo'jazgina, ammo kitob shaydolarining aqlini o'g'irlaydigan darajada ajib kitoblar bilan to'ldirilgan. Bu yerga kelganimda aqlimga 3 narsa keldi:
1. 25 yil umrimda nima o'rganoldim o'zi?
2. Bular namuncha ko'p, umr buncha qisqa, o'qishga ulgurarmikinman?
3. Alloh taolo fazl qilib jannatiga kiritsa, Undan kutubxonalar ham bo‘lsa kerak, axir, Kitobida:
[ لَهُمۡ فِیهَا مَا یَشَاۤءُونَۚ كَذَ ٰلِكَ یَجۡزِی ٱللَّهُ ٱلۡمُتَّقِینَ]
"Ularga u joyda (jannatlarda) ISTAGAN narsalari bor. Alloh taolo taqvo egalarini ana shunday mukofotlaydi", demaganmi?
Robbim fazl qilib Jannatiga kiritsa, kutubxonalar so'rab olardim!
Qiroatlar va tajvid, usulut tafsir va ulumul Qur'on bo'limlarida men hatto nomini eshitmagan kitoblar shu qadar ko'p, uyalib ketdim. Naysoburiy rohimahullohning birgina vaqf va ibtido mavzusi haqida yozilgan kitoblari 3 mujallad, e'rob haqida, usul haqida-ku, qo'yaverasiz...
Yozsam gapim tugamaydi.
Ammo, aytganimdek, kutubxona ancha mo'jaz chunki asosiy kutubxona masjid ichida emas, uning tashqarisida joylashgan deyishdi.
Xodimalar, baraka topishsin, asosiy kutubxona joylashuv o'rnini yuklab olishimga yordam berishdi. Men ularga maxtutlarga - qo'lyozma asarlarga qiziqishimni aytgandim, maxtutlarning skaner qilib joylangan bazasi elektron manzilini berishdi. Darvoqe, yana bu yerda Usmon Mus‘hafiniga oid tarixiy ma'lumotlar va undan olingan ba‘zi suratlar bor, ostiga bunday yozilgan:
"Asl nusxa Toshkent shahrida saqlanadi." ))
Masjidul haromga yo'lingiz tushganda kelishni tavsiya qilaman. Katta kutubxonani ham ko'rmoqchi bo'lganlarga manzil qoldiraman.
O'zimga qayta-qayta aytyapman: umr juda qisqa, kitoblar ko'p...
--------
Masjidun nabaviyda ham kutubxona bor. 16-eshikdan kirilarkan. Asr namozidan keyin ayol-qizlar uchun maxsus soatda kirishingiz mumkin. Biz besh yilcha avval musobaqa g'oliblari bilan kelganimizda masjid ostidagi qadimiy Mus'haflar joylashgan kutubxonani kezdirishgandi. Ammo men aytayotganim masjid ustida, vallohu a'lam.
--------
*Kutubxona masjid ichida, Malik Fahd eshigidan (79-eshik) kirganda o'ng tarafda joylashgan, 4-qavatda.
Ayol-qizlar uchun haftaning ikki kuni: payshanba va shanba kunlari asr namozidan keyin maxsus soatlarda ishlaydi, kitobxonlarga ayol xodimalar xizmat ko'rsatadi.
*Naml surasi, 31-oyatdan.
*Katta kutubxona manzili:
https://maps.app.goo.gl/cXonycWeCMdA7p737Juma-shanba kunlaridan tashqari har kuni ertalab 8 dan kech 8 gacha ishlarkan.
2022-yil oktyabr, Makka
