Замбаракнинг ўқи

Ишқилиб, ўртоқлар, уй серверида СИдан локал фойдаланиш ғояси “ухлади”. Серверим кучсизлик қилар экан.

Каттароқ моделлар тўғри жавоб беряпти, аммо анча, бир неча дақиқа кутишга тўғри келяпти. Кичикроқ моделлар анча “шустрий”, аммо томи кетиб қоляпти — уй ичидаги ҳароратни сўрасангиз, ташқаридагисини айтяпти.

Бир неча моделни ишлатиб кўриб, локал СИ ғоясидан воз кечдим. Уйни автоматлаштириш тизимимни Anthropic (Claude) API’сига уладим. (Улашдан аввал гуглласам, компания раҳбари Трампга қуллуқ қилмапти, уни танқид қилибди.) Энди уйдаги қарийб барча қурилмалар СИ учун очиқ, уларни СИ орқали овоз ёрдамида бошқариш имкониятига эга бўлдим.

Қизиқ томони, овоз локал серверда матнга ўтказилади, матн Anthropic серверига юборилади, ундан келган жавоб яна локал серверда овозга айлантириб, карнайдан эшиттирилади. Бундан ташқари, содда сўровлар тўлиқ локал серверда ишлайди.

Масалан, “кофемашинани ёқ” ёки “жалюзини оч” десангиз, сўровингиз локал серверда қайта ишланиб, бир неча миллисекундда амал бажариляпти. Агар мураккаброқ сўров берсангиз — “уй ичидаги ҳаво сифати қандай” — у ҳолда Claude AI “булут”да бир неча қурилмадан маълумотларни қайта ишлаб, сизга жавоб беради. Бунга тахминан 2 сония вақт кетяпти.

Мана шунақа гаплар, ишлаши менга ёқди ва ўзим ҳам анча нарса ўргандим.

@zambarakning_oqi

Ҳисоблаб чиқдим: ўтган йилги даромадимнинг 26,6 фоизи солиқларга кетибди. Бунга провинциал ва федерал даромад солиғи, пенсия жамғармаси ва ишсизлик суғуртасига тўловлар киради. Дўкондан махсулот сотиб олишдаги савдо солиғи (5%) ва мулк солиғи кирмайди.

@zambarakning_oqi

Куёв Анвархўжа тилвизирга чиқиб кетипти. Ростакам тилвизирга чиқипти, манга ўхшаб ютуб-мутубгамас!

@zambarakning_oqi

12 соатдан сўнг кучга кириши кутилаётган божларни Трамп бир ойга қолдирибди. Энди божлар бир ойдан сўнг жорий этилармиш.

Унгача Канада чегарасини мустаҳкамлар экан. Чегарани 10 минг киши қўриқларкан, наркотикка қарши курашиш учун махсус инсон тайинланаркан.

Лекин бунинг ҳаммаси ўйин. Эртага Трампнинг кайфияти йўқ уйғонса, яна бир бало шантаж ўйлаб топади. Бугун чегара, эртага наркотик, индинга яна қандайдир ақлбовар қилмас бахона. Шу билан у Канадани қўрқувда ушлаб турмоқчи, шекилли.

Канада бу шаллақининг қилиқларини кўрди ва бу қилиқлар тўхташидан дарак йўқ. Энди Америкага орқа қилмай, иқтисодиётини диверсификация қилиши шарт.

Биз ҳам уйда иложи борича Канада махсулотларини ҳарид қилишга қарор қилдик. Бугундан бошлаб Amazon Prime, Netflix, Disney+, YouTube Premium бекор қилинди. Икки ҳафта аввал Амазоннинг Ring обунасини тўхтатгандим.

Майли, қўлдан келганча қўллаб-қувватлаймиз. Уёғини вақт кўрсатади.

