Сәлем муҳаббат, сәлем заўықлы өмир, сәлем бахытлы адамлар

Бахыт - тек он еки мүшеси саламатлар ушын ба?
Бизиңше, қандай жағдайда, қандай турмыс кешириўимиз кейпиятымызға байланыслы. Бахтыярлықты жүреги шүкиршиликке толы адамлардың өмиринен бахытты тапсақ болады.
Ал, ондай адамлар болса қаламызда, арамызда бар.
Заманласымыз Жолмурза Жумамуратов балалықтан майып, имканияты шекленген. Ол майыплығы бойынша напақа алады. Соның менен бирге, Нөкис дийқан базарында арба айдап, шаңарағын тербетип отыр.
Гейде айырым адамлар саламат бола тура, есик қағып мүрәжат жоллап жүргенлигин көрип, еситип қаламыз.
Олардың мүрәжатларына қулақ түрер екенсең, өзи де ҳәрекет етсе, ерисиўге болатуғынлығын билсе де билмесликке алып атырғанына ашынасаң. Мәмлекет береди деп қол қаўсырып отырсақ, бизиң адамлығымыз қайда қалады?
Үйимди шиферлаў керек, ремонты жоқ, маған шомылыў ханасы керек, есигим жоқ, жумыс жоқ деген сылтаўларды нықап етип, мәмлекеттен пайдаланып қалсақ, есап деп жүргенлер бул видеоны көрип жуўмақ шығарар, уялар...