SEZIMLARIM...

#Sarhisob_2024_Yil

Alloh bergan umrni yashashga harakat qildim...
Oila qurish uchun birinchi qadamni qo'ydik... Nasib, xayrli bo'lsin... Baxtli oila bo'lish nasib qilsin, ilohim❤️❤️

Menlisan
Senliman
Baxtlimiz....🫶

Muhabbat ixtiyor et

( Nodira g'azaliga muxammas )

Zimistonlig' aro o'zni sharor et,
Ki tunning pardasin ochgil, nahor et,
Muhabbat bog'ida maqbul qaror et,
Na gul sayr ayla, na fikri bahor et,
Jahondin kech, xayoli vasli yor et.

Muruvvatsiz bashar Hotam emasdur,
Vafosiz oshno hamdam emasdur,
Shirin so'zsiz davo malham emasdur,
Muhabbatsiz kishi odam emasdur,
Gar odamsan, muhabbat ixtiyor et.

Yo'ling tushgan makon bag'rini yashnat,
Jamoling naqdiga hukmingni o'rnat,
Adadsiz nozlaring qizg'onmay o'rgat,
Uzoru qaddu raftoringni koʻrsat,
Chaman sarvu gulini sharmisor et.

Dili ozurdadurmen, dilni ovut,
Yuzi pajmurdadurmen, g'amni berkit,
Ko'zi ma'murdadurmen, Haqni yod et,
Labi maxmurdadurmen, jomi may tut,
Karam qil, soqiyo, daf’i xumor et.

Ko'ngil kibru havosin aylading fosh,
Sitam jabru jafosin aylading fosh,
Tazarru ham sanosin aylading fosh,
«Analhaq» mojarosin aylading fosh,
Kel, ey Mansur, istiqboli dor et.

Gahi mavj ur, oqib ko'nglim selig'a,
Tushib ishqing ila ellar tilig'a,
Xudo ek ishq Davronning dilig'a,
Kuyib, ey Nodira, olam eligʻa
Muhabbat shevasini oshkor et.

Shohrux Davron Ergashev

#Yordam_Bering

Assalomu alaykum, kanalchamdagi qadrdonlar! Bir iltimos bilan chiqyapman... Bir tanishimning farzandi og'rib qolgan. 60mln yig'ishi kerak ekan. Ko'pning duosi ijobat bo'ladi,- deyishadi... Ko'pning ozgina yordami ham qo'shilib ko'p bo'ladi...

Karta raqami: 9860030366418678


P/s: Batafsil yoza olmadim... Chunki birovning dardiga malham qo'yish yaxshi-yu "doston" qilishni afzal ko'rmadim...

#Duel_Uchun_Yuborilgan_Ğazallar

Bugun 14:00 da Duel tanlovi boshlanadi (Toshkent shahar bosqichi) ...

Quyidagi g'azallarim bilan qatnashyapman...
Omad tilab turinglar, qarindoshlar...🫶

#SENI_IZLAB

Hazaji musaddasi solim

Parishonman seni izlab saharlardan,
Sabo bergan o'shal daydi xabarlardan.

Azob o'lg'ay, seningsiz bir kunim o'tsa,
Seni asray Kumush ichgan zaharlardan.

Tilim beun, dilim dilxun, xarob o'ldim,
Izing ko'rmay ketar bo'ldim shaharlardan.

Samolardan topar erdim kezib hatto
Somon yo'lin qani bilsam qamarlardan.

Sinovingga duchor etding demay bir so'z,
Biroq jonim omon etding xatarlardan.

Va lek aslo ishim unmas seningsiz hech,
Menga ne naf kishi bermish samarlardan.

Ko'rib nogah tushimda men, terib gullar,
Visol istab, o'tib borsam guzarlardan.

Ne tong, Davron, diling bog‘lab vafo kutding
Senga har dam jafo qilgan basharlardan.

#Keltirar

Ramali musaddasi mahzuf

Har sinovni ibtidolig' keltirar,
Sabr boshga cho'ng ravolig' keltirar.

Har mashaqqat hikmatiga ko'nmasang,
Noshukurlik ko'p judolig' keltirar.

Ayshi ishrat rutbasin, bas, buzmasang,
Sharmisorlig', behayolig' keltirar.

Ota-onang olmasang gar duosin,
Boshga g'am, yuzga qarolig' keltirar.

Siyratingga e'tiborsiz bo'lmagil,
Za'faron rang, qahrabolig' keltirar.

Har yumushni e'tiqod-la et ado,
E'tiqodsiz ish xatolig' keltirar.

Yuzlanib sen Haqqa, beun yig'lagin,
Bedavoga ko'p shifolig' keltirar.

Ibtidolig' hukmini-ku ko'rguzur,
Asl haqni intiholig' keltirar.

Har qadamda Haqni, Davron, zikr qil,
Misli cheksiz ko'p atolig' keltirar.


#Solding

Hazaji musaddasi mahzuf

Firoqing chekkali dunyoga solding,
Dilimni beadad daryoga solding*.

Seni hijron ila kuyduraman deb,
Muhabbat dashtida javzoga solding?!

Badarg'a aylabon, holimni so'rmay,
Nechuk Majnun kezar sahroga solding.

Sinoving galma-gal gar kelsa qoshga,
G'anim bilmaydigan g'avgoga solding.

Dilimning tub-tubin Haq bilguchidir,
Biroq sen ham ani ifshoga solding.

Gunohimni qadar borgayki yozib,
Demak, umrim yo'lin inshoga solding.

Xatolarni tuzat,- derding mufassal,
Hayotim shu sabab imloga solding...

Ne tong, ko'nglim taraf ilma oyoq deb,
Meni bir umrga Mavloga solding.


*Shoira Shams masnaviysidan bayt


#KECHALAR

Ramali musammani maqsur

Pardasin yopganda ko'k ham bo'ldi tutqun kechalar,
Iztirobing kuydirar ko'p bunda mahzun kechalar.

Dod,- deyman, so'ndimi deb chin muhabbat gulxanim?!
Tobakay suv sepadursan emdi har kun kechalar.

Ishq dashtin aylanib men, xonumondin ayrilib,
Qismatim shul bo'lsa qilgil, mayli, Majnun, kechalar.

El aro yuz ming malomat chorasin men topmayin,
Yig'ladim ko'ksimni dog'lab Haqqa beun kechalar.

Ne ajabkim, nur taratgan qorachug' ham bo'ldi g'arq,
Ikki ko'zim qildi Sayhun birla Jayhun kechalar.

Dilbarim, men istamamdur durri g'alton ko'zlaring,
Oy kibi bag'rimga bot, oy sochsa nur tun kechalar.

Bilki, Davron, ne havodis bo'lsa hamkim dahrda,
Ahli oshiqlarga har dam berdi mazmun kechalar.


Shohrux Davron Ergashev