Faqat tasodifan uchrashamiz biz.
Gul sotib olmaysiz menga ataylab.
Sogʻinchingiz toʻkkan kipriklarimni,
Yuzimdan termaysiz asta avaylab.

Faqat tasodifan uchrashamiz biz,
Bitta tabassumdan topamiz taskin,
Va har gal koʻngilni qult etib yutib,
Hamma oʻz yoʻliga ketadi sekin.

Faqat tasodifan uchrashamiz biz,
Bir siqib qoʻyamiz qoʻllarimizni,
Va ikki koʻchada qoldiramiz iz,
Ming yil poylasak ham yoʻllarimizni.

Faqat tasodifan uchrashamiz biz,
Men salom beraman, olasiz alik.
Nigohlar telbadek termular, ammo,
Tillar soʻzlashadi begonalardek.

Faqat tasodifan uchrashamiz biz.
Na sizda jurʼat bor, na menda yurak.
Balki shu alfozda oʻtadi umr,
Balki shundan baxtli yashasak kerak.

Faqat tasodifan uchrashamiz biz,
Ikkita gʻururi egilmas nodon,
Shunisi yaxshidir,birga emasmiz,
Demak ayrilmaymiz bizlar hech qachon!