@zambarakning_oqi

Ўтган йили бош вазир Трюдо Канаданинг чекка қишлоқларига интернет етказиш дастурини ишга туширди. Унга кўра, Канада ўз микройўлдош тармоғини қуради ва коинот орқали интернет етказишни йўлга қўяди. Бу янгиликка жавобан кўпчилик канадаликлар мамлакат ўз тармоғини қуриш ўрнига тайёр Starlink интернетидан фойдаланиш кераклигини таъкидлашганди.

Онтарио провинцияси қишлоқлари учун интернет етказиш мақсадида Илон Маскнинг Starlink компанияси билан 60 миллион АҚШ долларилик шартнома тузганди. Божлар ҳақидаги янгиликдан сўнг провинция бош вазири Starlink билан шартномани бекор қилишини таъкидламоқда.

Трюдо ҳам сал-пал у-бу нарсани биларкан, деб қўйдим ичимда.

@zambarakning_oqi

Трамп божлари ортидан Жастин Трюдога нисбатан муносабат ҳам ўзгаряпти. Канада бош вазирининг қўшнилар тажовузига билдираётган кескин муносабати канадаликлар томонидан тўлиқ қўллаб-қувватланяпти.

Масалан, аввал Трюдо ҳақидаги мақолалар, ютубдаги видеолар тагида аксарият изоҳлар салбий бўлган бўлса (масалан, “Йўқол, Трюдо”, “Қачон кетасан?”, “Тарихдаги энг ёмон бош вазир” ва ҳ.к.), ҳозир Трампга берган жавоблари тагида фақат ижобий комментлар.

“Мен Трюдони ёмон кўраман, лекин бу ишини тўғри қилди”, “Мен Трюдони қўллаб-қувватламайман, аммо Америкага қарши туриб, яхши иш қилди” ва ҳ.к. Ажаб эмас, кетар олдидан Трюдонинг рейтинги ошиб, одамлар “додамни қайтаринглар” деб йиғлаб қолса…

@zambarakning_oqi

Кеча АҚШ президенти Дональд Трамп мамлакатга кириб келаётган Канада ва Мексикада ишлаб чиқарилган қарийб барча махсулотларга 25 фоизлик бож ўрнатди. Шу муносабат билан Канада бош вазири Жастин Трюдо қарши чоралар кўрилиши ҳақида матбуот анжумани ўтказди.

Анжуманда бош вазир АҚШнинг энг яқин дўсти экани, АҚШ кетидан Афғонистон ва Ироқ урушларида иштирок этгани, 2001 йил 11 сентябрь куни АҚШ осмонида самолётлар парвози тақиқланиши билан юзлаб самолётлар Канада аэропортларига қўнгани ва канадаликлар минлаб йўловчилар бир неча кун меҳмон қилгани, АҚШда қандай табиий офат бўлмасин, канадаликлар ёрдамга биринчи бўлиб боришини, яқинда бўлган Лос Анжелес ёнғинларида Канада ёнғин ўчирувчи самолётлари хизматда бўлганини эслатди. Жастин Трюдо мамлакатнинг энг яқин иттифоқчиси нимага бундай иш қилаётганини тушунмаётганини таъкидлади.

Киритилган божлар нафақат канадаликларни, балки америкаликларга ҳам салбий таъсир қилишини айтиб, Канада ҳам жавобан АҚШ товарларига божлар жорий қилинишини эълон қилди. Трюдога кўра, бу божларни киритишни хоҳламайди, аммо АҚШ ҳукуматининг бундай қилиғига қараб турмаслигини таъкидлади.

Канада сешанба кунидан бошлаб АҚШда ишлаб чиқарилган қарийб 100 миллиард долларилик махсулотларга 25 фоизлик бож жорий қилади. Бундан ташқари, Онтарио ва яна бир неча провинция ўз худудларида АҚШда ишлаб чиқарилган спиртли ичимликлар сотувини батамом тўхтатади. Экспертлар ҳисоб-китобига кўра, натижада АҚШ спиртли ичимликларининг экспорти 45 фоизга қисқаради.

