ЎҚИТУВЧИГА ОСИЛМАНГ

(ўқитувчиларни ойлигини камайтириш керак деган депутатларга)

Ҳой депутат оғаларим сотилманг,
Нишон кўрмас қийшиқ ўқдек отилманг,
Қиладиган йўқми бошқа ишингиз,
Ўқитувчининг ойлигига осилманг.

Устоз улуғ бўлган ҳамма замонлар,
Ноҳақ сўзлаб рангин қилманг сомонлар,
Вазирдан кўп маош берар японлар,
Ўқитувчининг ойлигига осилманг.

Ойлигини кўп кўрдими кўзингиз,
Ундан анча кўп оласиз ўзингиз,
Газ, светдан сўзланг ўтса сўзингиз,
Ўқитувчининг ойлигига осилманг.

Қаноти йўқ,, Тили" билан учганлар,
Ҳақдан кечиб ёлғонларни қучганлар,
Ҳой осмондан,, Саводли" бўп тушганлар,
Ўқитувчининг ойлигига осилманг.

Ҳаётга бир синчков назар солинг-чи,
Сиз ҳам бир кун устоз бўлиб қолинг-чи,
Бир августда талашиб дарс олинг-чи,
Ўқитувчининг ойлигига осилманг.

Кўксингизда йўқми номус, орингиз,
Бошқа куйга чалинг қўлда торингиз,
Осилгани йўқми уйда дорингиз,
Ўқитувчининг ойлигига осилманг.



Хуршид Карим




1.12.2024