Mutolaa Zavqi

Siz-u biz yashab turgan ushbu dunyo hayotida nimalarni xohlaysiz?

Davomli, abadiy baxtli bo'lishni xohlaysizmi?

O'z hayotingizga ma'no beradigan oliy maqsadlarni qo'yib, ularga erishishni-chi?

Ruhan yetuk, aqlan zakovatli, jismonan sog'lom, xulqan kamolot sohibi bo'lib charaqlab yashashni istarsiz?

Jamiyatga foydangiz tegadigan ishlar qilib, ortingizdan iz qoldirishni xohlaysizmi?

Oilada, ishda va do'stlar davrasida eng sevikli va eng qadrli kishi bo'lishni-chi?


Yuqorida eslab o'tilgan sifatlarning barchasiga va ulardan-da yuksaklariga erishishingiz uchun ko'makchi va yo'l boshchi bo'la oladigan, hamda bu yo'lda o'zingizda sustkashlik his qilganingizda qayta-qayta o'qishga arzigulik va har o'qiganingizda o'zgacha ma'nolarni kashf etishingiz mumkin bo'lgan bir mo'tabar kitob bor bo'lsa, foydalanib qolish uchun uni mutolaa qilmasmidingiz?

Ojizlarcha u haqida yozayotganimiz, shunday bebaho asar-ki, unda buyuk ajdodlarimizning shonli va ibratli hayot yo'llari hikoya qilinadi. Muallifi esa shunday ulug' zot edi-ki, Hazrati Alisher Navoiy hamda Hazrati Jaloliddin Rumiy uni o'zlarining ma'naviy ustozi deb bilganlar. Hazrati Navoiy muallifni - Qaqnus, o'zini - Qaqnus bolasiga o'xshatgani ham bejiz emas.

Kitobning nomi - "Tazkirat Ul Avliyo", jahon so'z san'atining zabardast namoyandalaridan, ulug' shoir Hazrati Fariduddin Attorning qalamiga mansubdir. Asarning har bir sahifasida hikmat hamda ruhiy ozuqa mujassam. Albatta ushbu asar hayotingizda keskin burilish sodir etishi shubhasiz.


Insonning buyuklikka erishishligi o'tgan buyuklarning hayot yo'llarini, turmush tarzlarini o'rganish va ularni o'z hayotiga tatbiq etish bilan boshlanadi. Biz uchun g'arbliklarnikini qo'yib, o'z "buyuk ajdodlarimizning shonli iz"larini o'rganishimiz kifoya qila oladi, azizlar.

Sahifamizda yutuqli o'yin o'tkazib, ushbu mo'tabar kitobni g'oliblar uchun sovg'a qilishni rejalashtirdik.

Agar ushbu maqola 777 ta " 👍" yig'sa, o'yinni boshlaymiz!

@mutolaa_zavqdir

Mana, hurmatli Liderlar, innovatsiya qanday va qayerdan paydo boʻlishi mumkin?!

Ushbu voqeani kuni kecha Prezidentimizning “Har bir rahbar kuniga kamida ellik bet kitob oʻqishi kerak”, degan soʻzlaridan soʻng yozishga kirishdim.

Sababi bugun davlat boshqaruvida, OAV va jamiyatimizda eng koʻp ishlatilayotgan soʻzlardan biri bu innovatsiyadir. Lekin kuniga ming martalab ushbu soʻzni ishlatganimiz bilan biror sohaga innovatsiya oʻz-oʻzidan kirib qolmaydi. Agar biz davlat va jamiyat boshqaruvida innovatsiyani qoʻllamoqchi ekanmiz, avvalo, kinoteatrimiz qay ahvolda ekaniga nazar solaylik. Oq-qora tasvirli kinoteatr bilan hech qanday innovatsiya qilib boʻlmaydi.

Agar har birimizning kinoteatrimiz qaysi holatdaligini aniqlaydigan uskuna boʻlganda bormi, koʻpchilik 21-asrda haliyam oq va qora “Chayka” televizorlarda yashab kelayotganiga guvoh boʻlarmidik?!

Balki, shuning uchun ham innovatsiya juda qiyinchilik bilan jamiyatimizga kirib kelayotgandir. Koʻpgina davlat xizmatida faoliyat yuritayotganlarga oxirgi oʻqigan badiiy kitob nomini aytib bering, desam, javoblari oddiy – ish koʻp, kitob oʻqishga vaqt yoʻq. Xoʻsh, shu yerda savol tugʻiladi: Nima uchun baʼzi davlat xodimlari berilgan topshiriqlarni toʻliq tushunmaydi yoki oʻz sohasiga yangilik kirita olmaydi?

Bugun 7 yoshdan 70 yoshgacha kitob mutolaa qilishni boshlashimiz kerak. Balki 1 yilga favqulodda holat eʼlon qilib (albatta yaxshi maʼnoda) barcha davlat xodimlari uchun kuniga bir soat ish vaqtida “kitobxonlik soati”ni tashkil qilishimiz lozimdir, shunda barchamiz jamiyatdagi muammolarga yangicha, kreativlik bilan qarashga, ularni innovatsiyani qoʻllagan holda yechishga kirisharmidik?!

Nima uchun vaqtlari judayam tigʻiz, ishlari koʻp boʻlishiga qaramay, Bill Geyts, Barak Obama yoki Ilon Mask har yili oʻzlari oʻqigan oʻnta kitob roʻyxatini eʼlon qilishadi? Bill Geyts­ning bir intervyusida, jurnalist unga savol bilan murojaat qildi: “Janob Geyts, doim sizning yangilik qilishingizga koʻnikib bormoqdamiz. Faqat savol, ushbu yangiliklarni qayerdan olasiz?”

Javob juda oddiy boʻlgandi: “Men har kuni oz boʻlsa ham, kitob mutolaa qilaman. Bu mening har doim fikrlarim tiniqligiga va yangilik qilishga kuch beradi. Agar men kitob mutolaa qilmasam, demak yangilik qilishdan toʻxtayman. Bu – kompaniyamda innovatsiya toʻxtaydi, degani”.

Har yili dunyo mamlakatlarining kitobxonlik reytingi eʼlon qilinadi. 2017 yil yakunlariga koʻra, Xitoy, Ispaniya va Rossiya davlatlari fuqarolari haftasiga 7-9 soat kitob mutolaa qilishar ekan.

