ЕТИМ БОЛА ЙИГЛАБ ТУРСА!..

Қатор-қатор масжид солинг, бари бекор,
Қимматбаҳо гилам солинг, бари бекор,
Жойнамозда ухлаб қолинг,  бари бекор,
Маҳаллада битта етим йиғлаб турса!

Гарчи бексиз, ошиғингиз доим олчи,
Дунё деган, ўтар кетар ёлғон фолчи,
Аршни ларзон қилар экан битта томчи,
Маҳаллада битта етим йиғлаб турса!

Мол топасиз,  кўз тутмайсиз эртасига,
Шариатда рухсат бор деб тўрттасига,
Уй қурасиз, жаҳаннамнинг ўртасига,
Маҳаллада  битта етим йиғлаб турса!

Ҳою-ҳавас,  ўтар кетар дунё фоний,
Ожизанинг сўроғлари ҳукми олий,
Кўзидаги жола эмас,  азоб оний,
Маҳаллада  етим аёл йиғлаб турса!

Ғаним бўлди икки қароғ бир-бирига,
Кўмилманг-ей,  ўтар кетар кун сирига,
Қадам босманг, Байтуллоҳдай пок ерига,
Маҳаллада битта етим йиғлаб турса!

Ёздим балки кимларнидир юрак  дардин,
Ўтолмадим, Аллоҳ деган гўдаклардин,
Кўзингизга суртолмайсиз жаннат гардин,
Маҳаллада битта етим йиғлаб турса.