#мулоҳаза
Қошга ўсма, кўзга сурма қўйган замонлар қайдадур,
Кўзда ҳаё, юзда ибо бўлган замонлар қайдадур...
Баҳсли мавзу: Гўзаллик қурбонлик эмас, қурбонлар талаб қилмоқда(ми)?! Халқимизда "Гўзаллик қурбонлик талаб қилади", деган гаплар юради. Аммо замона зайлига кўра қурбонлик эмас, бус-бутун қурбонлар талаб қиляпти шу кунларда.
Ҳа, бугун сизларга ҳали телеграмда, инстаграмда, ютубнику айтмаса ҳам бўлар, бездириб юбораётган ўша мавзу - сунъий гўзаллик оқибатлари ҳақида бироз фикрларимизни тақдим этмоқчимиз.
Аёлларнинг бу дунёдаги энг олий истаги гўзал бўлиш ва доимо гўзал бўлиб қолиш бўлса, ажаб эмас. Аммо ўз чиройига қониқмай гоҳи юзида гоҳи танасида турли (ёки тиғли) жараёнларни ўтказаётган ва бунинг оқибатида фожиавий ҳолатларга дуч келаётган аёллар (кўпи - ёшлар) кундан кун кўпайиб бормоқда.
Янада ачинарлиси, бундай ҳолатлар ҳеч кимга дарс бўлмаяпти.
Аслида инсонни ўз кўринишидан қониқмай, жарроҳлик столига ётишига нима мажбур қилмоқда, деб ўйлайсиз? Менимча жавоби жуда оддий. Бугунги кунда оммалашган инстаграм рельсларидаги мукаммал гўзалликни, идеал қад-қоматни, сутга чайилгандек юзлару, шаҳло кўзларни куну тун тарғиб қилаётган айрим машҳур юлдузлар, блогерларнинг ташвиқоти натижаси дейишимиз мумкин. Ҳаттоки улар жарроҳлик амалиётига ҳам саломатликларини ўйлаб эмас, реклама ортидан келадиган маблағга қизиқиб ҳам жонини хатарга қўйишгача боришмоқда.
Аслида, инстаграмдаги фильтр,(яъни ҳар қандай маҳлуқни соҳибжамол қилиб кўрсатувчи сеҳрли ойна десак ҳам бўлар), сторис олиш учун соатлаб ойна олдида ясан-тусан қилган ва бу ҳолат учун яхшигина мўмай даромад оладиган "юлдузчалар" га асло ҳавас ёки ҳасад қилманг, деган бўлардим. Уларнинг табиий ҳолатини кўрсангиз, ўзингиздан ҳеч ҳам ҳафа бўлмас эдингиз. Ҳаттоки, Кореяда машҳурликка эришган ва бир неча миллион таъқибчиси бўлган ёш ва гўзал қиз бир кун жонли эфирда фильтрларсиз узатилган ҳолатида ўғил бола эканлиги аён бўлди. Бунисига нима дейсиз энди.
Бутун дунёда ўзбек қизлари ори-номуси, шаъни, ибо-ҳаёси билан, латофати, назокати, табиий гўзаллиги билан ажралиб туради. Ёшлигимизда бувиларимиз қошларимизга ўсма қўйиб, сочларимизни майда кокил қилиб ўриб қўярдилар. Пардоз-андоз қилишга ҳам андиша қилар эдик. "Келин бўлганда бўянасан", дейилган гапларидан уятдан лов-лов ёнар эдик. Ҳамма табиий, оналаримиз момоларимиз улама кипригу, қош татуажи деган нарсаларни тушларида ҳам кўрган эмаслар.
Аммо замона зайли шу қадар ўзгармоқдаги, 18 га кирмаган баъзи қизларнинг иширилган лаблари, тортилган юзлари, юзини ёпкудак киприклари, яна худди ўзига икки томчи сувдек ўхшаш бўлган дугоналарини кўряпмиз. Жарроҳлар бир хил амалиёт бажаргандан кейин, ўхшаш чеҳралар ҳам кўпаядида.
Яна ҳам аянчлиси, ўлим ҳолатларини, юздаги тикланмас ўзгаришларни, турли юқумли касалликларни юқтириб олганларни кўра била туриб ҳам хулоса чиқаришмаётгани ачинарли.
Афсуски, қиз-аёлларнинг ўзлари устидаги бу каби ўзгартиришларидан эркакларнинг 99 фоизи норози. Улар ҳам табиийлик тарафдори. Лекин негадир аёлларимиз буни англашни истамаяптилар.
Албатта бу фикрларимиз барчага тегишли эмас. Оқила, солиҳа, борига шукр, йўғига сабр қилгувчи аёлларимиз, опа-сингилларимиз биз танқид қилганлардан кўра кўпроқдир. Уларнинг борига шукр.
Ўзбек аёлининг бор гўзаллиги ибоси ва ҳаёсидир. Ишонинг, дўмбоқ бўлсангиз ҳам, одми бўлсангиз ҳам, пардозсиз бўлсангиз ҳам яқинларингиз сизни борингизча севади.
Гўзал бўламан деб жонингизни гаровга қўйманг!!! Ишонинг, Сиз Дунёнинг энг гўзал аёлисиз!!!
Моҳигул СИДДИҚОВА.
https://t.me/nurli_toj