Shuningdek, ushbu tadqiqotda aholi soniga nisbatan kitoblar savdosi soni taqqoslanar ekan. Alam qiladigani, biz hatto yuztalikda ham yoʻqligimizdir. Kuchli yigirmatalikdagi davlatlar bilan davlat boshqaruvida innovatsiyani aniqlaydigan reytingni solishtirsak, aksariyat davlatlar mos keladi. Bundan shunday xulosaga kelish mumkinki, aynan kitobxonlik madaniyati yuksak darajada shakllangan  mamlakatlarda innovatsion faollik ham yuqori bosqichda.

Kitob oʻqimaslikka mingta bahonamiz bor, biroq kitob oʻqish uchun  bitta boʻlsa ham bahona topaylik, bu – Insoniylikni saqlab qolish boʻlsin.

Foydali boʻldi deyish uchun – 🌚

@mutolaa_zavqdir

Nega Qayta O'qishimiz Kerak?

Ko’p yillar avval oldin o‘qigan kitobini qayta qo‘liga olgan bir odam bor edi. Ilk bor bu kitob uni hayajonga, sarguzasht tuyg'usiga to'ldirgandi. Endi u yana sahifalarni varaqlar ekan, boshqa bir narsani topdi - sokin qayg'u, ilgari sezmagan teran ma’noni. Kitob o'zgargan emas edi. O’zgargan o’sha odamning o’zi edi.

Qayta o'qish - o'tmishni takrorlash emas; bu biz qanchalik ulg’ayganimizni kashf qilish degani. Bir paytlar bizni kuldirgan kitob endi yig'latib yuborishi mumkin. Biz ilgari e'tiborsiz qoldirgan saboq to'satdan hayotimizning yetishmayotgan qismiga o'xshab qolishi mumkin. Ammo qaysi kitoblar qayta o'qishga arzigulik? Qayerdan bilasiz?

1. Bir paytlar sizni hayajonga solgan kitoblarni qayta o‘qing. Hikoya chuqur taasurot qoldirgan bo'lsa, yana o’qishga arziydi. Oldin o’qib tushunilmagan yoxud e’tiboringizdan chetda qolgan ma’nolarni topishingiz mumkin.

2. Boshqacha tushunish uchun qayta o‘qing. Ba'zi kitoblar vaqt o'tishi bilan ma'noga ega bo'ladi. Yo'qotish haqidagi roman 20 yoshda unchalik qattiq ta'sir qilmasligi mumkin, ammo 40 yoshda u qalbingizga to'g'ridan-to'g'ri gapiradigan haqiqatni olib kelishi tayin.

3. Qanchalik ulg’ayganingizni bilish uchun qayta o'qing. Yillar oldingisiga nisbatan hozirgi kitobga munosabatingiz qanchalik o'zgarganligini sezasiz.

4. Yangi maqsad bilan qayta o‘qing. Ehtimol, siz bir vaqtlar kitobni faqat syujet, voqea uchun o'qigandirsiz, lekin endi siz uning chuqur ma’nosiga, qahramonlar arkasiga, ularni hikoyaga qo’shilishi va ichki kechinmalari ko’rsatilishiga, yoki yozuv uslubiga e'tibor qaratasiz. Har bir o'qish yangi taasurot bo'lishi mumkin.

5. Ko’nglingizni qoldirishidan qo'rqmay qayta o'qing. Ba'zida biz sevgan kitoblar endi avvalgidek aks sado bermaydi. Bu yaxshi va biz o’syapmiz, oldinga intilyapmiz, yangi hikoyalar, yangi darslarga tayyormiz degani.

Har bir kitob ham ikkinchi o'qishga munosib emas. Ammo ba'zi kitoblar bir marta o'qish uchun mo'ljallanmagan - ular biz bilan birga yurish, biz bilan birga o'sish va har safar ular bilan g’oyibona suhbat qurganimizda yangi narsalarni bizga taqdim etishi uchun mo'ljallangan.


Qayta o'qishga arziydigan kitoblar tavsiyasini xohlaysizmi?

Albatta - 🔥

@mutolaa_zavqdir

Nima uchun badiiy kitob oʻqish kerak – 3

Shuning uchun dastlabki jarayonda juda ham qiziqarli va hajmi katta boʻlmagan kitobni oʻqishni tavsiya etaman. Sababi kitob oʻqib yurmagan odam boshida biroz qiynaladi, oʻzini noxush his qiladi, uyqusi keladi. Lekin diqqatingizni jamlab, oʻqishdan toʻxtamasangiz, asta-sekin kitob oʻqishni sevimli mashgʻulot va odatga aylantira olasiz. Va besh-oʻnta badiiy kitobni oʻqiganingizda siz rangli tasmaga oʻtasiz. Misol uchun, “Graf Monte Kristo”ni oʻqiyotganingizda Marselning hatto labini va koʻz rangini koʻrishni boshlaysiz. Oʻn-oʻn beshinchi badiiy kitobni oʻqiganingizdan soʻng kinoteatringizda barcha syujetlarni va qahramonlarni Full HD formatida koʻrishga tushasiz. Bunda muallif tomonidan taʼriflangan barcha voqealarni ipidan-ignasigacha aniq-ravshan koʻrina boshlaydi. Hatto sizni yarim kechasi uygʻotib oʻqigan kitobingiz haqida soʻrashsa, hech ikkilanmay har bir betini aytib berish holatiga borasiz”.

Auditoriyada qiziqqon talabalar tomonidan yana savol boʻldi “Oʻn beshinchi kitobdan keyin qanday kinoteatr boʻladi?”

“Mutlaqo zoʻr boʻladi. Siz 3D tasvirdagi kinoni koʻrishni boshlaysiz. Siz endi tizimli fikrlashga oʻtasiz. Tasavvur qiling, ming betli kitobni oʻqiyapsiz. Bunda siz 1-betdagi syujet bilan 875-betdagi syujet oʻrtasidagi voqealarni bogʻlay olasiz. Siz muallif yozmagan, biroq aytmoqchi boʻlgan gapini ham tushunishni boshlaysiz. Shuningdek, siz mutolaa qilishni boshlaysiz. Siz savol berishni boshlaysiz, nimaga bunday boʻldi, nima uchun yozuvchi qahramonni oʻldirdi, boshqacha yoʻl tutsa ham boʻlardi-ku? Mana shu holatga yetgan insonlardagina fikrlash paydo boʻladi, fikr mukammallashsa, u gʻoyaga aylanadi, gʻoya noodatiy holatni talab qilsa, bu kreativlik boʻladi. Agar siz kreativlikni hayotga tatbiq etsangiz, bu innovatsiya boʻladi”.

Mana, hurmatli Liderlar, innovatsiya qanday va qayerdan paydo boʻlishi mumkin?!