Бош вазир Трюдо агар бу ҳаракатлар натижа бермаса, бошқа тариф ва нотариф чекловлар жорий этилишини таъкидлади. Ўз нутқида у АҚШ учун жуда зарур бўлган қазилма бойликлар, шу жумладан нефть ва газ экспортига чекловлар киритилишига шама қилди. Мисол учун, АҚШ фойдаланадиган нефтнинг 60 фоизи Канададан сотиб олинади.

Икки томонлама божлар сабабли ҳар учала мамлакат: Канада, Мексика ва АҚШ миллиардлаб доллар ютқазади, махсулотлар нархи ортади. Бундан ҳеч ким ютмайди.

Мени хурсанд қилган нарса ҳам бўлди: бу канадаликларнинг АҚШга нисбатан таажжуб ва нафратида биргаликда бўлишидир. Ижтимоий тармоқлар Америка товарларини сотиб олмаслик, у ерга дам олишга бормаслик, АҚШ билан алоқаларни минималлаштириш ҳақидаги постларга тўлиб-тошиб ётибди.

Биз эса кузатишда давом этамиз.

@zambarakning_oqi

Путин Украинанинг газини сиқиб, ўзиникини ўтказишга ҳаракат қиларди.

Трамп Канада махсулотларига 25% бож киритиб, ўзиникини ўтказмоқчи.

Аммо у нима хоҳлаётганини ўзи ҳам билмайди.

@zambarakning_oqi

Трамп барча Канада махсулотларига 25 фоизлик бож жорий қилмоқчи. Эртадан!

Агар ростдан шундай қилса, экспортининг қарийб 2/3 қисми АҚШга тўғри келадиган Канада иқтисодиётига жуда қаттиқ зарба бўлади. Ҳатто Трюдо ҳам абжағимиз чиқишини тан олиб турибди.

Келинг, бунга позитив назар билан қараймиз:

Агар Трамп божларни жорий қилса, Канада иқтисодиёти “ухласа”, уни жонлантириш учун марказий банк ставкалари қарийб 0га туширилади, ҳудди ковид пайтидагидек. Шу пайтда менинг ипотекамни яна жуда-жуда паст ставкада янгилаб оламан ва ҳуштак чалиб ўтирман.

Мазза! Фақат у пайтда ишсиз қолмаган бўлсам бас 😄

@zambarakning_oqi

Аввал ҳам ёзгандим, Исмоил шаҳарнинг нариги чеккасидаги хусусий мактабга боради. Эрталаб уни ва қўшни болани мен ёки қўшним метро бекатига обориб ташлаймиз, уёғига ўзлари кетишади. Ўртача бир томон йўлга бир соат вақти кетади. Метрода юриши учун “проездной” олиб берамиз, ойига 757 минг сўм.

Мактаб хусусий бўлгани билан биз чўнтагимиздан пул тўламаймиз. Чунки хусусий мактаблар ҳам, худди давлат мактаблари каби, ўқувчи бошига давлат томонидан молиялаштирилади. Ҳудди шундай йўсинда ўқувчиларни сариқ автобусларда ташиш учун ҳам пул ажратилади.

Исмоилнинг мактаби бундай автобусларни жорий қилмаган, чунки ўқувчилар шаҳарнинг барча бурчакларидан боришади. Шунинг учун ҳам давлат транспорт учун ажратган пулни ота-оналарга қайтариб беришар экан.

Кеча келган имейлга кўра, биз июнь ойида 675 Канада доллари (қарийб 6,1 млн сўм) оларканмиз. Бу эса 8 ойлик “проездной” ҳаражатини қопларкан.

Қорин оғримайди.

@zambarakning_oqi

Суриш керак деяпти СИ. Яқинда грин карта ўйнаши ҳеч гап эмас 😂

P.S. Уни қийнамангларе, Хитой яқин, дронлари тепангизга учиб келмасин тағин ;-)

@zambarakning_oqi