«ИШҚ ИШИ БИТМАГАЙ ХАЛОЙИҚ БИЛАН...»

Тўртликлар


* * *
Умрингни кўп қисқа кўрса ҳам фалак,
Нур дея, гул дея вужудинг ҳалак.
Сени ўлдирсалар, танангда қон йўқ,
Қонингни ким ичди, жоним, капалак?..

* * *
Йўл яна ўшадир, ул баҳор қани?
Ерлар, қирлар ўша, лолазор қани?
Қалб ўша, дил ўша – умидлар қайда?
Умрингга нур берган ишқи ёр қани?

* * *
Ер билан самонинг сенга фарқи йўқ,
Паст билан аълонинг сенга фарқи йўқ.
Айт бизга: ошиқлик қандай сазодир? –
Дард билан давонинг сенга фарқи йўқ!

* * *
Дўст, майли, туҳмат қил, ҳақорат қилгин,
Тангрим, сен сабрга ишорат қилгин.
Қалбимга урилган ҳар бир озорни
Бирор гуноҳимга каффорат қилгин.

* * *
Сўзлаш самодаги малойик билан,
Сирлашма кўп аҳли алойиқ билан.
Ошиқ, Гўрўғлидек ўзингдан қолма,
Ишқ иши битмагай халойиқ билан.


Мирзо КЕНЖАБЕК


@m_kenjabek
┈┈• ❀ 🌷☘️🌷 ❀ •┈┈•