Ushbu voqeani kuni kecha Prezidentimizning “Har bir rahbar kuniga kamida ellik bet kitob oʻqishi kerak”, degan soʻzlaridan soʻng yozishga kirishdim.

Sababi bugun davlat boshqaruvida, OAV va jamiyatimizda eng koʻp ishlatilayotgan soʻzlardan biri bu innovatsiyadir. Lekin kuniga ming martalab ushbu soʻzni ishlatganimiz bilan biror sohaga innovatsiya oʻz-oʻzidan kirib qolmaydi. Agar biz davlat va jamiyat boshqaruvida innovatsiyani qoʻllamoqchi ekanmiz, avvalo, kinoteatrimiz qay ahvolda ekaniga nazar solaylik. Oq-qora tasvirli kinoteatr bilan hech qanday innovatsiya qilib boʻlmaydi.

Agar har birimizning kinoteatrimiz qaysi holatdaligini aniqlaydigan uskuna boʻlganda bormi, koʻpchilik 21-asrda haliyam oq va qora “Chayka” televizorlarda yashab kelayotganiga guvoh boʻlarmidik?!

✅ Badiiy kitob oʻqish kerakmas degan yaqiningizga yuboring

Post foydali boʻldimi?

@mutolaa_zavqdir

Nima uchun badiiy kitob oʻqish kerak – 2

U oʻng qoʻli bilan peshonasiga urib “mana eng zoʻr va sifatli kinoteatr”, dedi.

Butun zal bir ovozdan kulib yubordi. Shunda u shoshilmay, ushbu fikrini asoslashga oʻtdi. “Toʻgʻri, bu javobim sizlarga gʻalati tuyulayotgandir yoki meni qarib qoldi, deb oʻylayotgandirsizlar. Yoʻq! Fikrimni sizlarga isbotlab bersam. Har bir inson badiiy kitob oʻqiganida miya­si ishga tushadi va oʻqiyotgan voqeani syujet shaklida koʻrishni boshlaydi. Kino – bu rejissyor tasavvuridagi holatni tasmaga tushgan shakli. Shuning uchun avval kitob oʻqib, soʻng ushbu asarga ishlangan kinoni koʻrsangiz, birinchi beradigan savolingiz “men voqeani yoki aktyorlarni boshqacha tasavvur qilgan edim. Oʻxshamabdi, mening Julyettam boshqacharoq, sal boʻyi uzunroq edi. Kinoda esa pastroq” deyish boʻladi, yaʼni siz kitobni oʻqish jarayonida “kinoteatr”ingiz ishga tushadi va ushbu kinoni rejissyori oʻzingiz boʻlasiz.

Bu yerda savol tugʻiladi, yaʼni nimaga baʼzi kinolar zerikarli boʻladi yoki kinoteatrlar huvillab qolgan? Buning javobini sizlarga tushuntirishga harakat qilaman. Demak, keling, avval har birimiz oʻzimizning kinoteatrni qanday qurishimiz mumkinligi haqida gaplashsak.

Agar siz koʻp badiiy kitob oʻqimagan boʻlsangiz, demak, sizning ongingizda 1925 yillardagi, yaʼni Charli Chaplinning oq va qora tasvirli holatdagi kinoteatr ishlamoqda. Shuning uchun sizning kinoteatringiz juda zerikarli va sifatsiz.

Bunday holatda kitob oʻqiganingizda koʻngil aynishi, bosh ogʻrigʻi va uyqu kabi holatlarga duch kelasiz hamda kitob boshlanmasdan yopiladi. Tasavvur qiling, hozirgi eng kassabop kinoni olaylik, “Avatar” kinosini ham oq-qora tasvirda sizga hozir qoʻyib bersam, oʻn daqiqadan soʻng zalda deyarli hech kim qolmaydi. Xuddi shunday badiiy kitobni ham zamonaviy 3D koʻzoynagida voqealarni koʻrib oʻqish lozim”.

Shunda zaldan savol boʻldi, qanday qilib oʻz kinoteatrimizni zamonaviy 3D holatiga keltirishimiz mumkin?

“Bunga siz koʻproq kitob oʻqish bilan erishasiz”, deb javob berdi. “Siz dastlabki beshta badiiy kitobni oq va qora rangda koʻrasiz. Shuning uchun...

Davomi bor...

Davomi aniq qiziqmi?
Albatta – 🌚

@mutolaa_zavqdir

Nima uchun badiiy kitob oʻqish kerak?

Bugungi mavzuimiz “Nima uchun badiiy kitob oʻqishimiz kerak?” degan savolga javob topish haqida.

Yoshligimda uyimizda eng koʻp eshitgan soʻzlarimdan biri “badiiy kitob oʻqi”, degan daʼvat boʻlardi. Menda esa doim bir savol tugʻilardi, “nima uchun men badiiy kitob oʻqishim kerak?”

Biroq bu savolga oʻzim kutgan javobni hech kimdan ololmaganman. Lekin baribir badiiy kitoblarni oʻqirdim. Yillar oʻtib, bu savolga javob topdim.

2012 yili AQSHda xorijiy stajirovkada boʻldim. Kaliforniya shtatida boʻlgan bir uchrashuv umrbod yodimda qoldi. Bir kuni eʼlon oʻqib qoldim. Unda taniqli bir rejissyor bilan “Eng yaxshi kinoteatr va kino” mavzusida ijodiy uchrashuv boʻlishi va unda barcha xohlovchilar ishtirok etishi mumkinligi yozilgandi. Bunday imkoniyatdan foydalanish maqsadida, men ham ushbu uchrashuvga bordim. Binoda 100 ga yaqin men kabi qiziquvchan yoshlar toʻplanishgan. Barchamiz rejissyorning kelishini kutmoqdamiz. Undan qandaydir falsafiy yoki professional mazmundagi maʼruza tinglasak kerak, degan xayoldamiz.

Nihoyat, biz kutgan rejissyor kirib keldi. Oddiy va kamtarona kiyimda. Tashrif buyurganlarning koʻpligini koʻrib hayron ham qoldi. Salom-alikdan soʻng bir qiziq savol bilan barchamizga murojaat qildi. “Dun­yodagi eng sifatli va qulay kinoteatr qayerda joylashgan?”. Koʻpchilik kutilmagan savoldan hayron qoldi.

Shunda birinchi qatorda oʻtirgan qiz San-Fran­siskoda joylashgan “The Castro Theatre” kinoteatri, deb javob berdi, sababi u AQSHdagi eng qadimiy kinoteatrlardan biridir. Javob notoʻgʻri.

