Suyunov she'rlari

Mehrinozim,
Mehring ne-yu, nozing nima?
Timdalaysan yuragimni, sozing nima?
Ne istaysan mendan, kimsa javob qilmas,
Qarashlarda sehrlaysan, ko'zing nima?

Termulsam gar nigohingga g'arq bo'laman,
Tutashmasmiz sira, g'arb-u sharq bo'laman,
Yaxshi-yomon orasida farq bo'laman,
Meni avrab yo'lga solar so'zing nima?

Xudo seni siylagan ko'p, tan olaman,
Ado bo'lib qiynalgan ko'p, tan olaman,
Bular asli menga naf, xo'p tan olaman,
Boqib sira to'ymasman-ey, yuzing nima?

Husning ortar kun sayin, bu yetuklikmi,
Yuragimda hijron sen deb kemtiklikmi?
Bilmam asli men senga hech yetarlikmi?
Nega seni sevaman, ayt, o'zing nima?

Mehrinozim,
Mehring ne-yu, nozing nima?

sen,
sen go'yo nursan hayot yo'limda,
sen go'yo shamsan zulmatlarimda,
sen majbur qilasan kurashishga,
harakat qilishga,
tuzalishga,
yashashga.

sen,
sening isming bor edi kitobimda,
sen taqdir bexos uchrashtirgan, farishtam,
sen men uchun go'yo Nuh, sen meni qutqarasan,
cho'kishdan,
dunyodan,
o'zimdan.

sen,
bir sen bilan ruhim tinch sokin,
bir sen bilan but bor bisotim,
sen borki xotirjamman xuddiki ko'nglim to'qday,
taqdirdan,
sendan,
xudodan.

sen,
sen sirlaringni baribir aytmaysan,
sening aytganlaring barisi xolva,
sening dardlaring bisyor, cheksiz, adoqsiz,
sig'maydi senga,
sig'maydi menga,
sig'maydi bizga.

sen,
tushkunlik bitirgan asli seni ham,
g'amlaring yuraging kemiradi, qo'ymay tinch yashashga,
o'ylayman,
kammidi mendagi g'amlar?
demak, kam ekan,
chunki,
behudaga uchrashmaganmiz...

sen,
lekin, sen shunda ham kulasan kuch topib,
lekin, sen shunda ham o'ynoqi, shaddod,
lekin, sen shunda ham mendan yaxshiroq,
sen mendan yaxshiroq,
bizdan yaxshiroq,
hammamizdan yaxshi.

sen,
seni sababsiz sevaman,
chunki,
aslida chin sevgi shunaqa bo'ladi,
nega sevishini ham bilmaydi odam,
gar bir sabab topganimda ham,
sevmagan bo'lardim, ishon,
biroq, hech qachon sabablar topmaganman,
chunonchi,
seni yaxshi ko'raman!
bir seni,
xudoga qasam.

yo'q sen sevmagansan meni hech qachon

Tun. Sukunat. Sen haqingda o'y.
Ko'zga uyqu yo'latmas sira.
Qaydan erkam bunchalar chiroy,
Boqib suratingga sog'ina...

O'tar kun-u tunlarim bedor,
Sen uyquda, qilmaysan parvo.
Bilmam bunda ne sinoat bor,
Bormikan ishq dardiga davo?

Ikki qutbday birda talpinib,
So'ng, qochamiz yana barobar.
Bu sevgida, uning yolqini,
Goh kamayar, gohida ortar.

Lek, bilaman, istasam chiroy,
Kutmasman hech, oyning to'lishin.
Mening baxtdan chaqnashim uchun,
Yetar bittagina kulishing!

Shekspir aytganday, insonlar - aktyor,
Rollaring ham turfa, shodonsan, jimsan.
Faqat ijroyingda qolgan savol bor,
Hayot – teatr, sen sahnada kimsan?

Shekspir aytganday, hammamiz - aktyor,
Rollarimiz turfa, shodonmiz, jimmiz.
Faqat ijromizda qolgan savol bor,
Hayot - teatr biz sahnada kimmiz?

Bu dunyoda ayir bizni,
Sen kuzdirsan, men bahor.
O'rtamizda yotar muzlar,
O'rtamizda qorlar bor.

Bu dunyoda ayir bizni,
Sen quvonchsan, men alam.
O'rtamizda bulbul bo'zlar,
Goho shodon, goho g'am.