SHURTAN PFC

U21 chempionati. Liga o‘z yoshlari kelajagiga befarq klublarga chora ko‘rishni boshladi

20-fevral kuni U21 chempionati haqida material e’lon qilingan bo‘lib, unda Superliga klublari rahbariyatidan reglament talablariga diqqatli bo‘lish so‘ralgandi. Shuningdek, ularga “Superliga va Proliga reglamenti”ning 5.4 hamda 5.5-bandlarini o‘qib chiqish tavsiya etilgandi.

7-mart kuni Superliga yangi mavsumi start oladi. Tabiiyki, asosiy o‘yinlardan bir kun o‘tib U21 jamoalari maydonda ko‘rinish beradi. Zaxira jamoasi maydoni uchun talab aslida katta emas. Uning parvarishi uchun xarajat ko‘payib ketmasligi uchun, U21 jamoasiga ajriq bilan qoplangan stadionda to‘p surishi uchun ruxsat etilgan.

Liganing stadionlar uchun javobgar mutaxassislari o‘tgan vaqt davomida U21 jamoalari to‘p tepishi rejalashtirilgan maydonlarni o‘rganib chiqdi. Nasaf, Bunyodkor va Surxon klublari bu masalaga jiddiy e’tiborda bo‘lib, ularning zaxira maydonlari doimiy parvarishda, sifatli o‘yin uchun sharoit yetarli. Paxtakor va Andijon klublari bu borada ta’mirlash ishlarini olib bormoqda.

OKMK, Buxoro, Neftchi, Sho‘rtan, So‘g‘diyona, Mash’al kabi klublarning zaxira jamoalari maydonlarini Liga shartli ravishda qabul qildi. Biroq mana shu klublar rahbariyatidan zaxira maydonlariga jiddiy e’tibor qaratish va ularning holatini yaxshilash so‘raladi.

Qo‘qon-1912, Qizilqum, Xorazm, Navbahor, Dinamo klublari U21 jamoasi uchun taqdim etgan maydonlar Liga tomonidan o‘yinlar uchun qabul qilinmadi. Ularda qayd etilgan kamchiliklar bartaraf etilguniga qadar, Liga reglament bandlari bo‘yicha chora ko‘rishda davom etadi. Faqatgina Qo‘qon-1912 klubi belgilangan muddatning so‘nggi kunida Yaypandagi O‘zbekiston stadionini ro‘yxatdan o‘tkazishga ulgurgani uchun, mazkur klubning zaxira jamoasi Turon maydonidan foydalanib turadi. Samarqand, Xorazm, Navoiy shaharlarida esa afsuski U21 jamoasi o‘yinlarini o‘tkazishi mumkin bo‘lgan boshqa maydon mavjud emas. Navbahor klubi rasmiylarining Liga musobaqalari va talablariga bo‘lgan munosabati alohida mavzu bo‘lib, Liga ularning o‘z vazifasiga professional yondashishini bir necha yildan buyon kutib keladi.

Shundan kelib chiqib, Navbahor U21 — Dinamo U21 o‘yini uchun Liga o‘z rasmiylarini yubormaydi va mezbon klubga texnik mag‘lubiyat yozadi. Har ikki klub o‘zaro kelishgan holda o‘rtoqlik uchrashuvi tashkil etish huquqini o‘zida saqlab qoladi.

Shuningdek, raqib jamoaning zaxira maydonlari talabga javob berganidan kelib chiqib, Qizilqum va Xorazm o‘rinbosarlari o‘z uchrashuvini raqib maydonida o‘tkazadi. Mazkur taklif rad etilsa, ularga ham texnik mag‘lubiyat yoziladi.

🔴 O‘zbekiston Kubogi-2025

"D" guruhi

🔵 "Sho‘rtan"
⚪️ "Olimpik"
🔵 "Mash'al"