Ikkinchi qatorda oʻtirgan koreyalik yigit “Seul shahridagi “Ciné de Chef” kinoteatri boʻlib, unda siz kino vaqtida bemalol ovqat buyurtma qilishingiz mumkin. Bir vaqtning oʻzida ham kinodan, ham ovqatdan zavqlanishingiz mumkin. Shunisi bilan ham qulay hisoblanadi”, dedi. Javob yana xato

Teparoqda oʻtirgan qiz qoʻlini koʻtarib, men dunyoning koʻp mamlakatlarida sayohatda boʻlganman va albatta, koʻp kinoteatrlarga ham borganman. Sizning savolingizga javob bu – Afinadagi “Cine Thisio” kinoteatridir. Ushbu kinoteatr ochiq osmon tagida joylashgan. Shundoqqina Akropolya va Panteona yonida joylashgan siz oʻzingizni antik davrga sayohat qilganday his qilasiz, dedi.

Toʻgʻri javob yana yoʻq.

Shundan soʻng auditoriyadagilar yana Londondagi, Moskvadagi, Berlindagi, Tokiodagi oʻnga yaqin kinoteatrlarning nomlari va u yerdagi qulayliklar haqida aytishdi. Barchasiga rejissyor tomonidan rad javobi berildi. Soʻng barcha tashrif buyuruvchilar bir ovozdan topa olmadik, oʻzingiz ayting, deyishdi.

Rejissyor tomonidan berilgan javob meni butunlay oʻylantirib qoʻydi.

Davomi bor...

Davomi qiziqmi?
Albatta – 🌚

@mutolaa_zavqdir

Qiymat yaratishni bilsangiz, hech qachon och qolmaysiz

Biz har kuni qiymat almashinuvida yashaymiz. Siz taksi bilan foydalanganingizda, kirakash jismoniy mehnati evaziga sizga qiymat berdi, siz kitob sotib olganingizda, yozuvchi aqliy mehnati evaziga sizga qiymat berdi.

Siz esa ularga pul qiymatida javob qaytarasiz. 

Har qanday daromad qiymatga bog‘liq, uning miqdori esa qiymat noyobligiga. Siz bera oladigan qiymatni qancha kam odam bera olsa, demak shunchalar yuqori darajadagi qiymat almashinuvida qatnashasiz.

Kirakash 1 soat mehnatiga 10$ daromad qilsa, kvant muhandisi 10 barobar qilishi mumkin. Hammasi qiymat noyobligiga taqaladi.

Agarda kvant fizikani tushunadiganlar, kirakashlik qilishi mumkin bo‘lgan odamlar bilan teng bo‘lganida ularning daromadi bir xil bo‘lar edi. Majoziy ma’noda albatta.

© abdusattor

Koʻp pul topish uchun koʻp qiymat berish kerakmi? Nima deb oʻylaysiz?😌

Qiymat berishni oʻrganyapman – 🌚

@mutolaa_zavqdir

Kitob oʻqimay qoʻysangiz, nima boʻladi?

😎 Dunyodagi eng yaxshi kinozal miya ekanini yaxshi kitob o‘qish davomida tushunib yetish mumkin. Kitobxon esa sevib o‘qigan asaridagi voqealarni o‘z boshidan kechirgandek bo‘ladi.

Kitob o‘qimay qo‘ysa-chi, nima bo‘ladi? Quyida ushbu savolga javob beramiz.

So‘z boyligi kamayadi

Kitob o‘qish nafaqat dunyo qarashni kengaytiradi, balki savodxonlikning ortishi, yozma va og‘zaki nutqning boyishiga sabab bo‘ladi.

Kitob o‘qiydigan odam, qayerda, qachon, kimga qanday gapirish kerakligini yaxshi biladi va kamdan kam fikrini ifodalash uchun so‘z topolmay qoladi.

Kitob o‘qiydigan insonlar bilan suhbatlashish, fikr almashish maroq beradi.

Xotira pasayadi, miya faol ishlamaydi

Miyaning chap yarim sharida so‘zlar va ma’lumotlar bilan ishlasa, o‘ng yarim shar esa vizualizatsiya va tasavvurga javob beradi.

Kitob o‘qish davomida esa miyaning ikki yarim shari ham faol ishlaydi. IQ darajasini oshirish, anglash va tasavvur oshishiga sabab bo‘ladigan kitobga shuning uchun ham eng yaxshi miya trenajyori deb ta’rif bersa bo‘ladi.

Miya va qalb oziqadan bebahra qoladi

Yaxshi kitobda hamisha o‘yga toldiradigan savollar va vaziyatlar bo‘ladi.

Yashashdan ma’no nimadaligi, global va jamiyatdagi mavjud muammolar, kishilar o‘rtasidagi munosabatlar — qahramonlar obrazida ko‘rsatib yoki muallif tomonidan ochiqlanib berilishi o‘quvchida insoniylik, befarq bo‘lmaslik va vaziyatga ongli ravishda yondashishga undaydi.

Miriqib o‘qilgan kitob miyani oziqlantiradi, qalbga malham bo‘ladi, inson dunyoni anglashga intiladi.


Siz davomiy kitob oʻqiysizmi yoki boʻsh payt boʻlgandami? Yozib qoldiringchi ☺️

Davomiy oʻqiyman – 🤩
Endi oʻqiyman –😁

@mutolaa_zavqdir

Chumolilar Yolg'onni Kechirmadi

Bir kishi o'zi guvoh bo'lgan g'aroyib hodisani shunday hikoya qiladi:

Bir chumolining xurmo mevasi bo'lagi yoniga kelganini ko'rdim. Uni diqqat bilan kuzatdim. Chumoli xurmo bo'lagini tishladi, lekin yerdan ko'tarishga kuchi yetmadi. Tortib ko'rdi, ammo o'rnidan qo'zg'ata olmadi. So'ng uzoq vaqt o'tmay, o'zi bilan bir gala chumolini boshlab keldi. U kelganida xurmo bo'lagini yerdan ko'tardim. Shunda chumoli va uning sheriklari xurmo o'rni atrofida aylandi. Ammo hech narsa topa olishmagach, ortlariga qaytishdi. Men xurmo bo'lagini joyiga qo'yib qo'ydim. Chumoli yana ortiga qaytdi, uni yerdan ko'tarishga yana kuchi yetmadi. Sudrashga urindi, bo'lmadi. Tezda uzoqqa ketib ulgurmagan sheriklarini yana boshlab keldi. Men esa yana xurmoni yerdan ko'tardim. Chumolilar o'tgan galgidek atrofni aylanib, yana ortlariga quruq qaytishdi.

