O'ZBEKISTONDA SOG'LIQNI SAQLASH - ЗДРАВООХРАНЕНИЕ УЗБЕКИСТАНА газетасининг расмий канали

🔴🟦🟦🟦🟦🟦🟦🟦

❗️Ўзбекистон – Франция: Мақсадлар аниқ ҳаракатларга айланмоқда

🇺🇿🇫🇷 Ўзбекистон Президентининг Францияга давлат ташрифи қизғин давом этаётган айни паллаларда ушбу мамлакат билан кўплаб соҳалар қатори, тиббиёт йўналишида ҳам манфаатли келишувларга эришилмоқда.

📍Хусусан, ташриф арафасида Париж шаҳрида бўлиб ўтган “Ўзбекистон – Франция” биринчи тиббиёт форуми доирасида Франция соғлиқни сақлаш вазири Янник Нойдер мамлакатимиз соғлиқни сақлаш вазири Асилбек Худаяров бошчилигидаги делегацияни қабул қилди.

🟣 Мулоқот давомида икки томонлама ҳамкорлик алоқаларини ривожлантириш масалалари муҳокама қилинди.

🏥 Маълумотларга кўра, Франция соғлиқни сақлаш тизими аҳоли саломатлигининг юқори даражаси, тиббий хизматлардан фойдаланиш осонлиги, даволаниш учун навбатлар йўқлиги ва бутун аҳоли малакали тиббий хизмат билан қамраб олинганлиги каби мезонлар бўйича ЖССТ рейтингида юқори ўринларни эгаллайди. Шу маънода, мазкур давлат билан соғлиқни сақлаш соҳасида ҳамкорлик алоқаларини мустаҳкамлаш фойдалидир.

✍️ Вазирлар ўртасидаги учрашувнинг энг муҳим қисми икки томонлама аҳдлашув декларацияси имзоланиши бўлди.

💬 Франция соғлиқни сақлаш вазири Янник Нойдер қайд этганидек, бу декларация ўзаро ҳамкорликнинг биринчи институционал босқичи бўлиб, мақсадларни аниқ ҳаракатларга айлантиради.

📌 Ушбу ҳужжатда тиббиёт мутахассислари ўртасида тажриба алмашиш, касалликларни эрта босқичда аниқлаш ва самарали даволашда юқори технологик ечимлар, чунончи, сунъий интеллект имкониятларидан фойдаланиш каби масалалар акс этган.

🔎 Шунингдек, делегациямиз сафар доирасида Франциянинг етакчи соғлиқни сақлаш муассасалари фаолияти билан яқиндан танишди. Хусусан, улар Париж шаҳри яқинидаги Сюрен шаҳарчасида жойлашган нотижорат ўқув шифохонаси — Фош госпиталида бўлди.

📍 Бундан ташқари, вакилларимиз онкологик касалликларни даволашга ихтисослаштирилган, ўз йўналишида Европада етакчи, дунёдаги энг яхши тиббий муассасалар ўнталигига кирувчи Густав Русси институти фаолияти билан ҳам яқиндан танишди.

📹 ССВ Матбуот хизматининг Франциядан шу ҳақда тайёрлаган видеолавҳаси яқин соатларда эътиборингизга ҳавола этилади.

Соғлиқни сақлаш вазирлиги
Матбуот хизмати.

🌐@ssvuz | 🌐@ssvmatbuotkotibi |🌐 Facebook | 🌐Instagram

Бухорода тиббиёт ходимлари ўртасида футбол турнири бошланди

Ўзбекистон Республикаси Президентининг 2020 йил 30 октябрдаги "Соғлом турмуш тарзини кенг татбиқ этиш ва оммавий спортни янада ривожлантириш чора-тадбирлари тўғрисида"ги қарорида белгиланган вазифалар ижросини таъминлаш, оммавий спортни ривожлантириш мақсадида Бухоро вилоятида спорт мусобақалари мунтазам ташкил этилмоқда.

Шу муносабат билан Бухоро вилояти Соғлиқни сақлаш бошқармаси томонидан тизимда фаолият юритаётган тиббиёт ходимлари ўртасида футбол бўйича "Бухоро соғлиқни сақлаш бошқармаси кубоги" турнири бошланди. Ушбу мусобақада вилоятдаги даволаш-профилактика муассасалари, туман ва шаҳар тиббиёт бирлашмаларида фаолият олиб бораётган врачлар иштирок этмоқда.

Мусобақа доирасида иштирокчилар ўз жамоалари билан ғалаба учун кураш олиб боришмоқда.

Ушбу турнир тиббиёт ходимлари ўртасида соғлом турмуш тарзини тарғиб қилиш, спортга бўлган қизиқишни ошириш ва жамоавий бирдамликни кучайтиришга хизмат қилади.

Мусобақа ғолиблари Наврўз байрами арафасида тантанали равишда тақдирланади.

➡️ Бухоро тиббиёти

Бухоро шаҳрида кенг кўламли тиббий кўрик ўтказилди

Бугун Бухоро шаҳридаги О.Хўжаев маҳалласида аҳоли саломатлигини мустаҳкамлаш ва касалликларни эрта аниқлаш мақсадида кенг кўламли сайёр тиббий кўрик ташкил этилди.

Тиббий кўрикда Бухоро вилоят соғлиқни сақлаш бошқармаси тасарруфидаги муассасалар ҳамда шаҳар тиббиёт бирлашмасида фаолият юритувчи 15 нафар малакали мутахассис иштирок этди. Фуқаролар мобил офтальмологик поликлиника, мобил проскан аппарати ва мобил донорлик бригадаси имкониятларидан фойдаланиш имкониятига эга бўлди.

Шунингдек, ижтимоий ётоқхонада ўтказилган тиббий кўрик давомида мутахассислар хонадонма-хонадон юриб, аҳолининг яшаш шароити ва тиббий-ижтимоий ҳолати яхшиланишига алоҳида эътибор қаратдилар.

Тадбир доирасида 980 нафар аҳолининг 327 нафари тиббий текширувдан ўтказилди. Уларнинг 232 нафари 18 ёшдан катта шахслар, 7 нафари 1 ёшгача бўлган чақалоқлар, 88 нафари эса 18 ёшгача бўлган болаларни ташкил этди. Шунингдек, 191 нафар туғруқ ёшидаги аёллар ҳам тиббий текширувдан ўтказилди.

Текширув натижаларига кўра, 325 нафар беморда жами 391 та турли хил касалликлар аниқланди. Мазкур ҳолатлар бўйича беморлар назоратга олиниб, уларнинг саломатлигини тиклаш учун зарур чоралар кўрила бошланди.

Шунингдек, тиббий кўрик давомида 20 нафар беморга ташкилотчилар томонидан бепул дори-дармонлар топширилди. 4 нафар бемор эса имтиёзли жарроҳлик амалиётига йўналтирилди.

Мазкур тиббий кўрик аҳолининг саломатлигини яхшилаш ва касалликларни эрта аниқлаш мақсадида ташкил этилган бўлиб, бундай тадбирлар келгусида ҳам давом эттирилиши режалаштирилган.

Эслатиб ўтамиз, тиббий кўрик эртага ҳам шу манзилда давом этади.


➡️ Бухоро тиббиёти