Robbim, har kun yuzingni ko’zlab,
Sening uchun shirin so’z so’zlab.
Har bandangdan umidim izlab,
Hech biridan vafo ko’rmadim.

Na do’stingu, dushmaningdan ham,
Yuklagan yumushlaringdan ham.
Yozib qo’ygan ishlaringdan ham,
Hech biridan vafo ko’rmadim.

Yuzim rozi, ko’ngilda alam,
Eshitmaydi hech kimsa nolam.
Holim bilmas hattoki bolam,
Hech biridan vafo ko’rmadim.

So’zim shirin, yuragimda g’am,
Do’st qolmadi biror dona ham.
O’tiraman ko’zim to’la nam,
Hech biridan vafo ko’rmadim.

So’rasalar berardim borim,
Sotdim hatto nomusu orim.
Kelar deya kimdir bakorim,
Hech biridan vafo ko’rmadim.

Qaro bo’lsin eh nodon yuzim,
Bular axir bir mening so’zim!
Demak, bildim aslida o’zim,
Hech biriga vafo qilmadim…

Devona Musofir