Xurmoni joyiga qo'ydim. O'sha chumoli qaytib, yana sheriklarini olib keldi. Yetib kelishganida esa xurmoni qo'limga oldim. Ular aylanib, bu safar ham hech narsa topa olishmagach, o'sha chumoli atrofida halqa qurishdi. Kutilmaganda uning ustiga yopirilib, mayda-mayda qilib tashlashdi.
Men esa hayratdan qotib qoldim.
Qabih ishim uchun o'zimdan qattiq nafratlandim…

"Muslima Zohidjon qizining erkin tarjimasi"

@mutolaa_zavqdir

Nega Yapon Yuz Yil Yashar...

Nega yapon yuz yil yashar-u

O’zbek buncha yoshga bormaydi?

Chunki yapon bizdek qorong'u

Sahar turib oshga bormaydi.

Motamida u obro' uchun

Elni chorlab ziyofat qurmas.

Bayramida bel bog’lab uch kun

Shamdek qotib ko’chada turmas.

Garchi bizdan yuz bor farovon,

Garchi bizdan yuz karra to'qdir.

To’y xarjida yuzta boy yapon

Bir kambag’al o’zbekcha yo’qdir.

Bu so’zimni yaponga aytsam

Dedi battar qisib ko’zini:

Yapon bundoq yasholmas hech ham,

Xarakiri[1] qilar o’zini.


1 Xarakiri - yapon samuraylarining or-nomus uchun o’z joniga qasd qilishi.

Erkin Vohidov

@mutolaa_zavqdir

O‘qiganlaringizni Qanday Eslab Qolish Mumkin?


Ba’zi kitoblar qalbingizga muhrlanib qoladi. Boshqalari esa shamolda uchgandek g’oyib bo’ladi. Oxirgi sahifani yopganingizda o‘zgarganingizni his qilasiz, lekin oradan haftalar o‘tib, saboqlar esdan chiqadi, qahramonlar unutiladi, tarovat so‘nadi.

Biroq bari butkul boshqacha bo‘lsa-chi?

Har bir hikoya, har bir g‘oya, har bir dono g’oya tomchilari qalbingizga muhrlansa, kerak paytda esga tushsa-chi?

Eslab qolish san’atiga marhamat.

Niyat bilan boshlang. Kitobni shunchaki varaqlamang—unga sho‘ng‘ib keting. O’qishdan oldin o‘zingizdan so‘rang: bu kitobni nega o‘qiyapman? O‘rganish uchunmi? O‘sish uchunmi? Tasalli topish uchunmi? Niyat bo‘lsa, kitobdagi so‘zlar o‘zingizga singadi, havoga uchib ketmaydi.

Tongda o‘qing. Kun shovqini boshlanishidan oldin, ongingiz tashvishlarga to‘lib ulgurmasdan, kitob so‘zlari bilan tongni qarshi oling. Ertalab o‘qigan narsalar chuqurroq singadi, kun davomida xotirangizda saqlanib qoladi.

Tanaffus qiling. Jimlik ham yordam beradi. Kuchli fikrni shunchaki o‘tkazib yubormang—to‘xtang. Kitobni yoping, chuqur nafas oling. Ma’no ongga emas, qalbingizga joylashsin. Kitobni shoshilib o‘qish—bog‘ orasidan yugurib o‘tishdek gap: gullarning tarovati va iforini sezmay qolasiz.

Yozib boring. Qiziq fikrlar, ta’sirli jumlalar — ularni yozib qo‘ying. Siyoh xotirani mustahkamlaydi, xuddi gulni kitob sahifalari orasiga qo’yib qo‘ygandek.

Ovoz chiqarib o‘qing. Ba’zi hikoyalar eshitilishi kerak. So‘zlar til uchida qayta tug‘iladi. Quloq bilan eshitgan har bir so’z onggacha chuqurroq yetib boradi.

Boshqalar bilan bo‘lishing. O‘qiganlaringiz haqida tanishlaringizga gapiring, tushuntiring. Bilim boshqalar bilan baham ko‘rilganda sizniki bo‘ladi. O‘qigan narsangiz sizning tajribangizga aylanadi.

Kitobni hayotingiz bilan bog‘lang. Qahramonning hikoyadagi yo’li sizga tanishmi? Berilgan saboq hayotingizdagi bir holatni eslatdimi? Kitob hayotingiz bilan uyg‘unlashsa, u hech qachon unutilmaydi.

O‘qishni to‘xtatish uchun eng qiziq joyni tanlang. Keyingi bobga o‘tishga shoshilmang. O‘zingizga savol bering. Ongingiz kitob yopilganida ham javob izlashda davom etadi.

Kitobni bir so‘z bilan ifodalang. Kechirim. Xiyonat. Orzu. Najot. Har bir kitobni mohiyatiga olib boradigan bitta kalit so‘z bo‘lishi mumkin. Shu so‘z orqali butun hikoyani xotirangizda qayta jonlantira olasiz.

Kitoblar shunchaki hikoyalar emas. Ular biz qanday inson ekanimizni va kimga aylanishimiz mumkinligini aks ettiradi. Biz eslab qolgan kitoblar—bizni o‘zgartirgan kitoblardir.

@mutolaa_zavqdir

Ko'pchiligimizga taniqli bo'lgan bir kishi aytgandi:

Kitob o'qishlikda bir xatar bor! Aql ishlab ketishligi xavfi bor, shuning uchun siz kitob o'qimang, aqlingiz ishlab-ketib qolsa bormi...?!

Gap egasini topadi!

@mutolaa_zavqdir

Orzular Kutubxonasi: Cheksiz Olamlarga Chiqish Darvozasi

Ostonadan kirilganda vaqt to’xtab qoladigan joyni tasavvur qiling, atrof qog’oz va siyoh iforiga burkangan, bu yerdagi sukunatni sekin ochilayotgan varaqlar hamda qalamlarning qog’ozga ishqalanish ovozlari, hayolga berilgan kitobxonlarning nafas olishi to’ldirgan. Xayolot olami ixlosmandlari uchun chin so'ngi maskan - kutubxonaga xush kelibsiz.

Ichkariga qadam qo‘ysangiz, tashqi dunyo go‘yo g’oyib bo’ladi. Ko‘chalardagi shovqin-suron tinadi, uning o‘rnini esa deyarli abadiy tuyuladigan sukunat egallaydi. Baland derazalardan tushayotgan nur ko’p avlodlar o’qib o’rgangan hikoyalarga limmo-lim yog‘och stollarga oltin jilolar sochadi. Tokchalar esa ufqqa qadar cho‘zilib ketgandek, har bir kitob o’z varaqlarida ajib sarguzashtlardan shivirlayotgandek.

