Tashxis
①
Bemor:
Doʻxtir, bu kanji va soʻzlar juda koʻp-da! Senseimiz bizni tushunmaydi, uyga ham shunaqa koʻp vazifa beradi—kam deganda 20-30 ta.
Doʻxtir:
Senseing bir nimani bilmasa, shuncha koʻp vazifa bermaydi. Bu vazifalar seni imtihonda va umuman yapon tilida rivojlantiradi.
Doʻxtirning ichki ovozi:
Agar senseing sen xohlaganday kam vazifa berganida, sen besh oy emas, oʻn oy oʻqisang ham bir darajani tugatmagan boʻlarding. Oʻzing bir oʻylab koʻr: hozir qilayotgan vazifalaringni qoʻlingdan kelganicha, eng yuqori darajada bajarayapsanmi? "Men bugun darsni eng sifatli darajada qildim, oʻz ishimdan 100 foiz qoniqdim" deb ayta oladigan kunlaringni eslay olasanmi? Agar bunday kunlarni sanay olsang, bu juda kam ekanligini anglatadi...
Davo:
Vazifalarni kun davomida boʻlib-boʻlib bajar. Masalan, 80 ta kanjini 20 tadan boʻlib, 4 qismga ajratib yodla. 30 ta soʻzni esa 10 tadan oʻrgan. Shunda unum seziladi va qoʻrquv yoʻqoladi.
Xulosa:
Maslahat hammadan soʻraladi, ammo odam oʻzi tutgan yoʻlga eng yaqinini tanlaydi. Sizga zid maslahat qanchalik foydali boʻlmasin, unga amal qilish qiyin. Shuning uchun oʻzingizga mos yoʻlni kashf qiling. Agar allaqachon topgan boʻlsangiz, demak, siz toʻgʻri yoʻldasiz. Oʻzingizga samarali boʻlgan usulni mahkam ushlang.
