Buyuklikka erishish, katta rejalar, olamshumul ishlar haqida
Internetda ko'p ko'zingiz tushayotgan bo'lsa kerak, qayerga qaramang hamma ziyolilar buyuklikdan, oliylikdan so'z aytyapti. Bu qanchalik to'g'ri? Ha, ular yoshlarga, insonlarga motivatsiya berishga harakat qilayotganidan shunday fikrlarni aytayotgandir.
Mening nazarimda esa bunday targ'ibotlar unchalik to'g'ri emas. Hamma joyda buyuk bobolarimiz, buyuk allomalar, buyuk siymolarning so'zlari, hayotlari, amallari haqida gap ketyapti. Odamlarga qarata "qani shunaqa buyuk bo'laylik endi" deyilyapti.
Katta rejalar qilinglar, buyuk g'oyalar ortidan yuringlar, oliy ilmlarni ko'zlanglar deyilyapti.
Nahot, to'g'ri hayot yo'li shu bo'lsa? Ilmda cho'qqiga intilish, katta-katta bunyodkorlik ishlarini amalga oshirish, eng top o'qishlarda o'qish, top joylarda ishlash, top mutaxassis bo'lish. Shumi inson uchun bir marta beriladigan umrning chizmasi?
Bunday targ'ibotlar yaxshi, lekin to'g'ri hayot shundangina iborat emasku! Yoki insonlar orasida eng to'g'ri yashayotganlar mana bunaqa "cho'qqilar", "buyukliklar", "oliyliklar" ga intilib yashayotganlar emasku!
Maktab xonalarini tozalab, peshona teri bilan pul topib, bolasiga deb ilinib tushligini yemay uyiga ko'tarib ketayotgan otalar, onalar, akalar, opalar inson emasmi?
Dalada ketmon chopib, mol boqib yurgan kishi noto'g'ri yashayaptimi?
To'g'rilik va noto'g'rilik me'yorlarda adashib ketmayaptimi odamlar? Ayniqsa yoshlar?
Asli to'g'ri hayot halollikda, soddalikda, qalb sofligida emasmi?
Axir eshitmaganmizmi, yuzlagan masjid qurdirgan kishi vafot etganida shu qurdirganlari sabab emas, bomdod namoziga ketayotganda bir mushuk bolasini yomg'irdan panaga olib qo'ygani sabab Alloh taolo uni mag'firat qilib jannatiga kiritmaganmidi?
Yuzlab masjidlar bermagan mukofotni bir bechora, ojiz mushukka qilingan yaxshilik bermaganmidi?
Buyuk ishlar qilsak, oliy rejalarni amalga oshirsak, ular oxiratda tarozi bosmasa nima qilamiz? Butun umrimizni havoga sovurgan bo'lmaymizmi?
Men aytgan bo'lardimki, gap buyuklikda, katta ishlarda, oliy himmatda emas. Gap ixlosda, gap qalbda, samimiyatda.
Inson dunyoni yaxshilikka to'ldirsayu, qalbida ixlosi bo'lmasa, qilganlaridan nima foyda?
Inson bir qishloqning bir burchagida, kulbada yashasayu, qo'lidagi bir burda nonini qushlarga sochib bersa, qalbida Alloh bo'lsa, buyuk ishlar qilganlardan ustun emasmi?
Bizni hamma tanisayu, Alloh taolo tanimasa nima foyda?
Biz hammani tanisagu, Alloh taoloni tanimasak nima foyda?
Shunday ekan, do'stlar, buyukliklar, kattaliklarni bir chetga qo'yaylik. Mayda ishlarimizni ham ixlos bilan qilishga harakat qilaylik. Insonlarning tarozisiga aldanib, hamma kimni maqtasa shuni o'zimizga na'muna qilib olavermaylik.
*Tibosfera ustozimizdan)