Bir chekkada o'smir qiz o‘tiribdi — kitobni shunchalar yaqin tutganki, go‘yo uning ichiga kirib ketishni xohlayotgandek. Bir qariya esa falsafa bo‘limi yonida sekin qadam tashlab, barmoqlari bilan kitobni paypaslayapti — xuddi eski do‘stlarini yo‘qlagani kelgandek. Stolda o‘tirgan talaba esa qizg‘in izlanishda — qalamidan tezroq fikr yuritib, satrlarni belgilab chiqmoqda. Bu “so‘zlar mamlakati”da har kim o‘z yo‘lida: kimdir javob izlaydi, kimdir haqiqatdan qochadi, biroq ularning barcha-barchasi hikoyalar bog‘lagan ko‘rinmas ip bilan bir-biriga uzviy ulanib ketgan.

Ammo kutubxona shunchaki kitoblar to‘plangan maskan emas. Bu – minglab hayotlarga ochiladigan darvoza. Bir kitobni ochsangiz – Otabek va Kumush bilan birgalikda Xonlik davrining eng og'ir damlarini boshdan kechirasiz, boshqasini ochsangiz – Oybek va Zarifa opaning sevgi va muhabbat ustunlari bilan qad rostlagan va sadoqat naqshlari bilan bezatilgan ulug' bir qasrining mahobati qarshisida lol qolasiz. Bir kitob sizni Oyga olib ketadi, yana biri esa inson qalbining eng qorong‘u burchaklariga tortadi. Oxirgi sahifani yopguningizcha, siz yuzlab hayotlarni yashab o‘tishingiz mumkin.

Kutubxonada tarovat bor. Na ertaklardagi mo‘jiza, na afsonalardagi sir-sinoat emas, balki bundan-da chuqurroq, kuchliroq narsa – kashfiyot tarovati bor. Bu yerda birgina jumla inson tafakkurini o‘zgartirishi mumkin. Birgina kitob esa hayotni. O‘z vaqtida o‘qilgan to‘g‘ri hikoya siniq qalblarni davolashi yoki haqiqat og‘irligi ostida so‘nib ketgan orzularni qayta alanga oldirib yuborishi hech gap emas.

Kutubxona aslo odam ajratmaydi. Kimligingiz, qayerdan kelganingiz yoki qanday dardlarni yuragingizda olib yurganingiz aslo qiziq emas. Faqat ichkariga kirishingiz uchun taklif bo’ladi, joy beriladi va qo‘lingizga boshqa bir dunyo eshigini ochadigan kalit tutqaziladi. Qolgani esa o’zingizga havola.

Shunday ekan, ichkariga kiring. O’z kitobingizni toping. Hayolan sayohat qilishni boshlang.

@mutolaa_zavqdir

Kitob O'qish Sirlaridan 10 Ta O'zgacha Haqiqat: Siz Ham Bilmasligingiz Mumkin!

1. Hech qachon kitobni tez o‘qishga intilish evaziga uning mazmunini qurbon qilmang. O‘qish – bu poyga emas, tafakkur jarayonidir.


2. Hech qachon audiokitoblarni o‘qishga nisbatan ikkinchi darajali deb hisoblamang. Ular fikrni kengaytirish va vaqtni samarali boshqarishda ajoyib vositadir.


3. Hech qachon muallif fikrlarini mutlaq haqiqat deb qabul qilmang. Yaxshi o‘quvchi doimo tanqidiy fikrlaydi va baholaydi.


4. Hech qachon barcha kitoblarni bir xil uslubda o‘qishga harakat qilmang. Adabiyot janriga qarab, o‘qish tezligi va usuli o‘zgarishi lozim.


5. Hech qachon faqat bestsellerlarni tanlamang. Kam tanilgan, lekin chuqur mazmunga ega kitoblar ko‘pincha eng yodda qolarli bo‘ladi.


6. Hech qachon biror kitobni tugatish uchun o‘zingizni qiynamang. Siz uchun foydasiz yoki qiziqarsiz kitobni o‘qish vaqtni behuda sarflashdir.


7. Hech qachon faqat bir mavzudagi kitoblarni o‘qimang. O‘zingizni har xil mavzularga bag‘ishlash – bilimni kengaytirishning eng yaxshi yo‘lidir.


8. Hech qachon kitob o‘qishni kunlik tartibingizdan chetda qoldirmang. O‘qish uchun alohida vaqt belgilash odatga aylansa, bu o‘z-o‘zini rivojlantirishga xizmat qiladi.


9. Hech qachon o‘qilgan bilimlarni faqat xotirangizda saqlamang. O‘zlashtirilgan g‘oyalar va fikrlarni hayotingizga tatbiq qilish bilimning haqiqiy kuchini ko‘rsatadi.


10. Hech qachon kitob o‘qishni zerikarli yoki faqat hordiq chiqarish vositasi deb o‘ylamang. Kitoblar dunyoqarashingizni o‘zgartiruvchi, ma’naviy va intellektual o‘sishga yetaklovchi qudratli quroldir.



Bonus maslahat:
Kitob o‘qish – bu faqat bilim olish emas, balki sizni o‘zingiz bilan chuqurroq tanishtiradigan bir sayohatdir. Har bir o‘qilgan kitob ichki olamingizni yangi bo‘yoqlarda aks ettiradi.

Agar ushbu maqola sizga yoqqan bo‘lsa, qaysi jihatlari ko‘proq ilhomlantirganini izohlarda yozib qoldiring!

"Kitobiy Iqtiboslarining Ta'sir Kuchi: So'zlar Hayotimizni Qanday O'zgartiradi?"

Kitoblar hayotimizda nafaqat bilim manbai, balki ilhom va dalda beruvchi kuch sifatida xizmat qiladi. Ayniqsa, ba'zi iqtiboslar inson ruhiyatiga shu darajada ta'sir ko'rsatadiki, ularni eslab, yillar davomida kuch olish mumkin. Shunday jumlalar bor-ki, ular bizni o'yga soladi, hayotga yangicha nazar bilan qarashga undaydi.

Mark Tvenning mashhur jumlasi bizni harakat qilishga chorlaydi:

"Yigirma yil o‘tgach, qilgan ishlaringiz emas, balki qilmagan ishlaringiz uchun ko‘proq afsuslanasiz."

Bu so‘zlar insonni hayotda xatolardan qo'rqib to'xtab qolmasdan yaxshilab o'rgangan holda tavakkal bilan ish ko'rishga va yangi imkoniyatlardan foydalanishga undaydi. Bu iqtibos bizni o‘z hayotimizga jiddiy qarashga va har bir kunni mazmunli o‘tkazishga chaqiradi.

Yana Viktor Hugoning "Sohibqiron" romanidagi so‘zlari ham juda ta’sirli:

"Eng katta kurash bu o‘z-o‘zing bilan kurashdir."

Hayotda biz ko‘pincha tashqi muammolar va qiyinchiliklarga qarshi kurashga ko‘p e’tibor qaratamiz, lekin inson o‘z ichidagi zaifliklarni yengib, katta maqsadlarga erishishi haqiqiy g'alabadir.

Paulo Koeloning "Alkimyogar" asaridagi quyidagi so‘zlar esa o‘z orzulari sari dadil intilganlar uchun bir rahbar misolida:

"Agar siz biror narsani chin dildan istasangiz, butun olam sizga uni amalga oshirishga yordam beradi."

Bu iqtibos insonlarga o‘z istaklariga va maqsadlariga ishonchni yo'qotmaslikni eslatadi.

Albert Kamyuning "Sizif afsonasi" asaridan quyidagi iqtibos hayotning murakkab tomonlariga chuqur yondashishga chorlaydi

"Eng katta qiyinchilikni his qilgan daqiqalaringizda ham tabassum qiling, chunki tabassum - bu isyonning boshlanishidir."

Bu jumla insonni hayotning har qanday murakkabligini yengishga chaqiradi. U bizga ko‘rsatadiki, har qanday sinov oldida ham irodali bo'lish muhimdir.

Bu kabi iqtiboslar insonning fikrlash doirasini kengaytiradi va unga yangi kuch bag‘ishlaydi. Shuningdek, ushbu keltirilgan iqtiboslarning mazmun-mohiyatiga e'tibor qaratsangiz, ular bizning sof milliy qadriyatlarimizga mos ekaniga amin bo'lasiz.
Ixtiyoriy bir kitobdagi oddiy jumla butun hayotingizni o‘zgartirishi mumkin. Shuning uchun, kitoblar bilan do‘st bo‘lish inson hayotini yanada boy qiladi va uning ichki dunyosini yuksaltiradi.

Sizning hayotingizga eng ko'p ta'sir qilgan iqtibos qaysi? Izohlarda biz bilan bo‘lishishni unutmang!

@mutolaa_zavqdir

Ilm deganda oliy o'quv yurtini tamomlab qo'lga kiritiladigan bir parcha qog'ozni tushunmaslik kerak. Ilm bu uyqusiz tunlar, soatlab kitob titishlar, ustozlar eshigiga qatnab, g'urur va faxrni sindirishlar, qancha ilm olsa-da, hali hech narsaga erishmagani uchun nadomat chekishlardir. Mavritaniyaning atoqli olimlaridan Muhammad Amin Shinqitiy yolg'on guvohlik haqida leksiya o'qiyotgan edi. «U nimaga o'xshaydi?» deb qoldi o'tirganlardan biri. U kishi hozirjavoblik bilan: «Universitetdan oladigan shahodatnomangizga o'xshaydi», deb javob berdi.

"Ulug'lar Shunday Yashashgan" kitobidan

#iqtibos

@mutolaa_zavqdir

Odamlar orasida «loqaydlik» degan og'ir bir dard, tuzalmas bir xastalik juda ildiz otib ketganki, bu ham ana shu illatlarning eng yomonlaridandir. «Qo'shnining uyi yonib ketsa, menga nima, meniki omon qoldi-ku!» degan kayfiyatdagi odamlar ham bor. «Do'stim qamalib qolgan bo'lsa, men qamatganim yo'q-ku, o'zi juda haddidan oshib ketgandi-da, bosar-tusarini bilmay, kerilib ketgan edi», deb o'zimizni ovutamiz. «Qarindoshim turmushda qiynalib qolgan bo'lsa, mening nima aybim bor, hadeb uyida yotavermay mundok yelib-yugursin edi» deb, aql o'rgatadiganlarimiz ham topiladi. Yo'lda mashinasi buzilib qolgan yoki benzini tugab qolgan haydovchining iltijo bilan ko'tarilgan qo'lini ko'rmaganga olib o'tib ketamiz. Bahonamiz ham tayyor: «yumushimga shoshib turuvdim» yoki «mashina tuzatish qo'limdan kelmasa» yoki «o'zimda ham yonilg'i kam edi». Huzuringizga yordam so'rab yoki maslahat olish ilinjida kelgan kishining gapini eshitgingiz ham kelmaydi, chunki sizga ham «loqaydlik kasali» yuqqan. Yurtimizga G'arb o'lkalaridan shiddat bilan bostirib kelayotgan «pop-madaniyat» bilan ham, yoshlarimiz axloqiga zaharli xanjar bo'lib urilayotgan faxsh va buzuqliklarni targ'ib qiluvchi matbuot, kitob va filmlarning ko'paygani bilan ham, farzandlarimiz o'qishda emas, kompyuter o'yinxonalarida vaqt sovurishayotgani bilan ham ishimiz yo'k. Chunki bu narsalar go'yo bizga taalluqli emas, chunki biz loqaydlik kasali bilan og'riganmiz.

"Ulug'lar Shunday Yashashgan" kitobidan

@mutolaa_zavqdir

Eng yomon illatlardan sanalgan g'azab insonga hech qachon yaxshilik keltirmaydi, martabasini ko'tarmaydi. Bunga minsol tariqasida ajoyib bir zarbulmasalni keltirish mumkin: bir duradgorning ustaxonasi bor ekan. U har kuni kech-qurun ishni tugatgach, asboblarini dastgohning ustida koldirib, ustaxonani qulflab ketar ekan. Bir kuni u ketgach, ustaxonaga bir ilon yemish qidirib kirib qolibdi. Ilon dastgohning ustida sudralib borayotib, arraning ustidan o'tib ketibdi. Arraning o'tkir tishlari uning tanasini shilib yuboribdi. Qonga belangan ilon jon achchig'ida arrani chaqa ketibdi. Ammo endi uning og'zi ham qonga to'libdi. Ilon arrani bir yirtqich hayvon deb o'ylab, jon-jahdi bilan uni chaqishda davom etibdi. Holdan toyib, o'lishiga ko'zi yetgach, oxirgi kuchlarini to'plab, arrani butun tanasi bilan o'rab olib, bo'g'a boshlabdi... Ertalab duradgor ustaxonasiga kelsa, ahmoqligi tufayli arraga o'ralib o'lib yotgan ilonni ko'ribdi. Qissadan hissa shuki, ba'zan g'azab otiga mingan chog'imizda o'zgalarni jarohatlamoqchi bo'lamiz, ammo bu bilan o'zimiznigina jarohatlayotganimizni bilganimizda esa kech bo'lgan bo'ladi... Shunday ekan, har bir voqea-hodisaga, birovlarning ishi va gap-so'ziga ortik- cha e'tibor beravermang. Jizzakilikdan saqlaning. Mayda-chuyda ishlar e'tibor berganingizga arzimaydi.

"Ulug'lar Shunday Yashashgan" kitobidan

@mutolaa_zavqdir

Mutolaa Uchun Vaqt Yo'q(mi?): Qanday Qilib Yumushlarga To'la Hayotimizga Kitoblarni Sig'dirish Mumkin?

Hozirgi tez surʼatlar bilan rivojlanib borayotgan hayotimizda, mutolaa uchun vaqt topish juda qiyindek go'yo. Biroq, siz o'sishni, o'zgarishni va albatta ma'naviy hordiq chiqarishni istaydigan kishilar qatorida bo'lsangiz, buning uchun astoydil harakat qilishingizga ishonamiz. Quyida sizlar bilan mutolaani kundalik odatiga kiritishga harakat qilgan kitobxonda uchraydigan ba'zi odatiy qiyinchiliklar va ularning amaliy yechimi haqida bahslashgan bo'lamiz.

1. Barchamiz His Etadigan Vaqt Tanqisligi

- Ish va Ta'lim: Mashaqqatli ishlar, maktab yoki oliy taʼlim darsliklari va tirbandliklar aro kundalik qatnovlar orasida mutolaa uchun vaqt yetmay qolishi ajablanarli holat emas albatta. Biroq kitob o'qishga bo'lgan ishtiyoqingiz so'nishiga yo'l qo'ymang.
- Oilaviy Mas'uliyatlar: Agar siz oilaviy majburiyatlaringizni bajarayotgan bo'lsangiz, kitob u yoqda tursin, o'zingizga vaqt topish qiyin bo'lishi mumkin. Ammo bu imkonsiz emas - keling, qanday bo'lishini esa birgalikda birozdan so'ng ko'rib chiqamiz.

2. Raqamli Chalg'ituvchilar: Pismiq Vaqt O'g'rilari

- Ijtimoiy Tarmoqlar: Qancha vaqt o'zimizni yotish oldidan qo'limizga kitob olish o'rniga ijtimoiy tarmoqlarda soatlab bilimsiz "sayr qilib yurgan" holda topishimizni hech his qilganmisiz? Ijtimoiy tarmoqlar qiziqarli bo'lishi mumkin, ammo unutmaylik-ki, u vaqtimiz kushandasi ham bo'la oladi.
- Televideniya: Cheksiz seriallar, kinolar va shou dasturlar qanchadan qancha yoshu-qarilarimizning qimmatli vaqtini o'g'irlayotgani ham sir emas-ku, shundaymi? Kitoblarning ham ular kabi o'ziga rom etish xislati bor, shunchaki ochib uni kashf etsak bo'lgani.

3. Holdan Toyish va Aqliy Charchoq: Kun Yakunidagi Holsizlik.

- Kun oxiridagi kuchsizlik: Kun bo'yi qilingan mehnatdan so'ng, televizor qarshisiga joylashish yoki telefonga chalg'ish va yoki shunchaki uyquga ketish yoqimli albatta, biroq kuningizni yaxshi kitob bilan yakunlash zavqini tasavvur qiling-a!

- Ruhiy Zo'riqish(stress): Hayot tashvishlari ulkan to'lqinlar kabi ko'tarilib xatar tug'dirsa, biling-ki, kitobingiz mustahkam kemadir va siz uning kapitanisiz, bo'rondan o'tib, o'zingizni xotirjamlikning sokin qirg'oqlariga yo'naltiring."

Mutolaa Uchun Vaqt Ajratish: Oddiy, Samarali Usullar

- Reja Tuzing: Oz-ozdan boshlang, bir kunda 5-10 betdan o'qib boring, yoki 5-10 daqiqadan, farqi yo'q. Muhimi bardavom bo'lishingiz. Dono xalqimiz nima deydi: Toma-toma ko'l bo'lur, tommay qolsa cho'l bo'lur.

- Tartib O'rnating: Tongi qahva bilan bir necha daqiqa bo'ladimi yoki uyquga yotishdan oldin bir necha sahifa bo'lsin, mutolaa uchun doimiy bir xil tartib o'rnatish uni odatga aylatirishga yordam bo'ladi.

- Vaqtni To'g'ri Taqsimlang: Ekran vaqtini qisqartiring va o'qish uchun maxsus vaqt belgilab ekranni bloklang. Ba'zan sizga atigi 15 daqiqa kifoya qiladi.

- Doim Kitobni O'zingiz Bilan Olib Yuring: Kutish vaqtini o'qish vaqtiga almashing. Jamoat transportida bo'lasizmi, navbatda turasizmi yoki uchrashuvni kutasizmi, doimo qo'lingizda kitob bo'lsa, har qachon uni mutolaa qilishga imkoningiz bo'ladi, demak.

- Audio Kitoblar: Audio kitoblarni, ulov boshqarayotib ham, jismoniy mashqlar bilan shug'ulanayotib ham yoki kundalik yumushlaringizni bajarayotib ham, tinglashingiz mumkin. Bu, vaqtingiz kam bo'lganda ham, "o'qish" uchun ajoyib usul.

- Kitobsevarlar Klubiga Qo'shiling: Mutolaa sayohatingizni boshqalar bilan ulashish mutolaani odatingizga aylantirishga ajoyib turtki bo'ladi.

- Texnologiyalardan Samarali Foydalaning: Telefoningizda kitob o'qish uchun eslatmalar o'rnating yoki kunlik o'zgarishlaringizni kuzatib borish uchun maxsus ilovalardan foydalaning. Ushbu kichik harakatlar sizni davomli mutolaa qilishingizga yordam bo'ladi.

Bularni albatta sinab ko'ring. Unutmang-ki, kitob o'qish shunchaki bo'sh vaqtda qilinadigan ish emas, balki o'zingizga berishingiz mumkin bo'lgan eng katta sovg'alardandir. Shunday ekan, buni birinchi o'ringa qo'ying va hayotingizni qanday o'zgartirishini tomosha qiling!

@mutolaa_zavqdir